Read Napu Suro 10 Bible Online

Suro 10 - Napu bible

Suro 10

¹I wanua Kaisarea, ara hadua tobalilo, hangana Kornelius. Ia hadua tadulako au motadulakoi hangatu surodado au rahanga Surodado Italia.

²Ia bara to Yahudi, agaiana mengkoru mpuu i Pue Ala, hai ope-ope hantambiana menomba worihe i Pue Ala. Kornelius motulungi liliuhe to Yahudi au meahi-ahi, hai ia mekakae peami i Pue Ala.

³Hambela tempo, ba arami pae tinti talu kalumba, Naitami hambua pampetudungia. I lalu pampetudungia iti, naitami hadua malaekana Pue au mekakio, nauli, “Kornelius!”

⁴Langa mpuu Kornelius mototoki malaeka iti, ido hai nauli, “Tua, apari tunggaiamu?” Mehana malaeka iti, nauli, “Nahadimi Pue Ala pekakaemu, hai Naisa kamagolona lalumu motulungi tauna au meahi-ahi.

⁵Mewali ide-ide, nutudumohe bahangkia tauna lao i Yope mohaoki hai mokakio mai hadua tauna au rahanga Simo au rauli wori Peturu.

⁶Ia maida i souna Simo, hadua tauna au mobabehi parewa au hangko i koli, hungku i wiwi ntahi.”

⁷Kapaduna malaeka iti, Kornelius liliu mokakio rodua tuduana hai hadua surodado au napoinalai. Surodado iti mengkoru wori i Pue Ala.

⁸Kornelius mopahawe irihira apa au hangko naita hai nahadi, pane natudumohe lao i wanua Yope.

⁹Kahalona, tanganda mani tauna au talu iti lumao ina hungkumohe i wanua Yope, ba arami pae tinti hampulo hai dua pualo, mengkahemi Peturu i wongko sou, lao mekakae.

¹⁰Bara mahae hangko indo, marimimi Peturu, hai napeinaomi maande. Mewali, tangana mampegia kalehana paande, unga pea naita hambua pampetudungia.

¹¹I lalu pampetudungia iti, naitami langi tebungkahi hai ara au nodo bana mapeka. Iba hunona rabararangi, hai bana iti raulu hawe i tampo.

¹²I lalu bana iti, ara ngkaia pakana binata. Ara au mobiti iba, au mendele, hai ara wori tadasi.

¹³Roo indo, nahadimi hambua wotu au manguli, “Peturu! Meangkamoko, nusambalemohe binata iti bona nuande.”

¹⁴Nahanai Peturu, “Bara Pue! Binata iti rapaliahe. Lawi moula ada agamangki, ane kiande mopakedai watangki, hai bara mani hambela kuande.”

¹⁵Nauli mbuli wotu iti i Peturu, “Apa au nauli Pue Ala maroa, inee nuuli kedai moula ada agamamu.”

¹⁶Apa au nahadi i lalu pampetudungia iti mewali i lalu talu belana, hai roo nodo teore hulemi bana iti lao i langi.

¹⁷Wulimi Peturu mampekiri apa lempona pampetudungia au hangko naita. Tangana mani mampempekiri, hawemohe tuduana Kornelius i wanua Yope. Ihira mekunehe i ampu boea ba iumba souna Simo. Ratudungiahe souna Simo, hai laomohe meangka i tabangaa,

¹⁸rapekune, “Ba ara inde hadua torare au rahanga Simo au rauli wori Peturu?”

¹⁹Mewali, tangana mani Peturu mampempekiri ope-ope au hangko naita, mololitami Inao Malelaha iria, manguli, “Pehadingi, arahe talu tobalilo au maiko mohaoki.

²⁰Hoholigamoko mendaulu. Ineeko langa meula irihira, lawi Iko au motuduhe.”

²¹Mewali, mendaulu mpuumi Peturu hangko i sou iti, hai mouliangaahe tauna au hangko hawe iti, “Ikomi au nihaoki. Aparina nihaokia?”

²²Rahanai, “Tua Kornelius, tadulako surodado Roma, motudungkai mai inde. Ia, tauna au manoto laluna hai mengkoru mpuu i Pue Ala, hai rabila wori ope-ope to Yahudi. Ia natudu hadua malaekana Pue lao mokakioko naanti i souna bona peisa mohadi apa au ina nuuliangaa.”

²³Roo indo, Peturu mokontohe tuduana Kornelius mohambengi i souna. Mohambengi mpuumohe inditi. Kahalona madondo, meangkami Peturu meula irihira lao i boea Kaisarea. Hai ara wori bahangkia halalu hampepepoinalaina hangko i Yope au lao sambelahe.

²⁴Hambengiahe i tanga rara, hangko hawerihe i Kaisarea. Kahawenda, Kornelius hantina teruhumohe mampegia Peturu. Ara wori hintonggina hai rangana au nakakio Kornelius bona teruhuhe i souna.

²⁵Kahawena Peturu i souna Kornelius, molingkudumi Kornelius menomba iria.

²⁶Agaiana nadii hule Peturu hai nauliangaa, “Peangka. Ide iko manusia pea worina himbela hai oio.”

²⁷Tanganda molololita, mesuamohe i lalu sou. Pesuanda, Peturu moita bosa tauna au teruhu inditi.

²⁸Nauliangaahe Peturu, “Niisato, moula atura agamangki, ikami to Yahudi barangkai rapaliu mampogaloa tauna au barahe to Yahudi ba mesua i lalu sounda. Agaiana ara pampetudungiana Pue Ala iriko inona kaindi au mopakanotoana kadana ara manusia au kedai. Bara ara tauna au palia kipogaloahe.

²⁹Ido hai i kanakakiongku mai tua, barana bai menggoli. Mewali, ide-ide kupeinao moisa tunggaiamu mokakiona mai.”

³⁰Mehanami Kornelius, nauli, “Iba alona liu, i tempo au himbela hai ide, tangangku mekakae i soungku tinti talu kalumba, unga pea ara hadua tobalilo au meangka i lindoku. Hampina mengkila-ngkila.

³¹Nauliangaana tauna iti: ‘Kornelius, napehadingimi Pue Ala pekakaemu hai Naitami kamaroana lalumu.

³²Nutudumi taunamu lao i wanua Yope mokakio hadua tauna au rahanga Simo au rahanga wori Peturu. Ia ara i wiwi ntahi i souna Simo topobabehi parewa hangko i koli.’

³³Ido hai hoholiga kutudu hadua tauna lao mokakioko. Hai maroa mpuu lalumu, lawi maiko inde irikami. Ido hai teruhumongkai inde i lindona Pue Ala, lawi kipeinao mohadi ope-ope au natuduako Pue Ala nuuliangaangkai.”

³⁴Napepongkami Peturu mololita, nauli, “Ide-ide kuisa mpuumi, Pue Ala bara mampopontani tauna.

³⁵Hema-hema au mengkoru i Pue Ala hai au manoto babehianda, batena nadoko Pue Ala.

³⁶Manoto niisa mpuumi bambari au napahawe Pue Ala irikami to Yahudi. Bambari iti mopahawe kana i rara au mopamaroa pohintuwuna Pue Ala hai manusia melempo i Yesu Kerisitu. Yesu iti iami Ampunda ope-ope tauna.

³⁷Niisa wori apa au mewali i humalele tamponda to Yahudi mepongka i Galilea i karoona Yohane moriu tauna bosa au menosohe hangko i dosanda.

³⁸Niisa wori noumba tuntukana Yesu to Nasare au napileimi Pue Ala hai Nawei Inao Malelaha hai kuasa. Iumba pea polumaoaNa, Ia mobabehi apa au maroa lawi naporangai Pue Ala, hai Ia mopakaoha ope-ope tauna au napopeahi-ahi Datu Tokadake.

³⁹Ikami ide tuduaNa au moita mata ope-ope au Nababehi i tamponda to Yahudi tepesua i wanua Yerusale. Kahopoana, Yesu iti rapaku i kau mombehape hawe mate.

⁴⁰Agaiana i alo katalu, Napatuwo hulemi Pue Ala, hai wataNa napopaita i manusia.

⁴¹Agaiana Yesu bara tongawa i ope-ope tauna, batena pea irikami au napilei amimongkai Pue Ala mewali sabiNa. Hai i katuwona hule Yesu, maenu hai maande sambelangkai hai Ia.

⁴²Hai Natudungkai moanti bambari i ope-ope tauna, hai mewali sabi kaIana mpuu au napilei Pue Ala mewali Topobotusi ope-ope tauna, maroa au tuwo mani ba au matemi.

⁴³Ope-ope nabi hangkoia mampololita kana i Yesu iti, rauli: hema-hema au mepoinalai Iria, dosanda teampungi anti kuasaNa.”

⁴⁴Tangana mani Peturu mololita, mendaulumi Inao Malelaha i ope-ope tauna au mampehadingi lolitana.

⁴⁵Tingkaramohe ope-ope to Yahudi au mepoinalai i Yesu, au naporangahe Peturu hangko i Yope, lawi tauna au barahe to Yahudi molambi worihe Inao Malelaha.

⁴⁶Manoto kamolambindami Inao Malelaha, lawi rahadihe mololita i lalu basa au bara raisa au Naweihe Inao Malelaha, hai motoiahe Pue Ala. Hangko inditi, naulimi Peturu:

⁴⁷“Peita. Tauna ide molambimohe Inao Malelaha nodo au mewali irikita. Mewali peisahe pae tahomboki rariu?”

⁴⁸Ido hai natuduhe Peturu bona rariuhe i lalu hangana Yesu Kerisitu. Roo indo, Kornelius hai rangana merapihe i Peturu bona maida hampai hihimbela hai ihira bahangkia alona.