Read Napu Yohane 7 Bible Online

Yohane 7 - Napu bible

Yohane 7

¹Roo indo, Yesu lao i humalele tampo Galilea. Barapi mau lao i tampo Yudea, lawi arahe tadulakonda to Yahudi inditi au mampeinao mopapate.

²I tempo iti, hungkumi alo mahilenda to Yahudi au rauli Posusa Bambaru.

³Ido hai rauli halaluna Yesu Iria, “Ineeko inde liliu! LaomoKo i Yudea bona topeulaMu moita tanda kuasa au Nubabehi.

⁴BaraKo ina mewali tauna mahile ane inde liliu peaKo. Ane mobabehiKo tanda kuasa, hangangaa Nupopaitaarihe ope-ope tauna!”

⁵Mololitahe nodo lawi bara worihe mepoinalai Iria.

⁶Mewali nahanaihe Yesu, Nauli, “Bara mani hawe tempona mopatongawaNa wataNgku. Ane ikamu, impira pea niunde lao i Yerusale peisa,

⁷lawi bara ara tauna au mokahihikau. Agaiana Iko, rakahihiNa tauna au kadake i dunia ide, lawi Kupakanotoahe kakadakena babehianda.

⁸Laokau ikamu i posusa iti. Iko, bara maniNa lao, lawi bara mani hawe tempoKu.”

⁹Nodomi lolitana Yesu i halaluNa, hai maida liliu mani i Galilea.

¹⁰Lao mpuumohe halaluna Yesu i Yerusale bona moulahe Posusa Bambaru. Kapadunda, meula ngkandiimi Yesu haduduaNa bona dati raisa tauna bosa.

¹¹I posusaa iti, tadulakonda to Yahudi mohaoki liliu Yesu, rauli, “Iumbami tauna iti?”

¹²Mombekakanenimohe tauna bosa inditi. Arahe au manguli, “Ia tauna maroa.” Hantanga wori manguli, “Bara! Ia mopakanawo pea tauna bosa!”

¹³Agaiana bara ara hadua au bai mololita totongawa kana i Yesu, lawi mampokalangahe tadulakonda to Yahudi.

¹⁴I tanga mposusa iti, Yesu mesua i lalu Souna Pue Ala, hai mepongkami mepaguru.

¹⁵Tingkarahe to Yahudi mohadi lolitana Yesu, rauli, “Noumba pane Naisa ope-ope au teuki i lalu Sura Malelaha, lawi Ia bara mapangka posikolaNa?”

¹⁶Nauliangaahe Yesu, “Au Kupaguruakau, bara hangko Iriko, agaiana hangko i Pue Ala au motuduNa.

¹⁷Hema au mampeinao mobabehi peundeana Pue Ala ina raisa kahangko iumbana lolitaNgku ide, ba hangko i Pue Ala mpuu ba lolitaNgkuto pea haduduaNgku.

¹⁸Tauna au mopahawe paturona haduduana, mohaoki pea bona ratoia. Agaiana tauna au mohaoki bona hema au motuduna ratoia, manotomi tauna iti bara modongko.

¹⁹Nabi Musa hangkoia moweikau Aturana Pue Ala. Agaiana barakau ara hadua au mampeulai Atura iti. Moapa hai nipeinaoNa nipapate?”

²⁰Rauli tauna bosa, “Ba napesuangiKo pae! Hemari au mampeinao mopapateKo?”

²¹Nauli Yesu, “Mopakaoha topeaNa hadua tauna i Alo Pengkarooangaa, nipotingkarami.

²²Agaiana ikamu, mobagoto worikau i Alo Pengkarooangaa ane motilekau anami au hangangaa ratile i alo iti, datikau moliungi atura mpetile au napaturoakau Musa hangkoia. (Katouana ada mpetile iti arami hangko damani Musa.)

²³Mewali, ane metilekau i Alo Pengkarooangaa datikau moliungi Aturana Musa, moapari hai nikarumpuiNa ane mopakaohaNa tauna i Alo Pengkarooangaa bona maroa watana?

²⁴Ineekau mosalai rangami moula pea apa au niita, agaiana hangangaa nibotusi i kanoto-notoana.”

²⁵Karahadina ampu wanua Yerusale lolitana Yesu iti, wulimohe. Arahe au manguli, “Bara pae tauna itimi au rahaoki tadulakonta bona rapapate?

²⁶Peita, olouto mepaturo hai bara ara kalangaNa, hai bara ara au mokambaroa. Inee mpuu pae raisami tadulakonta kaIana Datu Topehompo?

²⁷Agaiana bara hintoto ane Ia Datu Topehompo, lawi taisato kahangko iumbaNa mai. Ane hawe mpuu Datu Topehompo au radandi hangkoia, bara ara au ina moisa kahangko iumbaNa mai.”

²⁸Mewali, tangana Yesu mepaguru i lalu Souna Pue Ala, mololitami masisimbuku, Nauli, “Niisa kahemaNgku hai kahangko iumbaKu. Agaiana maiNa bara anti peundeaKu haduduaNgku; maiNa moula peundeana UmaNgku au motuduNa mai. Iami au hintoto rapoinalai. Agaiana ikamu, Ia bara niisa.

²⁹Iko, Kuisa lawi hangko IriaNa mai, hai Iami au motuduNa.”

³⁰I tempo iti, rapeinaomi mohaka Yesu, agaiana bara ara au bai mokingki, lawi bara mani hawe tempoNa.

³¹Agaiana arahe bosa tauna i olonda au mepoinalai Iria, rauli, “Datu Topehompo mpuu, lawi ngkaiami tanda kuasa au Nababehi.”

³²Arahe bahangkia toParisi au mohadi pombekakaneninda tauna bosa kana i Yesu. Ido hai ihira hai kapala-kapala tadulako mpenomba motudumohe bahangkia topokampai Souna Pue Ala lao mohaka Yesu.

³³I tempo iti, Yesu tangana mololita i tauna bosa, Nauli, “BarapoNa mahae hihimbela hai ikamu, ina mesuleNa lao Iria au motuduNa.

³⁴Ina nihaokiNa, agaiana barapoNa nilambi, lawi i kalaoaNgku barakau ina peisa hawe.”

³⁵Wulimohe tadulakonda to Yahudi mohadi lolitaNa, hai mombekune-kunemohe, rauli, “Ina laori wei iumba pane Nauli barapi talambi? Ba ina lao i tampo ntanina maida hihimbela hai to Yahudi au mampogaloahe to Yunani bona mopaguruhe to Yunani inditi?

³⁶Hai apa lempona lolitaNa au manguli, ina tahaoki agaiana bara talambi, hai i kalaoNa barake ina peisa hawe?”

³⁷Alo kahopoa posusa iti iami alo au meliu karapomahilena. I alo iti, meangkami Yesu i lalu Souna Pue Ala, hai mololita masisimbuku, Nauli, “Hema au mangkadou, maimokau maenu Iriko!

³⁸Mepoinalaimokau Iriko bona tepabukei irikamu apa au teuki i lalu Sura Malelaha au manguli: hangko i lalunda, ina moili owai au mepatuwo.”

³⁹(Au natunggai lolitana Yesu iami Inao Malelaha, au ina mendaulu i tauna au mepoinalai Iria. I tempona Yesu mololita nodo, Inao Malelaha bara mani mendaulu i topeulaNa, lawi Yesu bara mani rapopeawa.)

⁴⁰Tauna bosa au mohadi lolitana Yesu, arahe hanggaa au manguli, “Ia mpuumi Nabi au nadandi Pue Ala hangkoia.”

⁴¹Hanggaa worihe manguli, “Ia idemi Datu Topehompo!” Agaiana ara worihe au manguli, “Ia to Galilea! Datu Topehompo bara mai mesupa hangko i Galilea.

⁴²Bara pae i lalu Sura Malelaha teuki node: Datu Topehompo iami pemuleana Datu Daudi au hangko i boea Beteleme, boea pesupaana Daudi?”

⁴³Ido hai mombehanaimohe tauna bosa. Hanggaahe mepoinalai i Yesu, hanggaahe bara.

⁴⁴Arahe au mampeinao mohaka, agaiana bara ara au bai mokingki.

⁴⁵Topokampai Souna Pue Ala au ratudu mohaka Yesu mesulemohe lao i toParisi hai i kapala-kapala tadulako mpenomba. Barahe mewali mohaka Yesu. Mekunehe tadulako iti irihira, rauli, “Moapari hai bara nihaka hai nianti mai?”

⁴⁶Rahanai, “Lawi bara mani ara kihadi tauna au mololita nodo Ia!”

⁴⁷Mehanahe toParisi iti, rauli, “Ba Naakalangi worimokau?

⁴⁸Peita ane ara hadua tadulakonta ba toParisi au mepoinalai i Yesu!

⁴⁹Batena pea tauna bosa au mepoinalai Iria, lawi barahe moisa paturona Musa. Hararamohe!”

⁵⁰Roo indo, mololita worimi hadua toParisi au rahanga Nikodemus. Nikodemus iti, hambelami mampombelambia Yesu. Nauli Nikodemus i hangka rangana:

⁵¹“Moula aturanta, barake peisa mohuku hadua tauna ane bara mani rapehadingi notona hai raparesa babehiana.”

⁵²Mehanahe rangana, rauli, “Ba to Galilea woriko! Nuwile hai nuparesa i lalu Sura Malelaha. Bara ara nabi au mesupa hangko i Galilea.”

⁵³[Roo indo, mesulemohe hadua-hadua lao i sounda.