Read Napu Yohane 13 Bible Online

Yohane 13 - Napu bible

Yohane 13

¹Hangalo hangko damani hawe Alo Posusa Pasa, naisami Yesu kaina hawenami tempoNa mopalehi dunia hai mesule i UmaNa. Ia mampokaahihe ope-ope tauna au meula Iria, hai batena Napokaahihe duuna i kahopoana.

²Kaindi iti Yesu hai topeguruNa maande sambelahe. I tempo iti, Datu Tokadake mokaleami laluna Yudasi anana Simo Iskariot bona mampobalu Yesu.

³Agaiana naisa Yesu kanaweiNami UmaNa ope-ope kuasa. Naisa wori Ia hangko i Pue Ala, hai ina mesule hule i Pue Ala.

⁴Ido hai meangkami, mowosui kumbaNa, hai mangala komo Naweweha i pekoNa.

⁵Roo indo, mokando owai i loia, pane mepongkami mobahoi bitinda topeguruNa, Naumpahi hai komo au i pekoNa.

⁶Hawemi i Simo Peturu, nauli Peturu, “Pue, noumba pane Oiori mobahoi bitingku?”

⁷Nauli Yesu, “Ide-ide, bara mani nuisa apa au Kubabehi, agaiana i alo au ina mai, hangko nuisari.”

⁸Nauli Peturu, “Inee, Pue! IneeKo hawe mobahoi bitingku.” Nauli Yesu, “Ane barako Kubahoi, barako mohintuwu hai Iko.”

⁹Nauli Simo Peturu, “Ane nodo Pue, inee bitingku pea agaiana taiengku hai waangku wori.”

¹⁰Nauli Yesu, “Tauna au mendoimi, barapi kedai, barapi paraluu rabahoi hule. Batena pearai bitina au hangangaa rabahoi. Ikamu, tebahoimokau, agaiana barakau ope-ope.”

¹¹Yesu mololita nodo, lawi Naisa ami kahemana au ina mampobalu wataNa. Ido hai Nauli, “Tebahoimokau, agaiana barakau ope-ope.”

¹²Karoona Yesu mobahoi bitinda, Napake hulemi kumbaNa, hai mohuda, pane Nauliangaahe, “Ba niisa lempona apa au hangko Kubabehiakau?

¹³NikakioNa Guru hai Pue. Lolitami iti tou, lawi tou mpuu Ikomi Guru hai Pue.

¹⁴Iko, Ampumi hai Gurumi, mobagomoNa nodo hadua hawi mobahoi bitimi. Mewali, ikamu wori hangangaa mombebahoi mpobitikau.

¹⁵Kupopaitaakau pandiri ide inona bona apa au Kubabehi nipeulai. Iko motulungikau, mewali ikamu wori hangangaa motulungi worikau rangami.

¹⁶Tou mpuu lolitaNgku ide: hadua hawi bara meliu karabilana hangko i ampuna. Hadua tudua bara meliu karabilana hangko i tauna au metudu.

¹⁷Ane niisa hai nipeulai paturo ide, ina morasikau.

¹⁸Apa au Kupololita inona, barakau nakanai ope-ope. Hema-hema au Kupilei Kuisa, amimi poampena. Agaiana hangangaa tepabukei apa au teuki i lalu Sura Malelaha au manguli: ‘Hadua tauna au maande hihimbela hai Iko, ia au ina mampoiwaliNa.’

¹⁹Ide Kupahawea amimokau hangko damani mewali bona ane mewalimi, ina nipoinalai ‘Ikomi au rauli IKO ARA’.[17]

²⁰Tou mpuu lolitaNgku ide: hema au modoko tuduaNgku, himbelami Iko au nadoko. Nodo wori, hema au modokoNa, himbelami Pue Ala au nadoko lawi Ia au motuduNa.”

²¹Karoona Yesu mololita nodo, wiorami laluna, hai Nauli, “Tou mpuu lolitaNgku ide: hadua hangko irikamu ina mampobaluNa.”

²²Anti kawulinda topeguruNa, mombetototokimohe lawi bara raisa kahemana au Natunggai.

²³Ara hadua topeguruNa au Napokakaia, mohuda i holaNa.[18]

²⁴Simo Peturu mokinde tauna iti, nauliangaa, “Nupekune i Guru, ba hema au Natunggai.”

²⁵Ido hai topeguruNa au mohuda i holaNa Yesu iti membalili hai mekune Iria, “Hema, Pue?”

²⁶Mehana Yesu, nauli, “Hema au Kutandongia roti au Kutubuka i lalu mangko ide, iami taunana.” Naalami hambise roti, Natubuka i lalu mangko iti, hai Nawei Yudasi, anana Simo Iskariot.

²⁷Kanadokona Yudasi roti iti, mesuami Datu Tokadake i laluna. Roo indo, nauliangaa Yesu, “Apa au ina nubabehi, nubabehimi holiga.”

²⁸Ranganahe au maande sambela hai ia, barahe moisa tunggaiana Yesu mololita nodo i Yudasi.

²⁹Hanggaahe mampehangu Yesu motudu Yudasi lao moholo apa au raparaluu i posusanda, ba mowei doi i tauna au meahi-ahi, lawi Yudasi topamboli doi.

³⁰Kanadokona Yudasi roti iti, padumi lao i raoa. I tempo iti, kaindimi.

³¹Kapaduna Yudasi, mololitami Yesu, nauli, “Ide-ide Ana Manusia ina rapomahile. Hai apa au ina mewali Iriko, ina mopakahile wori Pue Ala.

³²Hai ane apa au mewali Iriko mopakahile Pue Ala, Pue Ala ina mopamahile woriNa hai kuasaNa. Au Kupololita ide ina holiga pewalina.

³³AnaNgku, barapoNa mahae hihimbela hai ikamu. Ina nihaokiNa, agaiana nodo au Kuuliangaamohe tadulakonda to Yahudi hangkoia, nodo wori Kuuliangaakau: i kalaoaNgku barakau peisa hawe.

³⁴Kuweikau hawa au wou: mombepokaahimokau. Hangangaa mombepokaahikau nodo kaKupokaahimi.

³⁵Ane mombepokaahikau, ina raisa ope-ope tauna ikamu topeguruNgkukau.”

³⁶Simo Peturu mekune i Yesu nauli, “Pue, ina laoKo iumba?” Nahanai Yesu nauli, “I kalaoaNgku, bara maniko peisa lao. I alo au ina mai, hangko peisaNa nuula.”

³⁷Mekune mbuli Peturu, nauli, “Pue, moapari barana peisa meula Irio ide-ide? Pebaina mate anti peulangku Irio!”

³⁸Nauli Yesu, “Pebai mpuuko pae mate anti peulamu Iriko? Tou lolitaNgku ide: Bona nuisa, hangko damani motuturua manu wengi ide, talumi belana nusapuakaNa.”