Read Napu Suro 17 Bible Online

Suro 17 - Napu bible

Suro 17

¹Paulu hai Silas mopaliliuhe polumaonda moliu i wanua Ampipolis hai Apolonia hawe i wanua Tesalonika. I Tesalonika iti, ara haogu sou penombaanda to Yahudi.

²Nodo au biasa nababehi, laomi Paulu i sou penombaa iti mampololita kana i Ngkorana Pue Ala hihimbela hai tauna au teruhu inditi. Talu mingguna mombeusu, i alo Penombaanda to Yahudi,

³Paulu mopakanotoahe apa lempona ihi Sura Malelaha, nauli, “Datu Topehompo au nadandi Pue Ala hangkoia, hangangaa mohalea kapari duuna mate, agaiana ia tuwo hule. Yesu au kupololita irikamu ide iami Datu Topehompo.”

⁴Arahe to Yahudi au modoko lolita iti hai au meulahe i Paulu hai Silas. Ara worihe tauna ntanina au mepoinalai, tepesua bosa to Yunani au mengkoru i Pue Ala hai bosa wori towawine au teadai.

⁵Agaiana to Yahudi au bara mepoinalai, mahinahe i Paulu hai Silas. Ido hai mokakiomohe tauna au lohehe mobago hai au mohuda-huda peahe i pobalu-balua. Bosamohe teruhu, hai mobabehimohe silaka i lalu wanua. Kahawenda i sou au rapaidai Paulu hai Silas, pesuanda peami. Tunggaianda mohakahe Paulu hai Silas hai raanti lao i lindonda tauna bosa,

⁶agaiana barahe ralambi. Ido hai mohakamohe ampu sou, hangana Yason. Yason iti hai bahangkia to Sarani rabisosohe lao i lindonda tadulako boea, hai monganga-ngangahe, rauli, “Paulu hai rangana ide mopawuli tauna i humalele dunia. Maihe inde mampeinaohe mogero-gero boeanta.

⁷Hai Yason idemi au modokohe i lalu souna! Tauna iti moewahe hawana datunta i Roma, rauli kaarana datu ntanina au rahanga Yesu.”

⁸Karahadina tauna bosa hai tadulakonda lolitanda, rumpu ntepuumohe.

⁹Kahopoana, Yason hai halalu hampepepoinalaina mohuhuhe ngkaia doi i tauna bosa hai tadulakonda, hai modandihe ane Paulu hai Silas mobabehi silaka i wanua, ihirami au rahaka. Roo indo hangko rakabaharihe.

¹⁰I wengi iti, halalu hampepepoinalainda au i Tesalonika mouliangaahe Paulu hai Silas, “Agina manteulimokau hampai lao i Berea.” Mewali, lao mpuumohe. Kahawenda i Berea, Paulu hai Silas lao i sou penombaanda to Yahudi.

¹¹Tauna i Berea iti maroa lalunda, bara nodo au i Tesalonika, lawi mampehadingihe lolitanda Paulu hai Silas hangko i katanana lalunda. Alo-alona moparesahe Sura Malelaha bona raisa ba manoto lolitana Paulu ba bara.

¹²Bosahe to Yahudi au mepoinalai i Yesu. Hai bosa worihe to Yunani au mepoinalai. To Yunani itihe iami tobalilo hai towawine au teadai.

¹³Bara mahae hangko inditi, rahadimi to Yahudi au i wanua Tesalonika popahawenami Ngkorana Pue Ala i wanua Berea. Ido hai laomohe i Berea mohuweki lalunda tauna bosa.

¹⁴Mewali, to Sarani inditi hoholigahe mamporangai Paulu lao i wiwi ntahi. Agaiana Silas hai Timotiu, maida manihe i Berea.

¹⁵To sarani iti, mamporangaihe Paulu hawe i wanua Atena. Roo indo, mesulemohe i Berea moanti tewaina Paulu i Silas hai Timotiu bona hoholigahe mekulele.

¹⁶Tangana Paulu mampegia Silas hai Timotiu i Atena, masusa laluna moita kangkaiana watu molindo au rapenombai to Atena.

¹⁷Ido hai i sou penombaa, Paulu mombepakana i lolita hai to Yahudi hai tauna ntanina au mesua agama Yahudi. Alo-alona Paulu mopaturo worihe hema-hema pea au nalambi i pobalu-balua.

¹⁸I wanua Atena iti, ara worihe tauna mapande au mampeulai paturona Epikuros hai paturona Stoa[9]. Tauna au mapande iti mombehanai hai Paulu. Arahe au manguli, “Mengkamapande mpuu tauna ide ba apa dolou nauli.” Ara worihe au manguli, “Ba ina napahaweake kana i anitu hangko i tampo ntanina.” Nodo lolitanda, lawi i pepaturona, Paulu mepaturo kana i Yesu hai kana i katuwonda hule tauna hangko i kapate.

¹⁹Ido hai tauna iti moantimohe Paulu i poteruhua mahile au rahanga Bulu Aeropagus, rauliangaa, “Kipeinao mohadi paturo wou iti.

²⁰Bara mani ara kihadi paturo ntanina au mepawuli nodo iti. Ido hai kipeinao moisa lempona.”

²¹(Lawi biasana to Atena hai tauna ntanina au maida inditi, raunde pea mampehadingi hai mampololita liliu apa au wou.)

²²Ido hai meangkami Paulu i lindonda majelisi Aeropagus, nauli, “Ampu boea Atena! Kuita topoagama mpuukau.

²³Kuisa iti, lawi i polumaongku i lalu wanuami inona, kuita penombaami hai kuita wori hambua watu penombaa au ara ukina node: ‘Penombaa i Pue au Bara Taisa.’ Mewali, pue au nipenombai au bara niisa, itimi au ina kupahaweakau.

²⁴Pue Ala itimi au mampopewali dunia hai hinangka ihina, ia Ampu langi hai tampo. Ia bara maida i sou penombaa au nababehi tauna.

²⁵Bara wori paraluu nadurei manusia, lawi Ia bara ara kamakurana. Ia au moweike katuwo hai inao hai hinangka au taparaluu.

²⁶Hangko i hadua tauna, Pue Ala mampopemule hantina-hantina tauna, bona mampaidaihe dunia ide. Ia mopakanoto amimi hangko i nguru-nguruna tampana tampo au rapaidai ope-ope kadatua hai tempo poparentanda.

²⁷Pue Ala mobabehi ope-ope iti bona Ia tahaoki, hai ane tahaoki, peisa tahumba. Katouana, Ia bara karao hangko irikita ope-ope.

²⁸Lawi idemi lolitanda toiorunta: ‘Hangko Iria pea katuwonta. Ido hai peisake maida hai mokale i dunia ide.’ Himbela wori au nauki hadua toiorumi hangkoia, nauli: ‘Ikita ope-ope napoanamoke Pue Ala.’

²⁹Mewali, halalu-halalu, bara maroa ane ikita au napoanamoke Pue Ala mopahimbelake Pue Ala hai watu molindo au rababehi hangko i bulawa ba hangko i salaka ba hangko i watu moula kapande manusia.

³⁰Hangkoia, menombake i anitu. Nauri nodo, barake nahuku Pue Ala. Ia motuko pea mataNa i kantulita iti. Agaiana ide-ide, Natuduhe ope-ope tauna i humalele dunia bona menosohe hangko i dosanda.

³¹Lawi i hambela tempo au Napakanotomi, Pue Ala ina mobotusi kara-karanda tauna i humalele dunia i kanoto-notoaNa. PobotusiNa iti ina napobago hadua tauna au napilei Pue Ala. Hai tauna iti Napatuwo hule hangko i kapate bona tongawa i ope-ope tauna kaIana au Napilei.”

³²I karahadina lolitana Paulu, arahe au moele-ele, lawi barahe mampoinalai kaarana tauna au peisa tuwo hule. Agaiana, ara worihe au manguli, “Kiunde mampehadingi mbuli lolitamu iti.”

³³Roo indo, padumi Paulu hangko i poteruhuanda.

³⁴Agaiana arahe au meula i Paulu hai mepoinalaimohe i Yesu. Hadua au mepoinalai i Yesu, iami Dionisius, hadua anggota majelisi Aeropagus. Ara wori hadua towawine au rahanga Damaris, hai ara worihe au ntanina.