Read Napu Yohane 2 Bible Online

Yohane 2 - Napu bible

Yohane 2

¹Liu rongalo hangko inditi, ara posusa petauna i boea Kana i tampo Galilea. Inana Yesu ara i posusa iti.

²Yesu hai topeguruNa rakakio worihe lao i posusa iti.

³Tanganda mosusa, nakaopeihe anggoro. Mololitami inana Yesu, i Yesu, nauli, “Opemi anggoronda.”

⁴Nauli Yesu, “Ina, apari tunggaiamu mouliangaaNa nodo? Bara mani hawe tempona Kupopaisaahe kahemaNgku.”

⁵Hangko inditi, mololita inana Yesu i topobago i posusa iti, nauli, “Apa pea au natuduakau Yesu, nibabehi!”

⁶I sou iti, ara ini mbuana gumba au mahile au rababehi hangko i watu. Gumba iti moihi owai pobahoia taie moula adanda to Yahudi. Kangkaiana ihi haogu gumba iti, ba arato pae hangatu lima pulona kati.

⁷Yesu mouliangaahe topobago iti, “Niihii gumba iti hai owai.” Raihii mpuumi hawe buke.

⁸Roo indo, Nauliangaahe, “Nitabuiki haodi, hai lao niantia topokadipura susa.” Ratabuiki mpuumi hai raanti lao i topokadipura susa.

⁹Topokadipura susa iti mampemina owai au raantia. Barapi matawaa nodo owai biasa, tebalikimi mewali anggoro. Agaiana bara naisa kahangko iumbana mai anggoro iti, au moisa batenda pea topobago. Karoona mampemina anggoro iti, mokakiomi toratauna tobalilo,

¹⁰nauliangaa, “Matama mpuu ide anggoro. Katouana moula adanta, anggoro au maroa hangangaa rapoperora ioru. Ane nahadimohe maenu, hangko rakandori au bara gaga maroa. Agaiana oio, nupaibokori anggoro au matama, hai ide-ide hangko nupopesuwuri.”

¹¹Yesu mobabehi tanda kuasa au nguru-nguruna iti i boea Kana i tampo Galilea. Hai tanda kuasa iti, Ia mopatongawa peawaNa. Roo indo, rapoinalaimi topeguruNa.

¹²Roo posusa iti, laomi Yesu i boea Kapernaum hihimbela hai inaNa, halaluNa hai topeguruNahe. Maidahe inditi bahangkia wengina.

¹³Ina hawemi tempona alo mahile agama Yahudi au rauli Alo Posusa Pasa, laomi Yesu i Yerusale.

¹⁴I tabangaa Souna Pue Ala, Naitahe tauna au mampobalu japi, dimba hai tadasi manggebodo. Ara worihe topointolohi doi au mohuda inditi i mejanda.

¹⁵Kanaitana Yesu ope-ope iti, Ia mobabehimi pekandangi hangko i koloro hai mowurahe ope-ope topobalu-balu hihimbela japinda hai dimbanda hangko i tabangaa Souna Pue Ala. Mejanda topointolohi doi Nadungka-dungkami alana mahawu doinda.

¹⁶Roo indo, mouliangaahe topobalu-balu tadasi manggebodo, “Nianti ope-ope iti lao i raoa! Souna UmaNgku inee nipopewali sou pobalu-balua!”

¹⁷TopeguruNa mokatuinao apa au teuki i lalu Sura Malelaha au manguli node: “Rumihi mpuu pokabilaiNgku SouMu Pue, itimi au mohuweki laluNgku.”

¹⁸Hangko inditi, tadulakonda to Yahudi mouliangaa Yesu, “Hema au moweiKo kuasa mobabehi iti? Ane ara mpuu kuasaMu, Nupopaitaangkai hambua tanda kuasa!”

¹⁹Nauli Yesu, “Nigero Souna Pue Ala ide, hai ina niita mpuu i lalu talu alona Kuaro hule.”

²⁰Tingkaramohe tadulakonda to Yahudi, rauli, “Noumba? Souna Pue Ala ide ibami pulona hai ini parena raaro. Agaiana Nuuli ina Nuaro hule i lalu talu pea alona!”

²¹Katouana i tempona Yesu mokabelai Souna Pue Ala, wataNa haduduaNa au natunggai.

²²I katuwona hule Yesu, topeguruNa mokatuinao lolitaNa iti. Roo indo, rapoinalaimi apa au teuki i lalu Sura Malelaha hai apa au nauli Yesu.

²³Tangana Yesu i Yerusale moula Alo Posusa Pasa, bosa tauna mepoinalai Iria, lawi moitahe tanda-tanda kuasa au Nababehi.

²⁴Agaiana barahe Napoinalai Yesu, lawi Naisa haha apa au i lalunda ope-ope tauna.

²⁵Bara paraluu rauliangaa tauna kanoumbana manusia, lawi Ia moisa laluna manusia.