Read Napu Suro 16 Bible Online

Suro 16 - Napu bible

Suro 16

¹Paulu mopaliliu polumaona lao i wanua Derbe hai i wanua Listra. I wanua Listra, ara hadua tobalilo au mepoinalai i Yesu, hangana Timotiu. Inana Timotiu, to Yahudi au mepoinalai wori i Yesu. Umana to Yunani.

²Timotiu iti rabila ope-ope halalu hampepepoinalaina i wanua Listra hai Ikonium.

³Peundeana Paulu bona Timotiu meula iria mobambari Ngkora Marasa. Ido hai Timotiu napopetile moula Aturana Musa. Tunggaiana bona radoko pea to Yahudi, lawi ope-ope to Yahudi i tampo iti moisa katoYunanina umana.

⁴Hangko inditi, meangkamohe Paulu, Silas hai Timotiu. I ope-ope boea au rapolumaongi, mopahawe liliuhe i to Sarani pobotusinda surona Pue Yesu hai penatua-penatua i Yerusale, hai mopaturohe bona hinangka hawa au rapakanotomi hangangaa rapeulai.

⁵Nodomi popakarohonda pepoinalainda to Sarani, hai kamahae-haea kabosa-bosaami tauna au mepoinalai.

⁶Inao malelaha mohombokihe Paulu hai rangana lao mopahawe Ngkorana Pue Ala i propinsi Asia. Ido hai tebalikimi tunggaianda, hai laomohe mampolumaongi tampo Frigia hai Galatia.

⁷Kahawenda i pariolo Frigia hai Misia, ina laohe i tampo Bitinia, agaiana Inao Malelaha au hangko i Pue Yesu mokontohe bona ineehe lao inditi.

⁸Ido hai moliuhe i tampo Misia hai mendauluhe lao i boea Troas i wiwi ntahi.

⁹Tanga kaindi tanganda maturu i Troas, Paulu moita hambua pampetudungia. Naita hadua tobalilo au hangko i tampo Makedonia meangka i lindona, nauli, “Maimokau i Makedonia. Nitulungi wongkamia!”

¹⁰Karoona Paulu moita pampetudungia iti, mangkadipurangkai[8] hai hoholigangkai lao i tampo Makedonia, lawi manotomi kanatudungki Pue Ala mobambari Ngkora Marasa i tauna au arahe inditi.

¹¹Meangkamongkai hangko i Troas, mesawingkai i kapala tahi lao i lewuto Samotrake, hai kahalona laongkai i wanua Neapolis.

¹²Roo indo, mendaulumongkai hangko i kapala tahi, hai laongkai i wanua Pilipi, au rakamumu hai rapaidai to Roma, hai au mahile hangana i propinsi Makedonia. Inditi maidangkai bahangkia alona.

¹³I alo Penombaanda to Yahudi, laongkai i wiwi owai i raoa wanua, lawi kiisami kaarana pekakaeanda to Yahudi inditi. Indo aramohe bahangkia towawine au mogulu, ido hai mohudangkai hai mololitangkai irihira.

¹⁴I olonda towawine iti, ara hadua au rahanga Lidia hangko i wanua Tiatira. Ia, topobalu-balu bana maroa au masuli holona, hai au menomba wori i Pue Ala. Pue Ala mopakanoto laluna, alana modoko apa au napaturoahe Paulu.

¹⁵Karoonda Lidia hantambi rariu, napari-parimongkai Lidia lao maida i souna, nauli, “Ane niimbana manoto i lalu pepoinalaingku i Pue Yesu, laomoke i soungku.” Ido hai lao mpuumongkai i souna moula pamperapina.

¹⁶Hambela tempo, kalaongki i pekakaeanda to Yahudi, mohidupangkai hai hadua hawi towawine au moanitu. Anti kuasana anitu iti, ia peisa mopahawe apa au ina mewali. Ido hai ampu hawi iti molambihe ngkaia doi.

¹⁷Towawine iti meula liliu irikami, monganga-nganga, nauli, “Ihira ide hawina Pue Ala au melumbu kuasaNa hangko i ope-ope au rapenombai! Kamainda inde, maihe mopahaweakau rara bona peisakau tehorema hangko i pehukuna Pue Ala.”

¹⁸I lalu bahangkia alona, nodo liliu pea pololitana, alana malutami Paulu mohadi. Hangko indo, membalilimi Paulu, hai mololita i anitu au mebalasua i towawine iti, nauli, “I lalu hangana Yesu Kerisitu, peloho hangko iria!” Meloho mpuumi anitu iti.

¹⁹Roo indo, rumpumohe ampu towawine iti, lawi barapohe peisa molambi doi hangko iria. Ido hai mohakamohe Paulu hai Silas rabisosohe lao i tadulako boea i pobalu-balua.

²⁰Kahawenda i tadulako-tadulako boea, mololitamohe rauli, “Tauna idehe to Yahudi au maihe mopamagunego boeanta.

²¹Mepaturohe kana i ada au bara himbela hai adanta. Ikita to Roma barake peisa modoko ba mampeulai paturonda.”

²²Tauna bosa meula worihe mosalai. Mewali, topoparenta iti motuduhe tauna bona mowosuihe hampinda Paulu hai Silas hai rapapahaihe.

²³Karoonda rapapahai, liliuhe ratarunggu. Kapala tarunggu rapohawaa bona Paulu hai Silas nakampai maroahe.

²⁴Ido hai rapopesuahe i tanga-tanga tarunggu iti, hai bitinda rorombali rakapusa i lalu kau au rakalolungi.

²⁵Tanga kaindi, Paulu hai Silas mekakae hai monanihe motoia Pue Ala. Naninda iti, rapehadingihe toratarunggu au ntanina.

²⁶I tempo iti, unga pea ara linu rumihi alana tarunggu iti modua-dua. Ope-ope baba, unga pea tebungkahi, hai rante au rapopohilu ope-ope tauna au ratarunggu tebolehi wori.

²⁷Tingkarami kapala tarunggu hai mearo, hai naita ope-ope baba tebungkahimi. Nawukami pihona ina menoo, lawi napehangu melangkamohe ope-ope tauna au ratarunggu.

²⁸Agaiana nakambaroa Paulu masisimbuku hangko i lalu tarunggu, nauli, “Ineeko menoo, indetongkai ope-ope!”

²⁹Roo indo, kapala tarunggu iti merapi hulo, hai melangkami mesua i lalu tarunggu. Moradami hai tepalingkudu i lindona Paulu hai Silas.

³⁰Roo indo ia moantihe Paulu hai Silas hai nauliangaahe, “Tua, apami wongkoia au hangangaa kubabehi bona nahoremana Pue Ala?”

³¹Mehanahe Paulu hai Silas, rauli, “Mepoinalaimoko i Pue Yesu bona tehoremako hangko i pehukuna Pue Ala, oio hai ope-ope tauna au i lalu soumu.”

³²Hangko inditi, Paulu hai Silas mopahawemi Ngkorana Pue i kapala tarunggu, hai i ope-ope tauna au i lalu souna.

³³Mewali, i wengi iti kapala tarunggu mobahoi belanda Paulu hai Silas. Ia hai ope-ope tauna au i lalu souna rariumohe.

³⁴Roo indo, kapala tarunggu iti moantihe Paulu hai Silas lao i souna hai napaandehe. Matana mpuuhe tohantambi iti, lawi mepoinalaimohe i Pue Ala.

³⁵Kahalona madondo topoparenta to Roma motudu surodado lao i kapala tarunggu, nauliangaa, “Kabahamohe tauna au rodua iti au rahaka imaindi.”

³⁶Kanahadina kapala tarunggu parenta iti, nauli i Paulu hai i Silas, “Ara hawa hangko i topoparenta au mouliangaana bona rakabahakau. Mewali, padumokau, hai maroa-roakau i rara.”

³⁷Agaiana nauli Paulu i surodado iti, “Ikami ide to Romangkai. Bara hintoto ane hangko damani rapohuda-hudaa kara-karangki, rapapahaimongkai i lindonda tauna bosa hai ratarunggumongkai! Hai ide-ide nipeinao nipopeangka ngkandiingkai! Bara kiunde! Niuliangaahe, ihirari au hangangaa mai mokabahangkai.”

³⁸Mesule hulemohe surodado iti moanti lolitana Paulu i topoparenta. Karahadina topoparenta, Paulu hai Silas iti to Roma, langamohe.

³⁹Laomohe merapi ampu i Paulu hai Silas, raporangaihe lao i raoa tarunggu, rauli, “Agina padumokau hangko i wanua ide.”

⁴⁰Mewali, padu mpuumohe Paulu hai Silas hangko i tarunggu iti lao i souna Lidia. Inditi mampombelambiamohe halalu hampepepoinalainda, hai rapakaroho lalunda. Roo indo, padumohe mopalehi wanua Pilipi.