Read Napu Yohane 18 Bible Online

Yohane 18 - Napu bible

Yohane 18

¹Karoona Yesu mekakae, meangkami hai topeguruNa lao i raoa wanua. Mowetamohe lembo Kidron lao i bonde au ntanda i orupena.

²(Yudasi, au mampobalu Yesu, moisa kaiumbana bonde iti, lawi Yesu hai topeguruNa dokohe mogulu inditi.)

³Mewali laomi Yudasi i bonde iti hihimbela hai hamporangaa surodadonda to Roma hai topokampai Souna Pue Ala au rapohawaahe kapala-kapala tadulako mpenomba hai toParisi lao mohaka Yesu. Moantihe parewa pombeala, lantera hai hulu.

⁴Naisa Yesu ope-ope au hangangaa mewali i wataNa. Ido hai laomi mampohidupaahe tauna iti, Napekune, “Hema nihaoki?”

⁵Rauli, “Yesu to Nasare.” Nauli Yesu, “Ikomi.” (Yudasi, au mampobalu Yesu, meangka inditi hihimbela hai ihira.)

⁶I kanauliangaanda Yesu, “Ikomi dide,” mousulimohe hai madungkahe.

⁷Napekune mbuli Yesu, “Hema nihaoki?” Rauli, “Yesu to Nasare.”

⁸Nauli Yesu, “Kuulimi inona, Ikomi dide. Mewali, ane Iko au nihaoki, nipogiangaahe ide rangaNgku padu.”

⁹(Nauli nodo bona tepabukeimi apa au Nauli i lalu pekakaeNa inona, “Hangko i ope-ope tauna au NuweimoNa, bara ara hadua au matanta.”)

¹⁰Hangko indo, Simo Peturu mowuka pihona mobata hadua hawina Tadulako Mpenomba Mahile, kana talinga koanana pane maingihi. (Hangana hawi iti, Malkus.)

¹¹Nauli Yesu i Peturu, “Pusa hule pihomu! Ba nupehangu Kupousulia kapari au Napakanotoa amimoNa UmaNgku?”[21]

¹²Hangko inditi, surodadonda to Roma hai tadulakonda, hai topekampai au ratudu tadulakonda to Yahudi, laomohe mohaka Yesu. Ia rahilu

¹³hai nguru-nguruna raanti lao i Hanas, pengantina Kayapas. Kayapas iami Tadulako Mpenomba Mahile i pare iti.

¹⁴(Kayapas itimi au mouliangaahe tadulakonda to Yahudi hangkoia, “Aginami hadua tauna mate mopahuru ope-ope tauna.”)

¹⁵Simo Peturu hai hadua topeguruna Yesu au ntanina meulahe i Yesu. Topeguruna Yesu au hadua iti, hampombekaisangana Tadulako Mpenomba Mahile. Mewali, topeguruNa iti mesuami hihimbela hai Yesu i tabangaa souna Tadulako Mpenomba Mahile.

¹⁶Peturu mepegia pea i raoa baba. Hangko inditi, topeguruna Yesu au hadua iti, lao hulemi i raoa mololita i towawine au mokampai baba, ido hai Peturu rapaliu mesua i lalu hihimbela hai ia.

¹⁷Towawine topokampai baba iti mekune i Peturu, nauli, “Bara pae oio wori hadua topeguruNa tauna olou?” Nasapuaka Peturu, Nauli, “Bara!”

¹⁸Tempo iti, tempo makuli. Mewali, bahangkia hawi hai topekampai mopatuwomohe api i tabangaa, hai meangkahe motoleliki api mamindu. Peturu meangka wori hihimbela hai ihira mamindu.

¹⁹I lalu sou iti, Tadulako Mpenomba Mahile[22] mekunemi i Yesu, nauli, “Hema hahahe topeguruMu? Apa au Nupaturoahe tauna?”

²⁰Nauli Yesu, “MololitaNa i katou-touana i ope-ope tauna. Mepaturo liliuNa iumba pea sou penombaa hai i Souna Pue Ala, au paka rapoteruhui to Yahudi. BaraNa hambela mepaguru ngkabuni.

²¹Mewali, moapari hai nupekuneNa nodo? Nupekunemi i tauna au mohadimohe pepaguruNgku. Hangangaa raisa mpuu apa au Kuuli.”

²²Kanaulina Yesu nodo, hadua topekampai au meangka i holaNa mohapa lindoNa Yesu, nauli, “Bai mpuuKo mololita nodo i Tadulako Mpenomba Mahile!”

²³Nauli Yesu, “Ane lolitangku iti masala, nuuli peami inde apa kamasalana. Agaiana ane au Kupololita iti tou, moapari hai nuhapaNa?”

²⁴Hangko inditi, Hanas motuduhe topekampai moanti Yesu lao i Tadulako Mpenomba Mahile Kayapas. I tempo iti, taiena Yesu tehilu mani.

²⁵Tangana mani Simo Peturu meangka mamindu hihimbela hai topekampai, arahe tauna mekune iria, rauli, “Barato woriko pae topeguruNa tauna olou?” Agaiana Peturu mesapu mbuli, nauli, “Bara wongkoia iko!”

²⁶Inditi ara wori hadua hawina Tadulako Mpenomba Mahile. Hawi iti halaluna tauna au nabata Peturu talingana. Nauli hawi iti i Peturu, “Bara pae oio au kuita i bonde iti inona hihimbelako hai Yesu?”

²⁷Mesapu mbulimi Peturu, nauli, “Bara!” I tempo iti, motuturuami manu.

²⁸Madondo-dondo, Yesu raanti hangko i souna Kayapas lao i souna gubernur. Tadulakonda to Yahudi, barahe mesua i lalu souna gubernur datihe mewali kedai moula atura agamanda, lawi gubernur iti bara to Yahudi. Hai ane mesuahe i lalu souna, barahe peisa moande paande Pasa.

²⁹Mewali, Gubernur Pilatu laomi i raoa mampohidupaahe hai napekunehe, “Apa au nisalaia tauna ide?”

³⁰Rahanai, rauli, “Ane rapana ia bara tauna au kadake, kebara kianti i Gubernur.”

³¹Nauli Pilatu, “Nialami hai nianti hule! Nibotusimi kara-karaNa moula atura agamami!” Rauli to Yahudi iti, “Ikami, barangkai rapaliu mohuku mate tauna.”

³²(Ide mewali bona tepabukei apa au nauli Yesu kana i kapateNa.[23])

³³Hangko inditi, Pilatu mesua hulemi i lalu sou, hai natudumohe taunana moanti Yesu i lindona, hai napekune, “Tou pae datundako to Yahudi?”

³⁴Nauli Yesu, “Pekunemu iti, ba hangko irio haduduamu, ba nuhadi pea hangko i tauna ntanina?”

³⁵Nauli Pilatu, “Iko barana to Yahudi! Hangka to YahudiMu hai kapala-kapala tadulako mpenomba au moantiKo mai iriko. Sala apari au Nubabehi?”

³⁶Nauli Yesu, “Iko, baraNa nodo datu au moparenta i dunia ide. Ane kenodoNa datu i dunia ide, tauna au meula Iriko kehangangaa meewahe bona ineeNa rahaka hai rahuhu i tadulakonda to Yahudi. Agaiana baraNa datu au hangko i dunia ide.”

³⁷Nauli mbuli Pilatu, “Ane nodo, tou mpuu pae datuKo?” Nauli Yesu, “Nodo au nuuli Iko ide datuNa. Ido hai rapoanakaNa i dunia ide bona mopahaweNa apa au tou. Tauna au naunde moula apa au tou, mampehadingihe lolitaNgku.”

³⁸Nahanai Pilatu, “Apari lempona lolitaMu au manguli ‘apa au tou’?” Roo indo, lao mbulimi Pilatu i raoa mouliangaahe tadulakonda to Yahudi, “Nauri hampaka salaNa, bara ara kulambi.

³⁹Agaiana, moula au biasa rababehi, pare-parena i Alo Posusa Pasa, kukabahaakau hadua toratarunggu, ba hema peundeami. Mewali, noumba? Ba niunde ane kukabahaakau datunda to Yahudi ide?”

⁴⁰Monganga-ngangamohe, rauli, “Inee, inee Ia! Aginari Baraba!” (Baraba iti, hadua au moewa topoparenta.)