Read Napu Yohane 15 Bible Online

Yohane 15 - Napu bible

Yohane 15

¹Tanganda molumao, mololitami Yesu, nauli, “Iko idemi patoa anggoro au tou, hai UmaNgku iami topokadipura anggoro.

²Ope-ope daa au tuwo Iriko au bara mowua, Nakadiri. Hai ope-ope daa au tuwo Iriko au mowua, Napakabaa hai Nakadipura bona tetambai powuana.

³Ikamu, malelahamokau anti pohadimi lolita au Kuuliangaakau.

⁴Mohintuwu liliumokau hai Iko, hai Iko wori ina mohintuwu hai ikamu. Daa au bara mentaka i patoa anggoro, bara mowua. Batena pea daa au mentaka i patoana ina mowua. Nodo wori ikamu: barakau peisa mowua ane barakau mohintuwu liliu hai Iko.

⁵Ikomi patoa anggoro, hai ikamumi pengana. Tauna au mohintuwu liliu hai Iko, hai Iko mohintuwu hai ihira, rumihi powuanda.[19] Agaiana ane megaakikau hangko Iriko, barakau peisa mobabehi apa-apa.

⁶Hema au bara mohintuwu liliu hai Iko batenda ratende, nodo karatendena daa au rabohoki duuna mewali bangi. Daa iti, ragulu hai rahuwe.

⁷Ane mohintuwu liliukau hai Iko hai lolitaNgku nipailalu liliu, niperapimi i Pue Ala ba apa peundeami, batena Naweikau.

⁸Ane rumihi powuami, UmaNgku rapomahile. Ane nodo nibabehi, topeguruNgku mpuumokau.

⁹Nodo UmaNgku mampokaahiNa, Iko wori mampokaahikau. Hangangaa tuwo liliukau i lalu ahiNgku.

¹⁰Iko mampeulaiNa hawana UmaNgku hai tuwo liliuna i lalu ahiNa. Nodo wori, ane nipeulai hawaNgku, ina tuwo liliukau i lalu ahiNgku.

¹¹Ope-ope ide Kuuliangaakau bona kamatanaNgku ara irikamu, hai bona buke kamatanami.

¹²Idemi hawaNgku: mombepokaahimokau, nodo kaKupokaahimi.

¹³Bara ara ahi au meliu kamahilena hangko i ahina hadua tauna au mohuhu tuwona bona himadana tehorema.

¹⁴HimadaNgkumokau ope-ope, ane nibabehi apa au Kuhawaakau.

¹⁵Barapokau Kuuli hawiNgku, lawi hadua hawi bara moisa apa au i laluna ampuna. Ide-ide, himadaNgku mpuumokau, lawi Kupahaweamokau ope-ope au nauliangaaNa UmaNgku.

¹⁶Bara ikamu au mopileiNa. Ikori au mopileikau. Kutudukau mowua; hai wua pobagomi iti bara ina matanta, ina mobundu hawe i hae-haena. Mewali, apa au niperapi i UmaNgku i lalu hangaNgku, batena Naweikau.

¹⁷Idemi hawaNgku irikamu: hangangaa mombepokaahikau!”

¹⁸“Ane rakahihikau tauna au bara mepoinalai Iriko, nikatuinao: IorumoNa rakahihi.

¹⁹Ane rapana, hamporangaakau hai tauna au bara mepoinalai, batena rapokaahikau, lawi rangandakau. Agaiana Kupileimokau hai Kupatanikau hangko i olonda, alana barapokau raporanga. Ido hai rakahihikau.

²⁰Nikatuinao apa au Kuuliangaakau inona: hadua hawi bara meliu karabilana hangko i ampuna. Mewali ane Iko rapopeahi-ahi, ikamu wori ina rapopeahi-ahi. Ane arahe tauna au moula lolitaNgku, batenda mampeulai wori lolitami.

²¹Ope-ope iti ina rababehiakau anti peulami Iriko lawi barahe moisa Pue Ala au motuduNa.

²²Ane kebaraNa mai mopaturohe, kebara worihe masala. Agaiana, lawi mai mpuumoNa mopaturohe, ido hai barapi ara rara mosapuaka kamasalanda.

²³Tauna au mokahihiNa, mokahihi worihe UmaNgku.

²⁴I olonda tauna bosa, Kubabehi tanda kuasa au bara mani rababehi tauna ntanina. Ane kebara Kubabehi nodo, kebarahe masala. Agaiana i karaitana apa au Kubabehi, ihira mokahihi liliuNa, hai UmaNgku rakahihi wori.

²⁵Agaiana batena nodo bona tepabukei apa au teuki i lalu Sura Aturanda au manguli: ‘Nauri bara ara salaNgku, rakahihiNa.’

²⁶Ina mai Inao Malelaha, lempona Inao au mesuwu hangko i Pue Ala hai au moninikau i paturo au tou. Ia Topetulungi au ina Kutudu mai irikamu au hangko i UmaNgku. Ane mai, Ia ina mosabi kana Iriko.

²⁷Hai ikamu wori hangangaa mewali sabiNgku, lawi ikamumi au hihimbela hai Iko hangko i pepongkana bagoNgku i dunia ide.”