Read Napu Yohane 16 Bible Online

Yohane 16 - Napu bible

Yohane 16

¹“Ope-ope ide Kuuliangaakau bona dati tekabaha pepoinalaimi Iriko.

²Ina rawurakau hangko i sou penombaa. Hai bara iti pea, agaiana hambela tempo ane tauna mopapatekau, ina rauli, itimi peundeana Pue Ala.

³Ope-ope iti ina rababehi irikamu, lawi barahe moisa UmaNgku, hai Iko wori, baraNa raisa.

⁴Kuuliangaakau iti bona ane mewali, ina nikatuinao apa au Kuuliangaamokau.” “Ope-ope paturo ide barakau Kuuliangaa hangko i nguru-nguruna, lawi inde maniNa hihimbela hai ikamu.

⁵Agaiana ide-ide, ina laomoNa i UmaNgku au motuduNa, hai barakau ara hadua au mekune Iriko ba iumba kalaoaNgku.

⁶Masusa lalumi i kanihadina lolitaNgku inona au mouli kaina paduNgku.

⁷Agaiana katouana, ina molambikau roa ane paduNa! Lawi ane baraNa padu, bara ina hawe Topetulungi. Agaiana ane paduNa, ina Kutudu Topetulungi iti mai irikamu.

⁸Ane hawe Inao Malelaha, Ia au ina mopatongawa kamadosana manusia, kamanotoNgku hai pehukuna Pue Ala.

⁹Ia ina mopakanoto kamadosanda tauna, lawi barahe mepoinalai Iriko.

¹⁰Ia ina mopatongawa kamanotoNgku, lawi ina laomoNa i UmaNgku, hai barapoNa niita.

¹¹Hai Ia ina mopakanoto wori kanahukunda Pue Ala tauna au madosa, lawi Datu Tokadake au mokuasai dunia ide rahukumi.

¹²Ngkaia mani au Kupeinao Kuuliangaakau, agaiana ide-ide bara mani nibuku modoko ope-ope.

¹³Ane hawe Inao Malelaha, Ia au ina moninikau hai mampopaisaakau ope-ope paturo au tou. Ia bara mololita moula peundeaNa. Apa au Nahadi hangko i UmaNgku, iti au Napololita. Hai Ia ina mopahaweakau apa au mewali i alo au ina mai.

¹⁴Ia ina mampopeawaNa, lawi lolita au Nadoko hangko Iriko, itimi au Napahaweakau.

¹⁵Ope-ope au ara i UmaNgku, ara wori Iriko. Ido hai Kuuli apa au nadoko Inao Malelaha hangko Iriko, itimi au Napahaweakau.”

¹⁶Nauli mbuli Yesu, “Hampalai pearai, barapoNa ina niita. Hampalai pearai wori, ina niita suleNa.”

¹⁷Wulimohe topeguruNa, hai arahe au mombekune-kune, rauli, “Apa tunggaiaNa pane Nauliangaake, ‘Hampalai pearai, barapoNa ina niita. Hampalai pearai wori, ina niita suleNa’? Hai apa wori tunggaiaNa pane Nauli, ‘LaoNa i UmaNgku’?”

¹⁸Mombekune-kune liliuhe, rauli, “Moapa hai Nauli liliu: ‘Hampalai pearai’? Bara taisa lempona.”

¹⁹Naisa Yesu karapeinaona mekune Iria. Ido hai Nauliangaahe, “Ba ia lolitaNgku inona au manguli, ‘Hampalai pearai, barapoNa ina niita. Hampalai pearai wori, ina niita suleNa’

²⁰Tou mpuu lolitaNgku ide: ina moteriakau, agaiana tauna au bara mepoinalai Iriko, matana-tanahe. Ina masusa lalumi, agaiana kamasusana lalumi iti ina tebaliki mewali kamatanami.

²¹Kamatanami iti, ina nodo kamatana au nalambi hadua towawine au weta moana. Nguru-nguruna mantodiha, lawi nodomi tempona moana. Agaiana ane mesupami anana, towawine iti barapi mokatuinao pantodihana, anti kamatanana lawi hadua anangkoi mesupami i dunia.

²²Nodo wori ikamu: ide-ide masusa lalumi lawi ina paduNa. Agaiana ina Kupohidupaa hulekau. I tempo iti, ina matana hulekau, hai bara ara au peisa moala kamatana iti hangko irikamu.

²³I tempo iti, barapokau paraluu mekune ba merapi apa-apa Iriko. Tou mpuu lolitaNgku ide apa pea au niperapi i UmaNgku i lalu hangaNgku, batena mpuukau Nawei.

²⁴Duuna ide-ide, bara manikau merapi apa-apa i lalu hangaNgku. Perapimide, hai ina nihumba bona buke ntepuu kamatanami.”

²⁵“Ope-ope ide Kupololitami irikamu hai ngkora pandiri. Agaiana hambela tempo barapoNa mopake ngkora pandiri. Ina Kupololitaakau kana i UmaNgku i katotongawaana.

²⁶I tempo iti, ina merapikau i UmaNgku i lalu hangaNgku. Barapi paraluu Kuperapiakau apa au niparaluu i UmaNgku,

²⁷lawi Napokaahi worikau UmaNgku. Ia mampokaahikau, lawi nipokaahiNa, hai nipoinalai hangko i Pue AlaNa.

²⁸MeangkaNa hangko i UmaNgku maiNa i dunia ide. Ide-ide, ina Kupalehimi dunia ide, hai mesuleNa i UmaNgku.”

²⁹Rauli topeguruNa, “Pue, ide-ide tongawami apa au Nupololita, lawi barapoKo mopake ngkora pandiri.

³⁰Ide-ide kipoinalaimi Oio moisa hinangkana. Barapi paraluu kipetandakaKo. Ide-ide kipoinalai mpuu hangko i Pue AlaKo.”

³¹Nauli Yesu, “Tou pae mepoinalaikau ide-ide?

³²Nikatuinao! Ina hawe tempona hai katouana hawemi tempo iti, ina nipalehina melangkakau hadua-hadua lao i soumi. Katouana bara haduduaNgku, lawi naporangaiNa UmaNgku.

³³Ope-ope ide Kuuliangaamokau bona molambikau katinda lalu hangko i pohintuwumi hai Iko. Tangami mani i dunia ide, batemi rapopeahi-ahi. Agaiana nipakaroho lalumi, lawi kuasa tokadake au ara i lalu i dunia ide Kunangimi.”