Read Napu Yohane 3 Bible Online

Yohane 3 - Napu bible

Yohane 3

¹Ara hadua au rahanga Nikodemus. Nikodemus iti iami toParisi hai tadulako agama Yahudi.

²Hambela tempo, kaindi, ia mai mampohidupaa Yesu, hai mololita nauli, “Guru, kiisa Oio hadua guru au natuduKo mai Pue Ala, lawi bara ara tauna au peisa mobabehi tanda kuasa nodo au Nubabehi, ane bara naporangai Pue Ala.”

³Nauli Yesu, “Ane hadua tauna bara rapoanaka sule, bara peisa mewali taunana Pue Ala i lalu poparentaNa. Lolita ide tou.”

⁴Nauli Nikodemus, “Noumbami kapeisana tauna au saemi rapoanaka sule? Peisa pae mesua hule i lalu taina inana hai rapoanaka sule?”

⁵Nauli Yesu, “Ane tauna bara rapoanaka hai owai[5] hai kuasana Inaona Pue Ala, bara peisa mewali taunana Pue Ala i lalu poparentaNa. Lolitangku ide tou!

⁶Manusia molambi katuwona watana hangko i tosaena. Agaiana katuwo pepoinalaina nahumba hangko i Inao Malelaha.

⁷Mewali, inee nupotingkara ane Kuuliangaako: hangangaa rapoanaka sulekau.

⁸Pandirina, himburu mewui iumba peundeana. Tahadi pewuina, agaiana bara taisa hangko iumba kamaiana hai iumba kalaoana. Nodo wori tauna au rapoanaka sule hai kuasana Inaona Pue Ala.”

⁹Nauli Nikodemus, “Noumba iti peisa mewali?”

¹⁰Nauli Yesu, “Oio hadua gurunda to Isaraeli au raholoi. Noumbari hai bara nuisa lempona ide lolitaNgku?

¹¹Tou ide lolitangKu: Mampololitangkai apa au kiisa, mosabingkai apa au kiita. Agaiana barakau mau modoko lolitangki.

¹²Kutuntuakau apa au mewali i dunia, agaiana bara nipoinalai lolitaNgku. Apa mani ane Kutuntuakau apa au mewali i suruga.

¹³Bara ara hadua hangko i dunia ide au mengkaore lao i suruga. Batena pea Iko, Ana Manusia, au moisa apa au mewali i suruga, lawi Iko mendauluNa mai hangko i suruga.

¹⁴Hangkoia i pada wungi, to Isaraeli nahukuhe Pue Ala pane natilohe ile. Pue Ala motudu nabi Musa mobabehi ile hangko i tambaga,[6] bona nawoli i wuntu kau hai natindaka. Hema peahe au natilo ile hai mampengoahe ile tambaga iti, hangangaa maoha hai tuwohe. Mewali, nodo ile tambaga iti rapamapangka i pada wungi, nodo wori Ana Manusia hangangaa rapamapangka i kau mombehape,

¹⁵bona hema au mepoinalai Iriko ina molambi katuwo maroa au bara mokahopoa.”

¹⁶Anti kamahilena ahina Pue Ala i ope-ope tauna i dunia, ido hai Nakirami AnaNa au HaduduaNa bona hema pea au mepoinalai Iria, bara rahuku, agaiana molambi katuwo maroa au bara mokahopoa.

¹⁷Pue Ala motudu AnaNa mai i dunia bara mai mohuku manusia. Agaiana bona mai mohorema manusia hangko i huku dosanda.

¹⁸Tauna au mepoinalai i Anana Pue Ala, barahe ina rahuku. Agaiana tauna au bara mepoinalai, manotomi kanahukunda Pue Ala, lawi barahe mepoinalai i Anana Pue Ala au Haduduana.

¹⁹Idemi au rahukuahe: Baa hawemi i dunia. Agaiana manusia mounde mani kamakaindi pane kamabaa, lawi kadake babehianda.

²⁰Ope-ope tauna au mobabehi dake, mokahihihe Baa iti. Barahe mau mohungkuki Baa iti dati tongawa babehianda au kadake.

²¹Tauna au manoto babehianda, maihe i Baa bona babehianda raita hai tongawami poulanda peundeana Pue Ala.

²²Roo indo, Yesu hai topeguruNa laohe i tampo Yudea. Maidahe inditi bahangkia alona, moriu tauna.

²³I tempo iti, Yohane bara mani ratarunggu. Ia meriu i boea Ainon, bara karao hangko i boea Salim, lawi inditi handa owai. Alo-alona tauna lao mampoperiu i Yohane.

²⁵Hambela tempo, mombehehemohe bahangkia topeguruna Yohane hai hadua to Yahudi, mampombehanaingi ada mpobahoi moula agamanda.

²⁶Laomohe i Yohane, rauliangaa, “Guru, ba nukatuinao mani hangkoia hadua tauna au hihimbela hai guru ntanda i orupena owai Yarade au nutudungiangkai? Ia meriu wori, hai kabosa-bosaami tauna au lao Iria!”

²⁷Nauli Yohane, “Ikita manusia bara peisa mobabehi apa-apa ane barake nawei Pue Ala kuasa.

²⁸Hangkoia, nihadimi lolitangku au manguli: ‘Iko barana Datu Topehompo. Agaiana ratuduna moioru mai mopasilolonga raraNa.’ ”

²⁹Napaliliu Yohane lolitana, nauli, “Pandirina i posusa petauna, torabua tobalilo mewali patoa posusa lawi torabua towawine iami ampuna. Topeporangaina meangka pea i holana mampehadingi hawana, hai matana mpuu ane mohadimi lolitana toratauna tobalilo. Nodo wori iko, nodona tauna au meporangai iti, rumihi mpuu kamatanangku mohadi lolitana Yesu.

³⁰Lawi Ia au hangangaa kahile-hilea tuwoNa, hai iko au hangangaa kakoi-koia tuwongku.”

³¹Yesu hangko i suruga, mewali kuasaNa meliu hangko i hinangkana. Tauna hangko i dunia, batena manusia biasa pea, hai mampololita pea apa au mewali i dunia. Agaiana Yesu, hangko i suruga, mewali kuasaNa meliu hangko i hinangkana.

³²Ia mampololita apa au Naita hai au Nahadimi, agaiana bara ara au mampoinalai lolitaNa.

³³Tauna au mampoinalai lolitaNa, mopangaku katouna Pue Ala.

³⁴Lawi Iami au natudu Pue Ala mohowara NgkoraNa, hai Pue Ala mowei Inao Malelaha Iria au bara ara hokana.

³⁵Pue Ala Umanta mampokaahi AnaNa hai Naweimi ope-ope kuasaNa.

³⁶Tauna au mepoinalai i Anana Pue Ala iti, molambihe katuwo maroa au bara mokahopoa. Agaiana tauna au bara mengkoru i Anana Pue Ala, barahe molambi katuwo iti. Molambirihe pehukuna Pue Ala au bara mokahopoa.