Read Napu Yohane 6 Bible Online

Yohane 6 - Napu bible

Yohane 6

¹Roo indo, laomi Yesu ntanda i orupena Rano Galilea, au rahanga wori Rano Tiberias.

²Bosa mpuu tauna au meula Iria, lawi moitamohe ope-ope tanda au Nababehi i kamopakaohaNa tomahai.

³Mempanaimi Yesu lao i tongku-tongkuna hihimbela hai topeguruNa, hai mohudahe inditi.

⁴I tempo iti, hungkumi alo mahile agama Yahudi au rahanga Alo Posusa Pasa.

⁵Natotoki Yesu mantoleli, mokoloromohe tauna bosa mai Iria. Mewali mololitami i Pilipu, Nauli, “Iumbake moholo paande, tapaandeahe tauna au node kabosanda?”

⁶(Katouana, naisato Yesu apa au ina Nababehi. Agaiana mekune nodo i Pilipu, lawi Napeinao mampetandaka pepoinalaina Pilipu.)

⁷Nahanai Pilipu, nauli, “Kehapiri rongatu doi pera tapopeholo paande hai taweihe tauna au hanode kabosanda, bara ina handa nauri haodi-haodi peahe rawei.”

⁸Roo nodo, hadua topeguruna Yesu au rahanga Andaria, adina Simo Peturu, mololita, nauli,

⁹“Inde ara hadua anangkoi tobalilo au mebaku lima oguna roti hai rombaa ikane, agaiana apa pae pobunduana i tauna bosa ide?”

¹⁰Nauli Yesu, “Popohudahe!” Mohuda mpuumohe, hai mohudahe i tumu hehi. Kabosanda tauna iti, ba aratohe pae lima sabuna tobalilo, bara mani teimba towawine hai anangkoi.

¹¹Hangko inditi, Yesu moalami roti, Napekakaea, hai rakira-kiraahe tauna bosa au tanganda mohuda. Nodo wori kaNababehina i ikane. Maandemohe ope-ope duunda mabuhu.

¹²Mabuhu hahamohe, mololitami Yesu i topeguruNa, Nauli, “Nigulu pentarana bona dati mangkahakei.”

¹³Ragulu mpuumi pentarana hangko i lima oguna roti au raande tauna bosa inona, hampulo mani hai rombingka.

¹⁴Karaitana tauna bosa tanda kuasa iti, mololitamohe hadua hai hadua, rauli, “Ia mpuumi nabi au radandi hangkoia, au rauli ina mai i dunia!”

¹⁵Mewali, arami tunggaianda mopari-pari Yesu mewali datunda. Kanaisana Yesu tunggaianda, padumi Ia hangko inditi lao i tongku-tongkuna mampasadudua.

¹⁶Kalumbami, mendaulumohe topeguruna Yesu lao i rano mampegia kahawena Yesu.

¹⁷Duuna ina kaindimi Yesu bara mani teduu. Mewali, moduangamohe lao monontohi boea Kapernaum.

¹⁸Tanganda moduanga, hawemi himburu kebuu, alana mahilemi balumbana.

¹⁹Moduangamohe, lima ba inimi pae kilo kakaraona, moitamohe Yesu molumao i wongko owai monontohihe. Tingkarahe.

²⁰Agaiana nauli Yesu irihira, “Ineekau langa! Ikoto dide.”

²¹Kamohadinda wotuna Yesu, matanamohe hai rakakiomi mesawi i lalu duanganda. Pesawina Yesu i lalu duanga, unga peahe hawe i wiwi rano au ratunggai.

²²Kahalona, tauna bosa au ara manihe ntanda i orupena rano mohaoki Yesu, rauli, “Iumbami Yesu? Ia bara moduanga hihimbela hai topeguruNa imaindi. Bara wori ara duanga ntanina inde, batena pea duanga au rapesawii topeguruNa.”

²³Roo indo, hawemohe tauna moduanga hangko i wanua Tiberias, hai mesorehe hungku i paandea tauna bosa moande roti au nawati Pue Yesu.

²⁴Karaisana tauna bosa, Yesu barapi ara inditi hai topeguruNa wori barapohe ara, moduangamohe lao rahaoki i Kapernaum.

²⁵Kahawenda tauna bosa ntanda i orupena rano, mampohidupaamohe Yesu hai mekunehe, rauli, “Guru! ImpiraKo hawe inde?”

²⁶Mehana Yesu, “Tou mpuu lolitaNgku ide: Kuisa apa tunggaiami mohaokiNa. NihaokiNa lawi mabuhumokau Kupaande, bara anti poisami lempona tanda au Kubabehi.

²⁷Ineekau mobago mohaoki paande au hampalai pea kaopena hai au polo mawai. Agaiana mobagokau mohaoki paande au bara peisa mawai hai au moweikau katuwo maroa au bara mokahopoa. Iko Ana Manusia au ina moweikau paande iti, lawi Ikomi au Napilei Pue Ala hai au Napokatana.”

²⁸Mekunehe tauna bosa, rauli, “Apa au hangangaa kipobago bona pobagongki moula peundeana Pue Ala?”

²⁹Nauli Yesu, “Mepoinalaikau Iriko au NatuduNa mai. Itimi bago au naunde Pue Ala.”

³⁰Rauli mbuli tauna bosa, “Ane nodo, tanda apa au Nupopaitaangkai bona kipoinalai kahangko i Pue Alana mpuuKo? Apa au ina Nubabehi?

³¹Toiorungki hangkoia moandemohe manna i pada wungi, nodo au teuki i Sura Malelaha: ‘Naweimohe moande roti au hangko i suruga.’ ”

³²Nauli Yesu, “Tou mpuu lolitaNgku ide: bara nabi Musa au moweikau paande hangko i suruga. UmaNgkuri au moweikau paande au tou-tou hangko i suruga.

³³Paande au naweikau Pue Ala, iami, Ia au mendaulu mai hangko i suruga hai au mowei katuwo i manusia i dunia.”

³⁴Rauliangaa tauna bosa, “Ane nodo, wei wongkamia paande iti alo-alona!”

³⁵Nauli Yesu, “Iko idemi paande au mepatuwo. Hema au mai Iriko hai mepoinalai Iriko, barapohe ina marimi hai barapohe ina mangkadou hawe i hae-haena.

³⁶Agaiana, nodo au Kuuli inona, kehapiri moitamokau tanda au Kubabehi, bara maniNa nipoinalai.

³⁷Ope-ope tauna au naweimoNa UmaNgku, batenda mai Iriko. Hai hema pea au mai Iriko, batena Kudoko hai bara Kusapuaka.

³⁸Lawi kamaiNgku hangko i suruga, baraNa mobabehi peundeaKu haduduaNgku. Agaiana maiNa mobabehi peundeana Pue Ala au motuduNa.

³⁹Idemi peundeaNa: bona hangko i ope-ope tauna au NaweiNa, inee ara hadua au matanta, agaiana ina Kupopearohe ope-ope hangko i kapate i alo pebotusi.

⁴⁰Idemi peundeana UmaNgku: bona ope-ope tauna au moitaNa hai au mepoinalai Iriko AnaNa, ina molambihe katuwo maroa au bara mokahopoa, hai ina Kupopearohe i alo pebotusi.”

⁴¹Hangko inditi, mohume-humemohe tadulakonda to Yahudi, lawi nauli Yesu, Iami paande au mendaulu mai hangko i suruga.

⁴²Mololitamohe, hadua hai hadua, rauli, “Bara pae Yesu iti, anana pea Yusupu? InaNa hai umaNa taisahe. Moapari hai Nauli kahangko i surugaNa mai?”

⁴³Nauliangaahe Yesu, “Ineekau mohume-hume.

⁴⁴Bara ara hadua au peisa mai Iriko, ane bara nakakio UmaNgku au motuduNa. Hai hema pea au mai Iriko ina Kupopearo hangko i kapate i alo pebotusi.

⁴⁵I lalu sura nabi-nabi hangkoia teuki node: ‘Pue Ala ina mopaguru ope-ope topeulaNa.’ Mewali, ope-ope tauna au mohadi hai modoko paturona UmaNgku, batena ina maihe Iriko.

⁴⁶Agaiana inee nipehangu arami tauna au moita UmaNgku. Batena pea Iko au moita, lawi Iko hangko i Pue Ala.

⁴⁷Tou lolitaNgku ide: hema au mepoinalai Iriko, molambihe katuwo maroa au bara mokahopoa.

⁴⁸Ikomi paande au moweikau katuwo.

⁴⁹Toiorumi hangkoia i pada wungi, moandemohe paande au rahanga manna, hai mateto worihe.

⁵⁰Agaiana idemi paande au tou-tou, au mendaulu mai hangko i suruga. Hema pea au moande paande ide, barahe ina mate.

⁵¹Ikomi paande au mendaulu mai hangko i suruga, paande au mepatuwo! Tauna au moande paande ide molambihe katuwo au bara mokahopoa. Paande au mepatuwo ide, lempona wataNgku au Kukira bona manusia molambi katuwo.”

⁵²Karahadina tadulakonda to Yahudi lolitana Yesu iti, mombehanaimohe hadua hai hadua, rauli, “Noumba kapeisaNa mokira ontoNa irikita bona taande?”

⁵³Ido hai Nauliangaahe, “Tou mpuu lolitaNgku ide: ane barakau moande onto Ana Manusia, hai barakau moenu waheNa, barakau ina molambi katuwo au bara mokahopoa.

⁵⁴Tauna au moande ontoKu hai moenu waheNgku, ina molambihe katuwo maroa au bara mokahopoa, hai ina Kupopearohe hangko i kapate i alo pebotusi,

⁵⁵lawi ontoKu tou-tou mpuu paande, hai waheNgku tou-tou mpuu paenu.

⁵⁶Tauna au moande ontoKu hai moenu waheNgku, ina mohintuwu liliuhe hai Iko, nodo wori Iko irihira.

⁵⁷UmaNgku au motuduNa, Iami pongkana katuwo, hai Iko tuwo hangko Iria. Nodo wori tauna au maande ontoKu, molambihe katuwo hangko Iriko.

⁵⁸Itimi paande au mendaulu hangko i suruga. Paande iti bara nodo manna au raande toiorumi hangkoia. Naurihe maande manna iti, batenda mate. Agaiana tauna au moande paande ide, ina tuwohe hawe i hae-haena.”

⁵⁹Ope-ope iti Napahawe Yesu i tempona mepaguru i sou penombaa i Kapernaum.

⁶⁰Kamohadinda lolitana Yesu, bosahe topeulaNa au manguli, “Mapari mpuu paturo iti. Hema pae au peisa mampeulai?”

⁶¹Agaiana naisari Yesu pohume-humenda. Ido hai Nauliangaahe, “Inee mpuu pae humpuri inaomi mohadi paturoNgku inona.

⁶²Ane nodo, noumbami ane moitakau Ana Manusia mengkaore lao i paidaaNa nguru-nguruna?

⁶³Inaonami Pue Ala au mowei katuwo. Kamaroho manusia bara mobundu. Lolita au Kupahaweakau mesuwu hangko i Inaona Pue Ala hai katuwo.

⁶⁴Nauri nodo, ara manihe hanggaa i olomi au bara mepoinalai.” (Yesu manguli nodo lawi Naisami hangko i nguru-nguruna kahemanda au bara ina mepoinalai Iria, hai Naisa worimi kahemana au ina mampobalu wataNa.)

⁶⁵Nauli mbuli Yesu, “Ido hai Kuuli inona, bara ara hadua au peisa mai Iriko ane bara anti kanatulunginda UmaNgku.”

⁶⁶Mepongka i tempo iti, bosahe topeulana Yesu mousuli. Barapi raunde meula Iria.

⁶⁷Mewali, mekunemi Yesu i topeguruNa au hampulo hai rodua, Nauli, “Ba ina nipalehi woriNa?”

⁶⁸Mehana Simo Peturu, nauli, “Ane kipalehiKo Pue, i hemamongkai lao? Oio pea au mohowara lolita au mopaara katuwo maroa hawe i hae-haena.

⁶⁹Ikami, kipoinalaimi hai kiisa kaOiona mpuu Suro au malelaha hangko i Pue Ala.”

⁷⁰Nauli Yesu, “Bara pae Ikoto au mopileikau au hampulo hai rodua ide? Agaiana hadua i olomi iami tokadake.”

⁷¹Au natunggai Yesu iami Yudasi anana Simo Iskariot. Lawi nauri Yudasi mewali hadua hangko i hampulo hai rodua topeguruNa, agaiana iami au ina mampobalu Yesu.