Read Napu Yohane 11 Bible Online

Yohane 11 - Napu bible

Yohane 11

¹Ara hadua tobalilo au rahanga Lasaru maida i boea Betania hihimbela hai Maria hai Marta, halaluna. (Maria itimi au ina motidorohi bitina Yesu hai lana mawongi, hai naumpahi hai weluana.) Hambela tempo, Lasaru mahai.

³Halaluna au rodua iti motuduhe tauna lao mouliangaa Yesu, “Pue, himadaMu au Nupokaahi, tangana mahai.”

⁴Kanahadina Yesu bambari iti, Nauli, “Hakina iti bara ina Napomate. Iti mewali bona peawana Pue Ala rapatongawa, hai bona Iko AnaNa rapomahile woriNa.”

⁵Nauri Yesu mampokaahihe Marta, Maria, hai Lasaru,

⁶agaiana kaNahadina Lasaru mahai, Ia bara kasaliu lao; maida pea i paidaaNa rongalo kamahaena.

⁷Liumi rongalo, hangko mouliangaarihe topeguruNa, “Maikau, lao huleke i tampo Yudea.”

⁸Rauli topeguruNa, “Guru, bara mani mahae to Yahudi inditi mampeinao mowatuiKo. Moapari hai Nupeinao mbuli lao indolou?”

⁹Nauliangaahe Yesu, “I lalu hangaloa, bara pae hampulo hai rojaa? Tauna au molumao mabaa, barahe ina tehube. Moitahe raranda, lawi ara pewangka mopamabaa dunia ide.

¹⁰Agaiana tauna au molumao kaindi, batena tehubehe, lawi bara ara kamabaa iria.”

¹¹Nodomi lolitana Yesu, hai roo indo Nauli mbuli, “Himadanta Lasaru, letami. Agaiana ina lao Kurua.”

¹²Katouana lolitana Yesu iti, lempona Lasaru matemi. Agaiana bara raisa topeguruNa, nabuhu inaonda pea Lasaru iti tou-tou mpuu leta. Ido hai rauliangaa, “Pue, ane letami, ia ina maoha.”

¹³

¹⁴Mewali, Nabungkahiamohe lempona lolitaNa, Nauli, “Lasaru matemi.

¹⁵MatanaNa lawi baraNa ara i kapatena. Lawi apa au mewali, ina moanti roa ngkatuwo irikamu bona mepoinalaikau Iriko. Laomokekau mampeita Lasaru.”

¹⁶Tomas, au rauli Toporopa, mouliangaahe hangka topeguruna, “Maikau meulake Iria nauri mateke hihimbela hai Ia.” Mewali lao mpuumohe i tampo Yudea.

¹⁷Kahawena Yesu i Betania, Nahadimi bambari au manguli ibami alona Lasaru ratawu.

¹⁸(Betania iti, hungku i Yerusale, ba arato pea pae talu kilo kakaraona.

¹⁹Mewali, bosahe to Yahudi mai mopalindo Marta hai Maria i kapatena adinda.)

²⁰Nahadimi Marta kahawena Yesu, ido hai laomi nadupa. Agaiana Maria, i sou liliu pea.

²¹Nauli Marta i Yesu, “Pue, ane keindeKo i kamahaina adingku, kebara mate.

²²Nauri nodo, kuisa: apa au Nuperapi i Pue Ala ide-ide, batena NaweiKo.”

²³Nauli Yesu iria, “Adimu ina tuwo hule.”

²⁴Nauli Marta, “Io, au kuisa, ina tuwo hule i alo pebotusi, i karapopearonda ope-ope tomate.”

²⁵Nauli Yesu, “Iko idemi au mampopearo tomate, hai au mepatuwo. Tauna au mepoinalai Iriko, nauri matemohe, ina tuwo hulehe.

²⁶Hai ope-ope tauna au molambi katuwo hangko i pepoinalainda Iriko, barahe ina mate hawe i hae-haena. Ba Nupoinalai au Kuuli ide?”

²⁷Nauli Marta, “Io, Pue, kupoinalai kaOionami Datu Topehompo, Anana Pue Ala au ina mai i dunia.”

²⁸Karoona manguli nodo, laomi i sou mokakio Maria, halaluna, hai nakaneni nauliangaa, “Indolou ara Guru, Napeinao mampohidupaako!”

²⁹Kanahadina Maria lolitana, hoholiga mpuumi lao mampohidupaa Yesu.

³⁰I tempo iti, Yesu bara mani mesua i lalu boea, ara mani i pohidupaanda hai Marta inona.

³¹To Yahudi au maihe mepalindo i lalu sou, moitahe Maria hoholiga padu, rauli, “Ia lao moteria i talumba!” Ido hai meula worihe.

³²Hawemi Maria i pengkarooangaana Yesu inona, moitami Yesu hai laomi molingkudu i lindoNa, nauliangaa, “Pue, ane keindeKo i tempo iti, adingku kebara ina mate.”

³³Yesu moita Maria moteria hai to Yahudi au napohimbelaa moteria wori, ido hai wiora mpuu laluNa.

³⁴Napekune, Nauli, “Iumba ratawu?” Rauli, “Pue, maiKo lao tapeita.”

³⁵Teriami Yesu.[13]

³⁶Rauli to Yahudi, “Peita! Maahi mpuu laluNa i Lasaru!”

³⁷Agaiana ara worihe au manguli, “Tauna au bilo Napakaoha. Moapari pane Ia bara mopakaoha Lasaru dati mate?”

³⁸Hangko inditi, tetambaimi kawiorana Yesu, pane laomi i talumba. (Talumba iti, iami kalolu au rakae i tabingke bulu au ratuko hai watu mahile.)

³⁹Nauli Yesu, “Nibungkahimi watu petukona iti!” Marta, halaluna tomate iti, manguli, “Pue, ineemi rabungkahi. Bangkami, lawi ibami wengina ratawu.”

⁴⁰Nauli Yesu i Marta, “Bara pae Kuuliangaamoko inona, ane nupoinalaiNa, ina nuita mpuu kamahilena kuasana Pue Ala?”

⁴¹Roo indo, rabungkahimi watu petuko talumbana. Mengoami Yesu i langi, Nauli, “UmaNgku, Kuuli ngkaia kamaroana Irio, lawi Nuhadimi perapiNgku.

⁴²Kuisa, batena Nupehadingi liliu lolitaNgku. Agaiana lolitaNgku ide Kuuli masisimbuku bona rahadi tauna bosa inde bona rapoinalai kaOiona mpuumi au motuduNa.”

⁴³Roo indo, nauli Yesu masisimbuku, “Lasaru! Mesuwumoko mai!”

⁴⁴Mesuwu mpuumi tauna au mate iti hangko i lalu talumbana. Taiena hai bitina tebungkuhi mani hai bana popebungkuhina, hai waana tetolombungi mani moula ada to Yahudi. Nauliangaahe Yesu, “Bungkahi pebungkuhina bona maroa polumaona.”

⁴⁵Bosahe to Yahudi au mai mosondaki Maria i tempo ido, moita apa au nababehi Yesu. Hai bosahe au mepoinalai Iria.

⁴⁶Agaiana ara worihe hanggaa au lao i toParisi mopahawehe apa au nababehi Yesu iti.

⁴⁷Ido hai toParisi hai kapala-kapala tadulako mpenomba mopaaramohe pogombo mahile hihimbela hai tadulako agama au ntanina, rauli, “Apa au hangangaa tababehi? Nipeita! Ngkaiami tanda kuasa au Nababehi tauna iti.

⁴⁸Ane tapogiangaa liliu, ope-ope tauna ina mepoinalaihe Iria. Kahopoana, surodado to Roma ina maihe mogero Souna Pue Ala hai ope-ope boeanta.”

⁴⁹Roo indo, mololitami hadua hangko i olonda au rahanga Kayapas, Tadulako Mpenomba Mahile i pare iti, nauli, “Bara niisa apa-apa!

⁵⁰Bara pae niisa apa au mobundu irikamu. Aginami hadua tauna mate mopahuru tauna bosa, pane boeanta ragero ope-ope.”

⁵¹Lolita iti nawei Pue Ala iria, lawi ia Tadulako Mpenomba Mahile i tempo iti. Nodemi tunggaiana pololitana Kayapas: Yesu hangangaa rapapate. Agaiana ara wori lempona au karompakana, au bara naisa, iami kapatena Yesu mopahuru to Yahudi.

⁵²Hai bara pea to Yahudi. Anti kapatena Yesu iti, ope-ope anana Pue Ala au mahawu-hawu i humalele dunia ina ragulu hai rapahintuwuhe.

⁵³Mepongka alo iti, tadulakonda to Yahudi mohawamohe bona Yesu rapapate.

⁵⁴Ido hai Yesu barapi mampatongawa i olonda to Yahudi bona datipi raita tauna bosa. Padumi Yesu hangko inditi lao i boea au rahanga Epraim i wiwi pada wungi. Maidami inditi hihimbela hai topeguruNa.

⁵⁵I tempo iti, hungkumi alo mahile agama Yahudi au rauli Alo Posusa Pasa. Hangko damani alo mahile iti, bosa tauna hangko i boea-boeana lao i Yerusale bona mobahoihe watanda moula ada agamanda.

⁵⁶Tauna au mogulu i Yerusale iti mohaoki liliuhe Yesu. Tanganda mogulu i Souna Pue Ala, mombekune-kunehe, rauli, “Noumba pelambiami? Kira-kira ba mai Yesu i posusa ide?”

⁵⁷Nodo lolitanda tauna bosa, lawi kapala-kapala tadulako mpenomba hai toParisi mampopesuwumohe parenta i tauna bosa au manguli, “Hema-hemakau au moisa kaiumbana Yesu, hangangaa niuliangaangkai bona rahaka.”