Read Napu Suro 12 Bible Online

Suro 12 - Napu bible

Suro 12

¹I tempo iti, Datu Herode Agripa mepongka mampopeahi-ahi bahangkia tauna au mepoinalai i Pue Yesu.

²Pandirina ia motudu tauna mopapate Yakobu wutuna Yohane hai piho.

³Apa au nababehi iti rapokana to Yahudi. Ido hai Herode motudumohe tauna mohaka Peturu. Iti mewali i alo mahilenda to Yahudi au rauli Posusa Roti Au Bara Raragii hai rauli wori Posusa Pasa.

⁴Mohaka mpuumohe Peturu, hai ratarunggu. Iba tobuna surodado rapohawaa mekampai, hantobu-hantobu ibahe. Tunggaiana Herode bona kara-karana Peturu rapohuda-hudaa i lindonda tauna bosa ane liumi Posusa Pasa.

⁵Tangana Peturu i lalu tarunggu, topepoinalai i Pue Yesu mampekakaea liliuhe Peturu.

⁶I wengi hangko damani naanti Herode i lindona tauna bosa, Peturu maturu rapaitangai rodua surodado. Taiena rataka hai rante. Ara wori surodado ntanina au mokampai baba tarunggu.

⁷Unga pea tarunggu iti mabaa, lawi ara hadua malaekana Pue meangka i holanda. Malaeka iti morua Peturu, nauli, “Pearo holiga!” Liliu rante au rapopotaka taiena Peturu unga pea mabotu.

⁸Nauli mbuli malaeka iti i Peturu, “Boke pekomu, hai mekandupako!” Napeulai mpuumi Peturu hawana, hai roo indo, nauli mbuli malaeka, “Ala komomu hai meulako iriko.”

⁹Meula mpuumi Peturu i malaeka iti. Agaiana bara mani manoto i Peturu ba tou mpuu apa au mewali iti ba pangipina pea.

¹⁰Mewali, molumaomohe moliu surodado au mokampai baba au nguru-nguruna hai baba karombuana, pane hawemohe i babaka besi i rara lao i wanua. Babaka besi iti tebungkahi sadudua. Liliu mesuwumohe hangko i babaka iti moula rara au kokoi. Bara mahae unga pea malaeka iti matanta.

¹¹Hangko indo, naisami Peturu kadanato mangipi, hai nauli, “Tou mpuu wei! Pue motudumi malaekaNa maina mokabaha hangko i kuasana Herode hai hangko i ope-ope au ratunggai to Yahudi iriko.”

¹²Roo indo, laomi Peturu i souna Maria, inana Yohane au rauli wori Markus. I sou iti, bosahe tauna teruhu mekakae.

¹³Natidongkomi Peturu babaka i sou iti. Laomi Rode, hadua towawine au mobago inditi, ina mobungkahia.

¹⁴Kamohadina wotuna Peturu, matanami. Anti kamatanana, barari mobungkahi babaka, agaiana melangkari mesua i lalu sou, hai nauli, “Peturu wei dolou i babaka!”

¹⁵Tauna iti rauliangaa, “Ba magilako pae!” Agaiana naperoho pea lolitana manguli kaPeturuna au ara i babaka. Ido hai raperoho wori rauliangaa, “Malaeka au mokampairi diti.”

¹⁶Mewali, tangana Rode lao i lalu sou, Peturu motidongko liliu babaka. Roo indo, rabungkahia mpuumi baba, hai moitamohe Peturu, mewali tingkara mpuuhe.

¹⁷Hangko inditi, Peturu moangka taiena mopakandiihe, hai natuntuamohe noumba kanapopesuwuna Pue hangko i lalu tarunggu. Napahopomi Peturu lolitana hai naperapi, nauli, “Apa au mewali iti, nipahawe wori i Yakobu hai i halalunta hampepepoinalai au ntanina.” Roo indo, meangkami Peturu lao i paidaa ntanina.

¹⁸Kahalona madondo, mewalimi hambua posisala i olonda surodado topekampai. Wulihe kana i apa au mewali i Peturu.

¹⁹Herode mohaoki Peturu, agaiana bara nalambi. Ido hai Herode motudu tauna bona surodadonahe au mokampai Peturu raparesa hai rapapatehe. Roo indo, Herode padu hangko i tampo Yudea lao maida i wanua Kaisarea.

²⁰Hambela tempo rumpumi Herode i to Tirus hai to Sidon. Mogombomohe to Tirus hai i to Sidon iti, hai laohe hihimbela i Herode. Nguru-nguruna moore-orehe Blastus, topobago i souna Herode, bona ntanda irihira. Blastus mamporangaihe lao i datu Herode bona modamehe. Iti rababehi lawi to Tirus hai to Sidon molambihe paandenda hangko i tampo au naparenta Herode.

²¹Mewali, i alo au tepakanotomi, Herode mopake badu kadatuana hai mohuda i pohudaa kadatua, hai mololita i tauna bosa.

²²Tauna au mohadi lolitana, monganga-ngangahe, rauli, “Anitu dolou mololita, barapi tauna.”

²³Anti pampemahilena, Herode bara mobila hai bara mau motoia Pue Ala. Ido hai unga pea nahuku malaekana Pue pane kekaindoro alana mate.

²⁴I tempo iti, tetambaimi tauna au mohadi Ngkorana Pue, hai tetambai worimi kabosanda au mepoinalai i Yesu.

²⁵Roomi bagonda Baranaba hai Saulu i Yerusale, mesulemohe lao i Antiokia, hai Yohane au rauli wori Markus raanti hihimbela hai ihira.