Read Napu Yohane 19 Bible Online

Yohane 19 - Napu bible

Yohane 19

¹Roo indo, Pilatu motuduhe surodadona bona Yesu raala hai rakakandangi[24].

²Surodado iti mobabehihe hambua songko kadatua au modui, hai rasongkoia Yesu. Roo indo, rabadui hai badu au malentoro nodo badu datu.

³Motumpamohe i lindoNa, rauliangaa, “KibilaKo, datunda to Yahudi!” Roo indo, rahapami lindoNa.

⁴Hangko inditi, mesuwu mbulimi Pilatu lao i raoa, mouliangaahe tadulakonda to Yahudi, “Peita, kuanti mai irikamu bona niisa kadana kulambi salaNa nauri hampaka.”

⁵Hangko inditi, raantimi Yesu i raoa, mesongko dui hai mebadu badu au malei malelentoro nodo badu datu. Nauli Pilatu, “Nipeita tauna ide!”

⁶I temponda kapala-kapala tadulako mpenomba hai topekampai moita Yesu, mongangamohe, rauli, “Papate! Papate i kau mombehape!” Nauli Pilatu, “Ane nipeinao mopaku i kau mombehape, nialamide! Ikamu au hangangaa mopaku i kau mombehape, lawi bara kulambi salaNa.”

⁷Rauli tadulakonda to Yahudi, “Moula atura agamangki, Ia hangangaa rahuku mate, lawi Nauli kaIana Anana Pue Ala.”

⁸Kanahadina Pilatu lolita iti, tetambaimi kalangana.

⁹Ido hai motudumi surodado moanti hule Yesu i lalu sou. Mesua womi Pilatu, hai mekune mbuli i Yesu, nauli, “Oio hangko iumbaKo?” Agaiana Yesu bara mehana.

¹⁰Nauli mbuli Pilatu, “BaraKo pae mau mohanaina? Bara pae Nuisa, iko makuasana mokabahaKo ba mohukuKo i kau mombehape!”

¹¹Nauli Yesu, “Ane barako nawei Pue Ala kuasa iti, bara ara kuasamu Iriko. Mewali, hema au mohuhuNa irio, meliu kamahilena dosana hangko irio.”

¹²Mepongka indo, Pilatu mohaoki rara bona mokabaha Yesu. Agaiana monganga mbulimohe tadulakonda to Yahudi, rauli, “Ane nukabaha, barako rangana Kaisar![25] Yesu iti mouli kaIana datu, mewali Ia moewa Kaisar!”

¹³Kanahadina Pilatu lolitanda, moantimi Yesu lao i raoa. Roo indo, mohudami i pohudaa pobotusia i hambua paidaa au rahanga Lanta Watu. (I lalu basanda to Yahudi hangana Gabata.)

¹⁴I tempo iti, ina pualomi, hangalo hangko damani Alo Posusa Pasa. Pilatu mouliangaahe tadulakonda to Yahudi, “Peita datumi!”

¹⁵Monganga-ngangamohe, rauli, “Papate! Papate! Papate i kau mombehape!” Nauli Pilatu, “Nipopepaku pae i kau mombehape ide datumi?” Rahanai kapala-kapala tadulako mpenomba, “Kaisar pea datungki.”

¹⁶Kahopoana Pilatu mohuhu Yesu irihira bona rapaku i kau. Hangko inditi, surodado

¹⁷mopari-parihe Yesu motalondo kau mombehape lao i raoa wanua hawe i Bulu Banga waa. (I lalu basanda to Yahudi hangana Golgota.)

¹⁸Inditimi Yesu rapaku i kau mombehape. Ara wori rodua tauna ntanina au rapaku i kau mombehape hihimbela hai Ia, hadua ntanda i kabeoNa, hadua ntanda i koanaNa.

¹⁹Pilatu motudu surodadona mopataka pata i kau popakuana Yesu au rapoukii: YESU TO NASARE, DATUNDA TO YAHUDI.

²⁰Uki iti rauki i lalu talu pakana basa: basanda to Yahudi, basanda to Roma, hai basanda to Yunani. Bosa to Yahudi mobasa uki i pata iti, lawi popakuana Yesu hungku i wanua.[26]

²¹Mewali, kapala-kapala tadulako mpenomba mouliangaa Pilatu, “Inee rauki: Datunda to Yahudi! Agina rauki: ‘Tauna ide mouli kaIana datunda to Yahudi.’ ”

²²Nauli Pilatu, “Apa au kuuki, bara ina kubaliki!”

²³Karoonda surodado mopaku Yesu, moalamohe apa au napake Yesu rakira iba hadua hampaka.[27] Moala worihe KumbaNa, kumba iti bara ara podaloana, lawi ratanu bona mewali hantau bana.

²⁴Ido hai mohawamohe, rauli, “Kumba ide inee taboho-boho, agina motendeke dadu mopakanoto hema au molambi.” Iti mewali bona tepabukei apa au teukimi i lalu Sura Malelaha hangkoia au manguli: “HampiKu raala hai rakira-kira. Au molambi kumbaKu rapakanoto hai dadu.” Mewali, apa au rababehi surodado iti mopabukei apa au teukimi hangkoia.

²⁵Hungku i popakuana Yesu, meangkami inana hai hadua halaluna inana au towawine. Ara wori Maria towawinena Klopas, hai Maria Magdalena.

²⁶Kanaitana Yesu inaNa meangka inditi i holana topeguruNa au Napokakaia, Ia mouliangaa inaNa, “Ina, itimi anamu.”

²⁷Hai Nauliangaa mbuli topeguruNa iti, “Itimi inamu.” Mepongka indo, topeguruNa iti mokadipurami inana Yesu i souna.

²⁸Naisa Yesu hinangka tunggaiaNa mai i dunia hopomi pane mololitami, Nauli, “MangkadouNa” bona tepabukei apa au teukimi i lalu Sura Malelaha.

²⁹Inditi, ara hamangko anggoro au mangilu. Ara tauna au lao moala lomo, raeme i anggoro au mangilu iti, rapataka i wuntu kau hisop, hai rapakana i humena Yesu.

³⁰Napeminami Yesu, pane Nauli, “Hopomi!” Roo indo, motumpa, hai opemi inaoNa.

³¹Karapakuna Yesu i kau mombehape iti mewali hangalo hangko damani Alo Pengkarooangaanda to Yahudi, hai moula palianda bara peisa ara tomate au tetoe i kau mombehape i Alo Pengkarooangaa. Apa mani lawi ina kana Posusa Pasa. Ido hai tadulakonda to Yahudi merapi i Pilatu bona torapaku itihe ratepo bitinda bona holigahe mate. Hai raperapi wori bona watanda tauna iti rataura.

³²Mewali laomohe surodado motepo bitinda torapaku i kau mombehape iti. Ioru ratepo bitina tauna au rodua au rapaku hihimbela hai Yesu.

³³Agaiana kahawenda i Yesu, raita matemi, ido hai barapi mewali ratepo bitiNa.

³⁴Agaiana ara hadua surodado au motambuku lompena Yesu hai tawalana. Karatambukuna, moilimi wahe hai owai.

³⁵Tauna au moita apa au mewali iti, iami au mopahaweakau apa au naita bona mepoinalai worikau. Lolitana ide tou, hai naisa apa au napololita ide tou.

³⁶Iti mewali bona tepabukei apa au teuki i lalu Sura Malelaha hangkoia au manguli, “Bara mpuu ara hambua buuNa au ina ratepo.”

³⁷Ara wori au teuki i lalu Sura Malelaha au manguli, “Ihira ina mampengoahe tauna au ratambuku.”

³⁸Roo indo, ara hadua tauna au rahanga Yusupu hangko i boea Arimatea. Ia mepoinalai ngkandii i Yesu, lawi mampokalanga tadulakonda to Yahudi. Kapatena Yesu, laomi Yusupu i Pilatu mamperapi watana Yesu bona ratawu. Napaliumi Pilatu, mewali laomi Yusupu mangala watana Yesu.

³⁹Ara wori hadua tauna au lao hihimbela hai Yusupu, au rahanga Nikodemus. Hangkoia Nikodemus iti au lao mohidupa hai Yesu i tanga kaindi. Laomohe rodua tauna iti mopasilolonga watana Yesu. I kalaonda, Nikodemus moanti lana mawongi, au rauli mire hai gaharu, au kamantimina ba arato pae talu pulona kilo.

⁴⁰Tauna au rodua iti mangalamohe watana Yesu, rabungkuhi bana bula au roomi rapambolii lana mawongi moula ada popatawu to Yahudi.

⁴¹Hungku i popakuana Yesu, ara halimbo bonde, hai i lalu bonde iti ara kalolu i tabingke bulu au rapasilolonga mewali talumba. Talumba iti wou mani, bara mani hambela rapopatawui.

⁴²Lawi talumba iti hungku hai barapi mahae ina mepongkami Alo Pengkarooangaa, ido hai watana Yesu hoholiga rawoli i lalu talumba iti.