Read Napu Yohane 5 Bible Online

Yohane 5 - Napu bible

Yohane 5

¹Roo indo, mesule mbulimi Yesu lao i Yerusale bona moula alo mahilenda to Yahudi inditi.

²I Yerusale hungku i babaka au rahanga “Babaka Dimba”, ara hambua wuhu; i lalu basa Ibarani hangana Betesda. Ara lima mbuana tambale au motoleliki wuhu iti.

³Bosa tomahai mogulu inditi. Arahe au bilo, au wara bitinda, hai au palu, ope-opehe maturu liliu i tambale, [mampegiahe pokalena owai.

⁴Lawi hambela-hambela ara malaekana Pue au mendaulu i wuhu iti mampopokale owai. Hai hema au ioru mendaulu i lalu wuhu i tempona owai mokale, maohami hangko i hakina.]

⁵Inditi ara hadua tobalilo au talumi pulona hai ualu parena palu.

⁶I kanaitana Yesu tauna iti maturu inditi, hai Naisa kamahaenami palu, mekunemi Yesu iria, Nauli, “Nuunde pae maoha?”

⁷Mehana topalu iti, nauli, “Tua, bara wongkoia ara au mampopendaulu i lalu wuhu i tempona owai mokale. Himbana ina mendaulu, arami au mampehindorungina.”

⁸Nauli Yesu, “Mearomoko, nulolomi alemu, hai lumaomoko.”

⁹Maoha mpuumi tauna iti, mololomi alena, hai lumaomi. Iti mewali i Alo Pengkarooangaa[8]

¹⁰Ido hai tadulakonda to Yahudi mokambaroa tauna au hangko maoha iti, rauliangaa, “Ide Alo Pengkarooangaa! Barako peisa moanti alemu.”

¹¹Nauli tauna iti, “Natuduna tauna au mopakaohana inona, Nauliangaana: ‘Nulolomi alemu hai lumaomoko.’ ”

¹²Rapekune, “Hema tauna iti au manguli irio anti alemu hai molumaomoko?”

¹³Agaiana bara naisa kahemana au mopakaoha, lawi Yesu padu ngkandii hai barapi raita i olonda tauna bosa.

¹⁴Bara mahae hangko inditi, Yesu mampohidupaa tauna iti i Souna Pue Ala, hai Nauliangaa, “Ide-ide maohamoko; ineemoko mobabehi dosa bona datiko narumpa ba apa-apa au meliu kakadakena.”

¹⁵Hangko inditi, laomi tauna iti mampohidupaahe tadulakonda to Yahudi, nauliangaahe kaYesuna au mopakaoha.

¹⁶Ido hai tadulakonda to Yahudi mohaokihe rara mopakasusa Yesu, lawi Ia mepakaoha i Alo Pengkarooangaa.

¹⁷Agaiana Nauliangaahe Yesu, “UmaNgku mobago duuna ide-ide, hai Iko wori mobago liliuNa.”

¹⁸Hangko inditi, tadulakonda to Yahudi mohaoki liliuhe rara mopapate Yesu. Mobabehihe nodo i Yesu, bara pea anti poliungiNa ada i Alo Pengkarooangaa, agaiana lawi Nauli wori Pue Ala iami UmaNa; lempona, Ia mopahimbela wataNa hai Pue Ala.

¹⁹Mewali mololitami Yesu irihira, Nauli, “Tou mpuu lolitaNgku ide: Nauri AnanaNa Pue Ala, baraNa peisa mobago moula peundeaKu haduduaNgku. Apa au Kuita Nababehi UmaNgku, batenami iti au Kupobago. Apa pea bagona UmaNgku, iti wori bagoNgku,

²⁰lawi UmaNgku mampokakaiaNa, hai NapopaitaaNa ope-ope au Nababehi. Hai ara mani bago au ina NapopaitaaNa au meliu kamahilena hangko i bago au roomi Kubabehi. Ina Kubabehi bago iti alana nipotingkara mpuu.

²¹Nodo UmaNgku mampopearo tomate hai moweihe katuwo, Iko wori mowei katuwo i hema pea moula peundeaKu.

²²UmaNgku barapi mobotusi hinangka kara-karana manusia, agaiana kuasa pebotusi iti Nahuhumi Iriko, AnaNa.

²³Ia mobabehi nodo bona rabilaNa ope-ope tauna nodo pebilanda i UmaNgku. Hema au baraNa mobila, bara worihe mobila UmaNgku au motuduNa.

²⁴Tou mpuu lolitaNgku ide: hema-hema au mampehadingi lolitaNgku hai mepoinalai i Pue Ala au motuduNa, molambihe katuwo maroa au bara mokahopoa. Barahe ina rahuku anti dosanda. Tekabahamohe hangko i kapate, hai molambihe katuwo.

²⁵Tou mpuu lolitaNgku ide: ina hawe tempona hai katouana tempo iti hawemi, tomate ina mohadi wotuna Anana Pue Ala, hai ihira au mohadi wotuNgku ina molambi katuwo au wou.

²⁶Lawi UmaNgku makuasa mopatuwo tauna. Nodo wori Iko, AnaNa, NaweiNa kuasa mopatuwo tauna.

²⁷Nawei woriNa kuasa mobotusi kara-kara manusia, lawi Iko Ana Manusia worina.

²⁸Inee nipotingkara lolitaNgku ide, lawi hambela tempo ope-ope tauna au mate ina mohadi wotuNgku, hai ina mearohe hangko i talumbanda. Tauna au mobabehi roa ina rapopearohe bona molambihe katuwo maroa. Agaiana tauna au mobabehi dake ina rapopearohe bona rahuku.”

²⁹

³⁰Yesu mopaliliu lolitaNa, Nauli, “Iko, baraNa peisa mobabehi apa-apa moula peundeaKu haduduaNgku. Kubotusi hinangkana moula apa au nahawaaNa UmaNgku. PobotusiNgku manoto, lawi baraNa moula peundeaKu haduduaNgku, agaiana moula peaNa peundeana Pue Ala au motuduNa.

³¹Ane rapana Iko pea haduduaNgku au manguli kahangko i Pue AlaNgku, bara manoto katouna lolitaNgku iti.

³²Agaiana ara au ntanina au mosabi kana Iriko, iami UmaNgku, hai Kuisa katouna posabiNa.

³³Hangkoia ikamu motudukau suromi lao i Yohane mekune kana Iriko, hai ia mosabimi kana Iriko i katou-touana.

³⁴Katouana baraNa moparaluu posabi hangko i manusia. Agaiana Kupopaingaakau lolitana Yohane iti bona molambikau katuwo maroa.

³⁵Yohane iti nodo hulo au mewangka sangka pea hai moanti baa irikamu au nipokatana mpuu, agaiana kamatanami iti sangka pea.

³⁶Agaiana Iko, ara hampaka au mopakanoto kahemaNgku, hai iti meliu hangko i posabina Yohane. Ane niita apa au Kubabehi, itimi au mopakanoto kahemaNgku. Apa au Kupobago ide-ide, iami au nahawaaNa UmaNgku bona Kupobago hawe roo. Bago iti mewali tanda au mopakanoto kaIkona au natudu UmaNgku mai i dunia ide.

³⁷Hai meliu hangko inditi, UmaNgku au motuduNa mai, Ia haduduaNa mewali sabiNgku bona mopakanoto kahemaNgku. Ikamu, bara mani hambela nihadi wotuNa, bara mani niita lenggeNa.

³⁸LolitaNa bara mantida i lalumi, lawi barakau mepoinalai Iriko au Natudu.

³⁹Moparesakau Sura Malelaha, lawi nipehangu hangko i Sura Malelaha iti nilambi katuwo maroa au bara mokahopoa. Moleri Sura Malelaha iti mololita kana Iriko.

⁴⁰Agaiana bara mani niunde mai Iriko bona molambikau katuwo maroa au bara mokahopoa.

⁴¹BaraNa mampopetoia i manusia,

⁴²agaiana ikamu, Kuisa mpuukau, kadana ara ahimi i Pue Ala.

⁴³UmaNgku au motuduNa mai, hai kuasaNgku Kulambi hangko Iria. Nauri nodo baraNa nidoko. Agaiana ane arahe au mai i lalu kuasanda haduduanda, ihirari au nidoko.

⁴⁴Noumba pepoinalaimi Iriko, ane mampeinao peakau ratoia rangami? Bara niunde mobaliki babehiami bona Pue Ala HaduduaNa motoiakau.

⁴⁵Inee nipehangu Iko au ina mosalaikau i lindona UmaNgku. Agaiana nabi Musari au ina mosalaikau, au iriakau meharunga.

⁴⁶Ane tou-toukau mepoinalai i Musa, manoto kenipoinalai woriNa, lawi apa au nauki Musa, iti mampololita kana Iriko.

⁴⁷Agaiana ane bara nipoinalai apa au nauki Musa, noumbami kanipoinalaina lolitaNgku?”