Read Napu Yohane 8 Bible Online

Yohane 8 - Napu bible

Yohane 8

²Kahalona madondo-dondo, lao mbulimi Yesu i Souna Pue Ala. Maimi rahungkuki tauna bosa, hai mohudami Ia mepaguru i tabangaa Souna Pue Ala.

³Tangana Yesu mepaturo, hawemohe guru agama hai toParisi moanti hadua towawine au ralambi tonto mokara-kara, rapopeangka i olonda tauna bosa.

⁴Hai mololitahe i Yesu, rauli, “Guru, towawine ide ralambi tonto mokara-kara!

⁵I lalu Aturana Musa, ara parenta au manguli: towawine au mobabehi nodo hangangaa rawatui duuna mate. Mewali Oio, noumba pelambiaMu?”

⁶Tunggaiana pampekunenda iti, mohaoki peahe kamanawona lolitana Yesu bona rasalai. Agaiana Yesu, bara mehana. Motumpa pea mouki i tampo hai karaweNa.

⁷Mekune liliuhe tadulakonda to Yahudi Iria, ido hai mengowami Yesu, hai mololita, Nauli, “Hema i olomi au bara madosa, iami au ioru mowatui towawine iti!”

⁸Roo indo, motumpa mbulimi, hai mouki liliu i tampo hai karaweNa.

⁹Karahadina tadulako to Yahudi lolitana Yesu iti, padu ngkandiimohe hadua-hadua, mepongka hangko i tosae hawe i au mangura. Kahopoana, opemohe padu; Yesu pearai hai towawine iti au ara indo.

¹⁰Roo indo, mengowami Yesu hai mouliangaa towawine iti, “Tauna au mosalaiko inona iumbamohe hou? Barato pae ara au mohukuko?”

¹¹Nahanai towawine iti, Nauli, “Bara ara, Pue.” Nauli Yesu, “Mewali, bara woriko Kuhuku. Mesulemoko, hai ineemoko mobabehi dosa.”][9]

¹²Roo indo, mololita mbulimi Yesu mepaturo, Nauli, “Ikomi pewangka au mopamabaa lalu manusia i humalele dunia. Tauna au meula Iriko, barahe molumao i kamakaindi. Batena molambihe kamabaa au mopaara katuwo au bara mokahopoa.”

¹³Rauli toParisi, “Bara tou lolitaMu, lawi mampololita peako wataMu haduduaMu.”

¹⁴Nauli Yesu, “Nauri mololitaNa kana i wataNgku haduduaNgku, batena tou lolitaNgku, lawi Kuisa kahangko iumbaKu mai hai Kuisa iumba kalaoaNgku. Agaiana ikamu, bara niisa kahangko iumbaKu mai hai iumba kalaoaNgku.

¹⁵Ikamu mebotusikau moula pea pekiri manusia, agaiana Iko baraNa mobotusi kara-karanda hema pea.

¹⁶Ane rapana, mobotusiNa kara-karanda tauna, pobotusiNgku batena manoto, lawi bara haduduaNgku. UmaNgku au motuduNa, Iami au mamporangaiNa.

¹⁷I lalu Sura Aturami ara teuki node, ‘Ane ara rodua sabi au himbela lolitanda, posabinda iti hangangaa rapoinalai.’

¹⁸Ara rodua sabiNgku: Iko haduduaNgku hai karoduana, iami UmaNgku au motuduNa.”

¹⁹Rapekune toParisi, “Iumba UmaMu?” Mehana Yesu, “BaraNa niisa, ido hai bara wori niisa UmaNgku. Ane rapana niisa kahemaNgku i katou-touana, keniisa wori UmaNgku.”

²⁰Ope-ope iti napahawe Yesu tangana mepaguru i tabangaa Souna Pue Ala i hola peti pambolia doi popenomba. Agaiana bara mani rahaka, lawi bara mani hawe tempoNa.

²¹Nauli mbuli Yesu i tadulakonda to Yahudi, “Ina paduNa, hai ina nihaoki liliuNa, hai matekau i lalu kamadosami lawi nisapuakamoNa. Mewali i kalaoaNgku barakau peisa hawe.”

²²Karahadina tadulakonda to Yahudi lolitaNa, mololitamohe hadua hai hadua, rauli, “Apa lempona lolitaNa inona? Ba mampeinaori pae menoo, pane Nauli barake peisa lao i kalaoaNa.”

²³Nauliangaahe Yesu, “Ikamu to i duniakau, Iko maiNa hangko i wongko. Ikamu hangko i dunia ide, Iko baraNa hangko i dunia ide.

²⁴Ido hai Kuuliangaakau inona, ina matekau i lalu kamadosami. Ane bara nipoinalai lolitaNgku au manguli Ikomi au rauli ‘IKO ARA’,[10] batena mpuukau mate i lalu kamadosami.”

²⁵Rapekune, “Katou-touana, hemaKo?” Mehana Yesu, “Roomokau Kuuliangaa hangko i nguru-nguruna!

²⁶Ngkaia mani au ina Kusalaiakau. Agaiana Ia au motuduNa, hintoto mpuu rapoinalai, hai apa au Kuhadi hangko Iria, itimi au Kupahawe irikamu i dunia.”

²⁷Au natunggai Yesu iami UmaNa i suruga, agaiana bara raisa lempona.

²⁸Ido hai Nauliangaa mbulihe, “Ane mopamapangkamokau[11] Ana Manusia, hangko niisari Ikomi au rauli ‘IKO ARA’, hai bara ara hampaka au Kubabehi moula peundeaKu. BateNgku pea mampololita apa au NapaturoaNa UmaNgku.

²⁹Hai Ia au motuduNa, mamporangai liliuNa. BaraNa Napogiangaa haduduaNgku, lawi Kubabehi liliu apa au mopamatana laluNa.”

³⁰Tangana Yesu mopahawe ope-ope iti, bosa tauna mepoinalai Iria.

³¹Mewali, mololitami Yesu i to Yudea au mepoinalai Iria, Nauli, “Ane nipeulai liliu paturoNgku, ina mewali mpuukau topeulaNgku,

³²hai ane topeulaNgku mpuumokau, ina niisa mpuu paturo au tou, alana tekabahakau hangko i karapohawimi.”

³³Mehanahe, rauli, “Ikami ide, pemuleanangkai Burahima! Barangkai hambela rapohawi. Moapari hai Nuuli ina tekabahangkai hangko i karapohawingki?”

³⁴Nauli Yesu, “Tou mpuu lolitaNgku ide: ope-ope tauna au mobabehi liliu dosa, napohawihe dosa.

³⁵Ane hawi, bara manoto kamaidana liliu i souna ampuna. Agaiana ane anana ampu sou iti, manoto kamaidana liliu inditi.

³⁶Mewali, ane Kukabahakau hangko i dosami, tekabaha mpuumokau, lawi Iko, AnanaNa Pue Ala.

³⁷Kuisa ikamu pemuleanakau Burahima. Agaiana arakau au mampeinao mopapateNa, lawi barakau modoko lolitaNgku.

³⁸Apa au kuita hangko i UmaNgku, itimi au Kuuliangaakau. Agaiana ikamu mobabehi apa au napaturoakau umami.”

³⁹Rauli to Yahudi, “Umangki iami Burahima!” Nahanai Yesu, “Ane tou-tou ananakau Burahima, moapari bara nipeulai babehiana?

⁴⁰Mopahawena paturo au tou au Kudoko hangko i Pue Ala, agaiana nipeinaoriNa nipapate! Ane Burahima, bara nodo babehiana.

⁴¹Babehiami iti batena moula babehiana wata umami!” Rahanai to Yahudi, rauli, “Agaiana ikami, barangkai ana i tampo! Umangki hadua pea, Iami Pue Ala.”

⁴²Nauli Yesu, “Ane tou-tou mpuu Pue Ala Umami, kenipokaahiNa, lawi Iko hangko i Pue AlaNa mai, hai Ikomi SuroNa. MaiNa bara moula peundeaKu haduduaNgku. Agaiana moulaNa peundeana Pue Ala, lawi Ia au motuduNa.

⁴³Apa pongkana pane bara niisa lempona lolitaNgku? Bara niisa, lawi bara nibuku mohadi lolitaNgku.

⁴⁴Umami iami Datu Tokadake! Hai nipeinao moula liliu peundeana umami iti. Hangko i nguru-nguruna ia topepapatemi. Paturona bara tou, lawi bara ara au tou iria. Ane modongko, itimi poantina, lawi ia topodongko mpuu, hai ope-ope tauna au modongko moulahe peundeana.

⁴⁵Mewali, ido hai baraNa nipoinalai, lawi mampololitaNa apa au tou.

⁴⁶Hemakau au peisa motudungiaNa kamadosaNgku? Ane mampololitaNa apa au tou, moapari hai baraNa nipoinalai?

⁴⁷Taunana Pue Ala raunde mampehadingi hai mampeulai lolitana Pue Ala. Agaiana ikamu, bara niunde mohadi hai mampeulai lolitaNgku, lawi barakau hangko i Pue Ala.”

⁴⁸Rauli to Yahudi, “Tou mpuu au kiuli! NodoKo to Samaria au napesuangi seta.”

⁴⁹Nauli Yesu, “BaraNa napesuangi seta. Iko mobilaNa UmaNgku. Agaiana ikamu, baraNa nibila.

⁵⁰BaraNa mampopetoia. Naunde Pue Ala bona rapomahileNa, hai Iami au mebotusi.

⁵¹Tou mpuu lolitaNgku ide: hema au mampeulai lolitaNgku, barahe ina mate i hae-haena.”

⁵²Rauli to Yahudi, “Ide-ide kiisa napesuangi mpuukowei! Burahima, matemi. Nodo wori ope-ope nabi hangkoia, matemohe. Agaiana Nuuliri hema au mampeulai lolitaMu barahe ina mate i hae-haena.

⁵³Ba Nuuli meliu kamahilena tuwoMu hangko i toiorunta Burahima au mahaemi mate? Ba meliu kamahilena tuwoMu hangko i ope-ope nabi au matemohe? Ane nodo lolitaMu, tuwoMu Nupahimbelari hai hema?”

⁵⁴Nauli Yesu, “Ane mengkaiwongkoNa, bara ara pobunduana. Agaiana UmaNgkumi au mopaiwongkoNa, au niuli Pue Ala au nipenombai.

⁵⁵Moleri barato niisa kahemaNa. Ane Iko, Kuisa. Ane keKuuli Ia bara Kuisa, modongkoNa nodo ikamu. Agaiana tou-tou kaKuisaNa, hai Kupeulai lolitaNa.

⁵⁶Ane Burahima toiorumi, matana laluna lawi naisa kaina naitaNgku i alo kahaweaNgku, hai naitami kahaweNgku hai matana mpuu.”

⁵⁷Rauli to Yahudi, “TinuwuMu, bara mani handa lima pulona parena. Moitamoko pae Burahima?”

⁵⁸Nauli Yesu, “Tou mpuu lolitaNgku ide: hangko damani Burahima mesupa, Iko aramoNa!”

⁵⁹Karahadina to Yahudi lolitaNa iti, motimamohe watu rapeinao mowatui Yesu. Agaiana Yesu padu ngkandii hangko i Souna Pue Ala hai barapi raita.