Read Napu Yohane 20 Bible Online

Yohane 20 - Napu bible

Yohane 20

¹Hungku mabaa alo Minggu, laomi Maria Magdalena i talumba. Hawe inditi, liliu naita watu petuko talumba telolimi.

²Ido hai melangkami lao i Simo Peturu hai i hadua topeguruna Yesu au napokakaia, nauliangaahe, “Watana Pue raalami hangko i talumbaNa, hai bara kiisa kaiumbana rawoli!”

³Mewali laomohe Peturu hai rangana iti i talumba.

⁴Melangka sambelahe, agaiana rangana iti meliu kamagasina, ido hai ioru hawe i talumba.

⁵Napelogami, agaiana bara mani mesua. Moitami bana au rapopobungkuhi Yesu arato inditi.

⁶Roo indo hawemi, Simo Peturu hai liliu mesua. Moita worimi bana pebungkuna Yesu.

⁷Agaiana bana au rapopowewe waana Yesu, tewilolo hai tepatani hangko i bana ntani.

⁸Hangko inditi, topeguruNa au hadua, au ioru hawe i talumba inona, mesua worimi. Naitami apa au mewali i lalu talumba iti, pane napoinalai.

⁹Hawe i tempo iti, bara manihe moisa apa au teuki i lalu Sura Malelaha hangkoia au mopakanoto, “Ia hangangaa tuwo hule.”

¹⁰Roo indo, mesulemohe topeguruNa au rodua iti lao i sounda.

¹¹Agaiana Maria Magdalena meangka pea i raoa talumba, moteria liliu. Tangana moteria, ia meloga i lalu talumba.

¹²Unga pea moita rodua malaeka au mebadu bula hai mohudahe i karadampaana watana Yesu, hadua ntanda i waaNa, hai hadua ntanda i bitiNa.

¹³Mekunehe malaeka iti i Maria, rauli, “Ina, moapari pane moteriako?” Nauli Maria, “Ampuku raalami hangko inde, hai bara kuisa iumba rawoli.”

¹⁴Hangko inditi, membalilimi Maria hai moita Yesu meangka i taleuna, agaiana bara naisa kaYesunami.

¹⁵Mekunemi Yesu iria, “Ina, moapari hai moteriako? Hema au nuhaoki?” Nauli laluna Maria: ba topokampai bonde dolou. Ido hai nauliangaa, “Tua, ane Oio au mangala wataNa, Nutudungiana iumba nuwoli bona lao kuala.”

¹⁶Nauli Yesu, “Maria.” Membalilimi Maria i Yesu, hai mololita i lalu basanda to Yahudi, “Rabuni!” (Lempona, ‘Guru’.)

¹⁷Nauli Yesu i Maria, “IneeNa nukingki, lawi bara maniNa mengkaore lao i UmaNgku. Laomoko i halaluNgkuhe, nuuliangaahe ina laomona i UmaNgku hai Umamu wori, Pue AlaNgku hai Pue Ala au nipenombai.”

¹⁸Laomi Maria Magdalena mampohidupaahe topeguruna Yesu, nauli, “Kuitami Pue!” Hai napahaweamohe ope-ope au nauli Yesu.

¹⁹Kaindina i alo Minggu iti, topeguruna Yesu moguluhe i lalu sou hai ragili babana, lawi langahe i tadulakonda to Yahudi. Unga pea ara Yesu meangka i olonda, hai Natabehe, Nauli, “Roa ngkatuwo hawe irikamu.”

²⁰Roo indo, Napopaitaamohe taieNa hai lompeNa. Matana mpuu lalunda moita Ampunda.

²¹Nauli mbuli Yesu, “Katinda lalu hawe irikamu. Nodo UmaNgku motuduNa, nodo wori Iko motudukau.”

²²Roo indo, Natawuehe pane Nauli, “Nidokomi Inao Malelaha.

²³Hema au niampungi dosana, naampungi wori Pue Ala. Hema au bara niampungi dosana, bara wori naampungi Pue Ala.”

²⁴Tomas au rauli Toporopa, hadua hangko i hampulo hai rodua topeguruna Yesu, bara ara hihimbela hai rangana i kahawena Yesu nguru-nguruna.

²⁵Ido hai rauliangaa rangana, “Kiitami Pue!” Agaiana nauli Tomas, “Ane bara mani kuita hai kupetobo pepakua i taieNa, hai ane bara mani kuperera petambukua i lompeNa, bara ina kupoinalai.”

²⁶Liumi haminggu, mogulu mbulimohe topeguruna Yesu i lalu sou iti. I tempo iti, Tomas ara womi indo. Hai ope-ope baba ragilimi. Nauri nodo, unga pea Yesu ara meangka i olonda, hai mololita, Nauli, “Roa ngkatuwo hawe irikamu.”

²⁷Roo indo, Yesu mouliangaa Tomas, “peita hai nuperera pepakua au i taieNgku. Hai nupetobo wori petambukua i lompeKu. Ineemi bata-bata lalumu. Nupoinalaimi!”

²⁸Nauli Tomas, “Oiomi Ampuku hai Pue Ala au kupenombai!”

²⁹Nauli Yesu i Tomas, “Mepoinalaiko lawi nuitamoNa. Morasihe tauna au mepoinalai Iriko, kehapiri baraNa raita.”

³⁰Ngkaia mani tanda kuasa au nababehi Yesu i lindonda topeguruNa, agaiana bara ope-ope teuki i lalu sura ide.

³¹Agaiana apa au kuuki ide, kuuki bona nipoinalai kaYesunami Datu Topehompo, Anana Pue Ala, hai bona molambikau katuwo maroa au bara mokahopoa hangko i pepoinalaimi Iria.