Read Napu Yohane 4 Bible Online

Yohane 4 - Napu bible

Yohane 4

¹Rahadimi toParisi bambari au manguli kabosa-bosaami tauna au lao mampoperiu i Yesu, alana meliu kabosanda tauna au meula i Yesu pane tauna au meula i Yohane.

²(Katouana, bara Yesu au meriu, topeguruNari au meriu.)

³Kanaisana Yesu apa au rahadi toParisi iti, padumi hangko i tampo Yudea mesule lao i tampo Galilea.

⁴I lalu polumaoNa iti, Ia hangangaa moliu i tamponda to Samaria.

⁵I tanga pualo, hawemi i hambua wanua au ara i Samaria au rahanga Sikar, bara karao hangko i tampo au nahumba Yusupu hangkoia hangko i Yako umana. I raoa boea iti, ara hambua tibubu au rahanga tibubuna Yako. Mohudami Yesu i wiwi tibubu iti, lawi mawowemi molumao.

⁶

⁷TopeguruNa liliuhe lao i boea meholo paandenda. Bara mahae, hawemi hadua towawine to Samaria mai mantambu. Yesu mololita i towawine iti, nauli, “Ina, nuwei wongkoia owai Kuenu.”

⁸

⁹Tingkara mpuu towawine iti, lawi biasana to Yahudi bara raunde mampogaloa to Samaria. Ido hai nauli, “Oio to Yahudi, iko to Samaria. Moapari pane merapiKo owai iriko?”

¹⁰Nauli Yesu, “Ane kenuisa kamahilena pewatina Pue Ala hai hemaNa au merapi owai ide, kemerapi woriko owai Iriko, hai Kuweiko owai au mepatuwo.”

¹¹Nauli towawine iti, “Hangko iumba mai owai au Nuuli iti? PopetabuikiMu bara ara, hai tibubu ide malobu.

¹²Tibubu ide sosorangki hangko i Yako, toiorungki. Ia moenu owai hangko inde, nodo worihe anana hai binatana. Ba Nuuli meliu kamahilena tuwoMu hangko i Yako pane peisaKo moweina owai au meliu kamaroana hangko i owai tibubu ide?”

¹³Nauli Yesu, “Ope-ope tauna au moenu owai hangko i tibubu ide, mangkadou hulehe.

¹⁴Agaiana hema au moenu owai au Kuwei, barapi mangkadou hawe i hae-haena. Lawi owai au Kuwei iti, ina moili liliu i laluna; lempona, ina molambi katuwo maroa au bara mokahopoa.”

¹⁵Nauli towawine iti, “Ane nodo tua, Nuweimona owai iti bona barapona mangkadou, hai barapona paraluu mai mantambu alo-alona inde.”

¹⁶Nauli Yesu, “Laomoko hampai mokakio tobalilomu, hai mesuleko mai.”

¹⁷Nauli towawine iti, “Bara ara tobalilongku.” Nauli Yesu, “Tou lolitamu. Bara ara tobalilomu,

¹⁸lawi limami belamu motambi, hai tobalilo au nuporanga ide-ide, barato tobalilomu. Mewali, tou mpuu lolitamu inona.”

¹⁹Nauli towawine iti, “Ide-ide kuisami, Oio haduaKo nabi!

²⁰Ikami to Samaria menomba i bulu ide[7], i bulu penombaanda toiorungki. Agaiana pangulimi to Yahudi, i Yerusale pea penombaa au tou.”

²¹Nauli Yesu, “Ina, nupoinalai lolitaNgku ide: ina hawe tempona, bara i Yerusale tauna menomba i Pue Ala, hai bara wori i bulu ide.

²²Ikamu to Samaria, barato niisa kahemana au nipenombai. Ikami to Yahudi, kiisa kahemana au kipenombai, lawi ara dandina Pue Ala au manguli katehorema ina hawe hangko i to Yahudi.

²³Agaiana ina hawe tempona, hai katouana hawemi tempo iti, i lalu peninina Inao Malelaha ina moisa mpuuhe hema Pue Ala i katou-touana, hai ina menombahe Iria, moula rara mpenomba au naunde Pue Ala Umanta.

²⁴Pue Ala iami Inao. Ido hai tauna au menomba i Pue Ala, hangangaa menombahe i lalu peninina Inao Malelaha moula rara au tou.”

²⁵Nauli towawine iti, “Au kuisa, ina hawe Datu Topehompo, au rauli wori Kerisitu. Ane hawe, Iami au ina mampopaisa irikami hinangkana au ara.”

²⁶Nauli Yesu, “Ikomi Tauna iti au tangana mololita irio.”

²⁷Tangana mani Yesu mololita hai towawine iti, hawemohe topeguruNa hangko boea. Tingkarahe moita Yesu mololita hai hadua towawine. Agaiana bara ara hadua au bai mekune i towawine iti ba apa paraluuna. Bara worihe bai mekune i Yesu ba apa tunggaiaNa mololita i towawine iti.

²⁸Roo indo, towawine iti mopalehimi gumbana, pane laomi i boea mouliangaahe tauna inditi,

²⁹“Maikau, laoke mampeita hadua tauna au mampololita ope-ope babehiangku. Ba Ia mpuumi Datu Topehompo?”

³⁰Ido hai lao mpuumohe i raoa boea bona mampohidupaahe Yesu.

³¹Tangana towawine iti lao i boea, mololitamohe topeguruna Yesu, rauli, “Guru, maandemoke.”

³²Agaiana nauli Yesu, “Iriko ara paande au bara niisa.”

³³Mombekune-kunemohe topeguruNa, rauli, “Hemari au mai moantia paande?”

³⁴Ido hai nauliangaahe Yesu, “PaandeKu, iami mampeulaiNa peundeana Pue Ala au motuduNa, hai moparooNa bago au NaweiNa.

³⁵Ikamu biasa manguli node: iba mani wulana, hangko meparerike. Agaiana Kuuliangaakau: nipeitahe ohou bonde. Mabadami parena, sukanami rapepare.

³⁶Tauna au mopahawehe Ngkorana Pue Ala peisa rapandiri nodo tauna au mantuda hai au mepare. Ide-ide masilolongami saronda topepare iti, hai mepongkamohe mogulu wuana. Anti pobagonda, bosa tauna molambi katuwo maroa au bara mokahopoa. Hai kahopoana ina matana-tanahe hihimbela hai tauna au mantuda.

³⁷Mewali, tou mpuu lolita au manguli: ‘Hadua au mantuda, tohaduana au mampepare.’

³⁸Kutudukau lao mepare i bonde au bara ikamu au motudai. Tauna ntanina au mantuda, ikamu au mampepare wua pobagonda.”

³⁹Bosahe to Samaria i boea iti mepoinalai i Yesu, lawi mohadihe lolitana towawine iti inona au manguli, “Napololitami hinangka babehiangku.”

⁴⁰Mewali, laomohe mampohidupaa Yesu, hai raperapi ntepuu bona Yesu mehupe i boeanda. Ido hai Yesu maidami inditi rombengia.

⁴¹Hangko inditi, kabosa-bosaa ampu boea au mepoinalai i Yesu, lawi mohadi mpuumohe lolitaNa,

⁴²hai mololitahe i towawine iti, “Ide-ide kipoinalai mpuumi, bara pea hangko i lolitamu, agaiana lawi kihadimi lolitaNa, hai kiisa kaIana mpuumi Datu au mohorema manusia hangko i huku dosanda.”

⁴³Liumi rongalo i Samaria, Yesu mopaliliu polumaoNa lao i tampo Galilea.

⁴⁴Naulimi Yesu hangkoia, “Hadua nabi bara rabila i tampona haduduana.”

⁴⁵Agaiana kahawena Yesu i Galilea, Ia radoko ampu boea hangko i lalunda mpuu, lawi hangkoia arahe i Yerusale i tempona Yesu moula Alo Posusa Pasa, hai moita matahe ope-ope tanda kuasa au Nababehi i tempo iti.

⁴⁶I tampo Galilea iti, lao mbulimi Yesu i boea Kana, i boea pobalikiaNa owai mewali anggoro. Inditi ara hadua tauna au mobago i sou kadatua i boea Kapernaum. Anana au tobalilo tangana mahai rumihi.

⁴⁷Kanahadina tauna iti Yesu mesulemi mai i Galilea hangko i Yudea, laomi tauna iti i boea Kana mampohidupaa Yesu, nauliangaa, “Tua, ane peisa, laoke i Kapernaum, bona Nupakaohaa wongkoia anangku, lawi ina matemi.”

⁴⁸Nauli Yesu i tauna iti, “Ikamu au maida i tampo ide, ane kebarakau moita tanda kuasa, barakau ina mepoinalai!”

⁴⁹Nauli tauna iti, “Tua, holigamoke lao, hangko bara mate anangku!”

⁵⁰Nahanai Yesu, “Mesulemoko, anamu maohami.” Tauna iti mampoinalai lolitana Yesu, ido hai mesulemi.

⁵¹Tangana mani i rara, bahangkia hawina mai mampohidupaa, rauliangaa, “Anamu maohami!”

⁵²Napekunehe, “Tinti hangkia maoha?” Rauli, “Imaindi, tinti isa pualo, mengkaroomi kanapawembena.”

⁵³Nakatuinaomi tauna iti, tempona Yesu manguli, “Anamu maohami,” tempo iti womi anana maoha. Hangko indo, tauna iti mepoinalaimi i Yesu hihimbela hai ope-ope hantambiana.

⁵⁴Itimi tanda kuasa karompakana au nababehi Yesu i Galilea i kahaweNa hangko i Yudea.