Read Napu Yohane 14 Bible Online

Yohane 14 - Napu bible

Yohane 14

¹Yesu mololita i topeguruNa, nauli, “Inee bata-bata lalumi! Mepoinalaimokau i Pue Ala, hai mepoinalai worikau Iriko.

²I souna UmaNgku, ngkaia paidaa. Ane kebara, barakau ina Kuuliangaa nodo, lawi laoNa mopasilolongaakau paidaami.

³Ane roomoNa mopasilolonga paidaami, ina mesule huleNa maikau Kuala, bona iumba pea kaaraaNgku, inditi worikau hihimbela hai Iko.

⁴Iumba kalaoaNgku niisami rarana.”

⁵Nauli Tomas, “Pue, bara wongkamia kiisa iumba kalaoaMu. Mewali, noumba kakiisana rarana?”

⁶Nauli Yesu, “Ikomi rara, Ikomi au mopahawe paturo au tou, hai Ikomi au moweikau katuwo au bara mokahopoa. Bara ara hadua au peisa hawe i UmaNgku, ane bara mepoinalai Iriko.

⁷Ane niisaNa, niisa wori UmaNgku. Mepongka ide-ide, niisami hai niitami.”

⁸Nauli Pilipu, “Pue, Nutudungiangkai UmaMu. Iti pea au kiperapi.”

⁹Nauli Yesu, “Bara maniNa pae nuisa, Pilipu? Mahaemoke hihimbela! Hema au moitaNa, moita wori UmaNgku. Mewali, moapari hai nuperapi bona Kutudungiakau UmaNgku?

¹⁰Bara mani pae nupoinalai Iko mohintuwuNa hai UmaNgku nodo wori UmaNgku mohintuwu hai Iko? Apa au Kuuliangaakau ide, bara Kuuli moula peundeaKu. UmaNgku mohintuwu hai Iko, Ia au mobago liliu i lalu katuwoNgku.

¹¹Nipoinalaimide: Iko mohintuwuNa hai UmaNgku nodo wori UmaNgku mohintuwu hai Iko. Nauri baraNa nipoinalai hangko i lolitangKu, agaiana hangangaa nipoinalaiNa lawi niitami hinangka au Kubabehi.

¹²Tou mpuu lolitaNgku ide: tauna au mepoinalai Iriko, peisahe mobabehi nodo au Kubabehi, ba melumburi hangko i apa au Kubabehi, lawi ina laomoNa i UmaNgku.

¹³Mewali, apa au niperapi anti pepoinalaimi Iriko, ina Kubabehi, bona apa au Kubabehi iti mampomahile UmaNgku.

¹⁴Apa pea au niperapi anti pepoinalaimi Iriko, ina Kubabehi.”

¹⁵“Ane nipokaahiNa, manoto nipeulai hawaNgku.

¹⁶Ina kuperapi i UmaNgku bona Naweikau hadua Topetulungi au ntanina bona Ia mamporangaikau hawe i hae-haena.

¹⁷Topetulungi iti, iami Inaona Pue Ala au moninikau i paturo au tou. Tauna au bara mepoinalai, barahe peisa modoko Inaona Pue Ala, lawi bara raita hai bara raisa. Agaiana ikamu, niisami, lawi Naporangaimokau ide-ide, hai ina maida i lalumi.

¹⁸Barakau ina Kupalehi nodo ana toilu. Ina mai huleNa irikamu.

¹⁹Hampalai pearai, barapoNa ina raita tauna i dunia. Agaiana ikamu, ina niitaNa hai ina tuwokau, lawi Iko, tuwoNa.

²⁰Ane hawe tempo iti, ina niisa Iko mohintuwuNa hai UmaNgku, hai ikamu mohintuwukau hai Iko, nodo wori Iko mohintuwu hai ikamu.

²¹Tauna au modoko hai moula hawaNgku, ia au mampokaahiNa. UmaNgku mampokaahi tauna au mampokaahiNa, hai Iko wori mampokaahi tauna iti, hai Kupatongawaa wataNgku.”

²²Yudasi (bara Yudasi Iskariot) mekune i Yesu, nauli, “Pue, moapa hai irikami peaKo mopatongawa wataMu, bara i ope-ope tauna au i dunia?”

²³Nauli Yesu, “Tauna au mampokaahiNa mampeulaihe lolitaNgku. Ihirami au napokaahi UmaNgku. UmaNgku hai Iko ina mai i tauna iti hai maidaNgkai irihira.

²⁴Tauna au bara maahi Iriko, barahe moula lolitaNgku. Lolita au nihadi hangko Iriko, katouana bara hangko Iriko, agaiana hangko i UmaNgku au motuduNa.

²⁵Ope-ope ide Kuuliangaamokau i tempoKu mani inde hihimbela hai ikamu.

²⁶Agaiana Topetulungi au natudu mai UmaNgku mewali pahuruna wataNgku, iami Inao Malelaha, Ia ina mopaturoakau hinangkana hai Napopaingaakau ope-ope au Kuuliangaamokau.

²⁷Katinda lalu au hangko Iriko Kuwoliakau. Katinda lalu au hangko Iriko Kuweikau. Au Kuweikau ide, bara nodo au naweikau dunia. Inee karao inaomi, hai ineekau langa.

²⁸Nihadimi lolitaNgku inona au manguli: ‘Ina paduNa, hai ina mesule huleNa irikamu.’ Ane nipokaahi mpuuNa, hangangaa nipokatana wori kalaoNgku i UmaNgku, lawi UmaNgku meliu kamahilena tuwoNa pane Iko.

²⁹Ide Kuuliangaa amimokau hangko damani mewali bona ane mewali, ina nipoinalai.

³⁰Barapi ngkaia katepakaNgku mololita hai ikamu, lawi ina hawemi Datu Tokadake. Ia au mokuasai dunia ide, agaiana bara makuasa Iriko.

³¹Agaiana hinangkana ide hangangaa mewali bona ope-ope tauna ina moisa kaKupokaahina UmaNgku hai kaKupeulaina liliu ope-ope au NahawaaNa. Maimokau, padumoke hangko inde.”