Read Napu Suro 14 Bible Online

Suro 14 - Napu bible

Suro 14

¹Apa au mewali i wanua Antiokia, iti wori au mewali i wanua Ikonium. Nodo au biasa rababehi Paulu hai Baranaba laohe i sou penombaanda to Yahudi mopahawe Ngkora Marasa i tauna au teruhuhe inditi, alana bosahe to Yahudi hai au barahe to Yahudi mepoinalai i Yesu.

²Agaiana to Yahudi au barahe mepoinalai mohuwekihe lalunda tauna bosa au bara to Yahudi bona mokahihihe tauna au mepoinalai i Pue Yesu.

³Maidamohe Paulu hai Baranaba bahangkia kamahaena i wanua iti. Barahe langa mopahawe bambari kana i Pue. Pue moweihe kuasa mobabehi tanda au metingkarai bona manoto i ope-ope tauna katouna Ngkora Marasa au raanti. Ngkora Marasa iti mampololita kabulana laluna Pue Ala au mowei katuwo maroa i manusia.

⁴Agaiana ampu boea iti bararihe hintuwu. Arahe au ntanda i to Yahudi, hai ara worihe au ntanda i surona Pue Yesu.

⁵Mewali to Yahudi hai ope-ope tadulakonda hihimbela hai au barahe to Yahudi, hintuwumohe mampopeahi-ahi hai mowatui suro au rodua iti.

⁶Agaiana raisari Paulu hai Baranaba tunggaianda. Ido hai melangkahe lao i wanua Listra hai i wanua Derbe i tampo Likaonia.

⁷Inditi mopahawe worihe Ngkora Marasa.

⁸I wanua Listra, ara hadua tobalilo au mohuda liliu pea lawi palu hangko i karapoanakana. Tauna iti bara mani hambela peisa nabuku lumao.

⁹Topalu iti mohuda mampehadingi Paulu mololita. Paulu mototoki topalu iti, naisami kamepoinalaina, ido hai ia peisa rapakaoha.

¹⁰Mewali, mololitami Paulu masisimbuku iria, nauli, “Meangkamoko!” Liliu topalu iti mesende meangka pane molumaomi.

¹¹Karaitana tauna bosa apa au nababehi Paulu, mololitamohe masisimbuku i lalu basanda, basa Likaonia, rauli, “Mendaulumi mai anitu i dunia nodo lengge manusia!”

¹²Roo indo, Baranaba rahangami Seus, hangana datu anitunda. Hai Paulu rahanga Hermes, hangana anitunda au mewali topololita, lawi Paulu au biasa mololita.

¹³I tempo iti, ara hadua topowalia au mobago i sou penombaa Seus i raoa wanua. Topowalia iti moanti bahangkia baana japi laki hai bunga, lao i baba bente wanua hihimbela hai tauna bosa. Tungaaianda, japi iti ina rasambale hai rapopenomba i Paulu hai Baranaba.

¹⁴Agaiana surona Pue Yesu au rodua iti mohadihe apa tunggaianda tauna bosa, mohepa-hepamohe hampinda, tanda kadanda mampokana tunggaia iti. Mewali, melangkamohe lao i olonda tauna bosa, hai mololitahe masisimbuku, rauli,

¹⁵“Ee! Apari dide au nibabehi? Ide ikami, manusia biasa pea woringkai nodo ikamu. Maingkai mobambari Ngkora Marasa irikamu bona nikabaha penombami i anitu au bara mobundu hai bona menomba peakau i Pue Ala au tuwo, lawi Iami au mampopewali langi, tampo, tahi hai hinangka ihi dunia.

¹⁶Hangkoia Pue Ala mopalikangaa manusia menomba moula peundeanda haduduanda.

¹⁷Agaiana, bara Naliu inaona moweikau tanda-tanda au mopakanoto kahemaNa. Ia mobabehiakau apa au maroa: Naweikau uda hangko i langi, Napopowua tuda-tudami i tempona, Naweikau paande, hai Naweikau katana lalu.”

¹⁸Nauri nodomi pololitanda Baranaba hai Paulu i tauna bosa, agaiana mapari mani rahadi mokonto tauna bosa iti, datihe moanti popenombanda irihira.

¹⁹Bara mahae hangko inditi, bahangkia to Yahudi hangko i wanua Antiokia hai wanua Ikonium hawehe i wanua Listra. To Yahudi iti mohuwekihe lalunda tauna bosa i wanua Listra bona laohe mowatui Paulu. Karoona Paulu rawatui, watana rabisoso lao i raoa wanua hai rapalehi inditi, lawi rapehangu matemi.

²⁰Agaiana tanganda to Sarani i wanua Listra meangka motoleliki Paulu, unga pea Paulu mearo, hai liliu mesua i lalu wanua. Kahalona, laomohe Paulu hai Baranaba i wanua Derbe.

²¹I wanua Derbe, Paulu hai Baranaba mopahawe worihe Ngkora Marasa, alana bosa tauna mepoinalai i Yesu. Roo indo, mesulemohe lao i wanua Listra hai i wanua Ikonium, pane liliuhe lao i wanua Antiokia i tampo Pisidia.

²²I ope-ope boea au rapolumaongi, Paulu hai Baranaba mohuweki hai mopakaroho lalunda tauna au mepoinalai i Yesu bona tetida pepoinalainda, rauliangaahe, “Ikita hangangaa molambi ngkaia pakana kapari hangko damanike mesua i lalu poparentana Pue Ala.”

²³I polumaonda iti, Paulu hai Baranaba mopilei hai moangkahe penatua i boea-boeana. Mopuasa hai mekakaehe, merapihe bona nakadipurahe Pue lawi Ia pea peharunganda.

²⁴Roo indo, Paulu hai Baranaba mopaliliumohe polumaonda melempo i tampo Pisidia hawe i propinsi Pampilia.

²⁵Hangko inditi, mobambarimohe Ngkorana Pue Ala i wanua Perga, hai mempanauluhe lao i wiwi ntahi hawe i wanua Atalia.

²⁶Hangko i wanua Atalia iti, mesawimohe i kapala tahi mesule lao i wanua Antiokia i tampo Siria. I wanua itimi pepongkana polumaonda mobambari Ngkora Marasa, au hangko roo rapobago iti. [I pepongkana polumaonda iti hangkoia, to Sarani au nguru-nguruna i wanua Antiokia mampekakaengaahe hai merapihe bona Pue Ala mokadipura Paulu hai Baranaba hangko i kabulana laluNa, tanganda mampopolumao bago iti].

²⁷Kahawenda i Antiokia, rakakiomohe ope-ope topepoinalai i Pue Yesu, hai ratuntuahe apa au Nababehi Pue Ala i polumaonda. Rapololita wori noumba Pue Ala mobungkahiahe rara bona tauna au barahe to Yahudi mepoinalaihe i Yesu.

²⁸Roo indo, Paulu hai Baranaba maidahe mahae haodi i wanua iti hihimbela hai tauna au mepoinalai i Yesu.