Read Napu Yohane 9 Bible Online

Yohane 9 - Napu bible

Yohane 9

¹Tangana Yesu molumao, moitami hadua tauna au bilo hangko i pesupaana peami.

²Mekunehe topeguruNa Iria, “Guru, moapari tauna iti hai bilori hangko i pesupaana? Anti kamadosana haduduana, ba anti dosanda tosaena?”

³Mehana Yesu, Nauli, “Bara anti dosana haduduana, hai bara wori anti dosanda tosaena. Ide mewali bona kuasana Pue Ala rapatongawa iria.

⁴Hangangaa tapopolumao bagona Pue Ala au motuduNa, liana mani mabaa. Tempo kaindi ina hawemi, hai ane kaindimi barapi ara tauna au peisa mobago.

⁵TangaNgku mani i dunia, Ikomi pewangka au mopamabaa lalu manusia i humalele dunia.”

⁶Karoona Yesu mololita nodo, motinudumi i tampo. TinuduNa Nagalo hai tampo bona mewali reta, pane Napoporirohi matana tobilo iti.

⁷Roo indo, Nauliangaa, “Laomoko mewawalindo i Wuhu Siloam.” (“Siloam” iti, lempona ‘ratudu’.) Lao mpuumi mewawalindo, hai i pesulena, meitami.

⁸Hangko inditi, hintonggina hai tauna au biasa moita ia merapi-rapi, mombekune-kunehe, rauli, “Hemari dolou? Bara pae ia tobilo au biasa mohuda merapi-rapi?”

⁹Ara au manguli, “Iami diti!” Ara wori hanggaa au manguli, “Bara. Kahimbelanato pea lenggenda.” Agaiana tobilo iti mololita, nauli, “Ikomi dide!”

¹⁰Mewali, rapekune, “Noumbari hai pane peisako meita?”

¹¹Nauliangaahe, “Tauna au rahanga Yesu mobabehi reta, hai Narirohia matangku, pane Nauliangaana: ‘Laoko mewawalindo i Wuhu Siloam.’ Lao mpuumona mewawalindo, hangko inditi meitamona!”

¹²Rapekune, “Iumbami tauna iti?” Nauliangaahe, “Barapi kuisa.”

¹³Tempona Yesu mogalo walenguNa hai tampo, hai mopakaoha tobilo iti, ope-ope iti mewali i Alo Pengkarooangaa. Ido hai tobilo au meitami iti raanti lao i toParisi.

¹⁵Toparisi mekunehe iria, rauli, “Noumbari hai pane peisako meita?” Nauliangaahe, “Ia morirohi matangku hai reta, mewawalindona, hai unga peana meita.”

¹⁶Bahangkiahe toParisi manguli, “Ane nodo, tauna iti bara hangko i Pue Ala, lawi bara mampeulai palianta i Alo Pengkarooangaa.” Agaiana hanggaahe manguli, “Ane tomadosa, hangko iumbari kuasaNa mobabehi ngkaia tanda kuasa au nodo?” Ido hai mombehahanaimohe.

¹⁷Hangko inditi, mekune mbulimohe i tobilo iti, rauli, “Ane oio, apa au nuuli, lawi Napakaohami matamu.” Nauli tobilo iti, “Manoto Ia hadua nabi.”

¹⁸Agaiana tadulakonda to Yahudi barahe mampoinalai kaiana mpuumi tauna au bilo hangkoia hai unga pea meita. Ido hai mokakiohe inana hai umana bona rapampekunei.

¹⁹Hai mekunemohe, rauli, “Ide mpuumi pae anami au niuli bilo hangko i pesupaana peami? Noumbari hai pane peisa meita?”

²⁰Mehanahe tosaena, rauli, “Au kiisa, ide mpuumi anangki, hai ia bilo hangko i pesupanami.

²¹Agaiana noumba rarana pane peisa meita, bara wongkamia kiisa. Hai hema au mopakaoha, bara wori kiisa. Ia mangisaatomi. Nipekune rai iria. Ia peisa mohanai pekunemi.”

²²(Inana hai umana manguli nodo, lawi langahe i tadulakonda to Yahudi. Lawi arami kabotuana hawanda tadulako iti au node: hema-hema au manguli Yesu iti Datu Topehompo, barapohe rapaliu mesua i sou penombaa.

²³Idomi pongkana pane tosaena manguli, “Ia mangisaatomi. Nipekune rai iria.”)

²⁴Roo indo, rakakio mbuli tauna au hangkoia bilo, hai rauliangaa, “Nuuli mpuu apa au tou i lindona Pue Ala! Kiisa Yesu iti iami tauna au madosa.”

²⁵Nauliangaahe, “Iko, bara kuisa ba tomadosa ba bara. Au kuisa pea, bilona hangkoia, agaiana ide-ide meitamona.”

²⁶Hangko inditi, rapekune mbuli, “Apa au Nababehiako? Noumba raraNa mopakaohako?”

²⁷Nahanaihe, “Roomokau kutuntua inona, bara pae nihadi? Moapari hai nikune liliuna? Ba nipeinao wori mewali topeguruNa?”

²⁸Hangko inditi, ratunda-tundami hai rauliangaa, “Oio topeguruNa tauna iti! Ikami topegurunangkai nabi Musa!

²⁹Kiisa Pue Ala mopahawemi lolitaNa i Musa hangkoia. Agaiana tauna iti, bara kiisa ba hangko iumbaNa mai.”

³⁰Mehana tauna au bilo hangkoia, nauli, “Mepawuli mpuukau! Niuli bara niisa kahangko iumbaNa tauna iti, moleri Ia mopakaohami matangku!

³¹Taisa Pue Ala bara mohanai perapinda tauna au madosa, agaiana Ia mampehadingi pamperapina tauna au mengkoru Iria hai au mampeulai hawaNa.

³²Hangko i pewalina dunia, bara mani hambela tahadi tuntukana hadua tauna peisa mopakaoha tauna au bilo hangko i pesupaana peami mai.

³³Ane tauna iti bara hangko i Pue Ala, manoto kebara peisa mobabehi apa-apa.”

³⁴Rahanai tadulakonda to Yahudi iti, rauli, “Oio tauna au bukeko dosa hangko i pesupamu peami. Moapari pane baiko mopaturongkai?” Mepongka inditi, rawurami hai barapi rapaliu mesua i sou penombaa.

³⁵Nahadi Yesu karawurana tauna iti hangko i sou penombaa. Ido hai laomi Napombelambia, Nauliangaa, “Ba mepoinalaiko i Ana Manusia?”

³⁶Nauli tauna iti, “Tua, Nuuliangaana kahemana bona mepoinalaina Iria.”

³⁷Nauli Yesu, “Nuitami! Iami au tangaNa mololita irio.”

³⁸Nauli tauna iti, “KupoinalaiKo, Pue!” hai molingkudumi menomba Iria.

³⁹Nauli Yesu, “KamaiNgku i dunia ide, maiNa mobotusi, bona tauna au bilo peisa meita, hai tauna au meita ina mewali bilo.”

⁴⁰Arahe bahangkia toParisi inditi au mohadi lolitana Yesu, rauliangaa, “Ba Nuuli bilo woringkai?”

⁴¹Nauli Yesu, “Ane kebilokau, kebarakau madosa. Agaiana, lawi niuli meita mpuukau, batena madosakau.”