Read Napu Suro 19 Bible Online

Suro 19 - Napu bible

Suro 19

¹Tangana Apolo i wanua Korintu, Paulu molumaohi boea-boea au i bulu i tampo Galatia hai Frigia, hai roo indo mendaulumi lao i wanua Epesu. Inditi ia mohidupa hai bahangkia topepoinalai.

²Napekunehe, nauli, “Aramokau molambi Inao Malelaha i kamepoinalaimimi?” Rahanai, “Bara mani. Mogalori kihadi kaarana Inao Malelaha iti bara mani!”

³Napekune mbuli Paulu, nauli, “Ane nodo, rariukau moula paturona hema?” Rahanai, “Moula paturona Yohane Toperiu.”

⁴Hangko inditi, nauliangaahe Paulu, “Periuna Yohane iami tanda pampenosointa dosanta. Agaiana i tempona Yohane meriu, ia mopahawe i to Yahudi bona mepoinalaihe i tauna au ina hawe i bokona, au rahanga Yesu.”

⁵Pohadinda lolitana Paulu, mampoperiumohe tauna iti i lalu hangana Pue Yesu.

⁶Hai i tempona Paulu moona taiena i tanoananda, mendaulu mpuumi Inao Malelaha mokuasaihe. Unga peahe mololita hai basanda tauna ntanina, hai mohowarahe lolita au hangko i Pue Ala.

⁷Kabosanda au rariu tempo iti, ba aratohe pae hampulo hai rodua tobalilo.

⁸I lalu talu wulana Paulu i wanua Epesu, ia lao liliu i sou penombaanda to Yahudi. Ia mopaturo tauna au teruhu inditi, hai bara langa-langa mopakanotoahe kana i poparentana Pue Ala bona rapoinalai.

⁹Agaiana ara bahangkia tauna au matua lalunda au bara raunde mepoinalai. I lindonda tauna bosa, mosapuakahe Paturona Pue Yesu. Ido hai napalehimohe Paulu lao hihimbela hai bahangkia to Sarani i paidaa pepaguruana Tiranus. Paidaa iti mahile hai paka raposikolai. Alo-alona Paulu mepaturo inditi.

¹⁰Idomi bagona i lalu rompare, duuna ope-ope tauna i propinsi Asia mohadihe Ngkorana Pue, maroa to Yahudi maroa au bara to Yahudi.

¹¹Pue Ala mowei kuasa i Paulu mobabehi tanda-tanda au metingkarai mpuu.

¹²Kehapiri lencona ba komona pea raanti i tomahai, batenda maoha, hai meloho mpuuhe ope-ope seta au mampopeahi-ahihe.

¹³I tempo iti, ara wori i Epesu bahangkia topepakulii to Yahudi au molulumaohe i humalele wanua mampopeloho seta au mesua i tauna. Hangko i olonda, ara pitu tobalilo, ope-opehe anana kapala tadulako mpenomba au rahanga Skewa. Hambela tempo, topepakulii iti mampetandakahe mokabelai hangana Pue Yesu ane mampopelohohe seta hangko i hadua tauna, rauli, “I lalu hangana Yesu au nabambari Paulu, kipopelohoko!”

¹⁵Nahanai seta iti, “Yesu kuisa, Paulu kuisa wori. Ikamu, hemakau pane baikau mampopelohona!”

¹⁶Tauna au napesuangi seta iti unga pea melumpaki hai mehaka. Bara rabuku moewa, lawi maroho. Ido hai melangkahe hangko i sou iti hai wata au bela-bela hai barapohe mehampi, lawi hampinda nahepa-hepami.

¹⁷Apa au mewali iti rahadimi ope-ope tauna au arahe i Epesu, maroa to Yahudi maroa au barahe to Yahudi. Mewali langahe, ido hai mampomahilemohe hangana Pue Yesu.

¹⁸Tempo iti, bosa tauna au mepoinalaimohe mangaku i lindonda tauna bosa, kamobabehinda worimi babehia au nodo.

¹⁹Bosa topangisa moanti hinangka sura poukia isanda, ragulu hai rahuwe i lindonda tauna bosa. Holona sura isanda iti ane raimba, ba arato pae lima pulona sabuna doi pera.

²⁰Mewali, hangko i pewalina au metingkarai iti, katetetambaiami tauna au mampehadingi Ngkorana Pue, hai anti kuasana Ngkora iti, tetambai wori tauna au mepoinalai.

²¹Liumi au mewali iti, Paulu moliwo lao i tampo Makedonia hai Akaya, hai roo indo ina lao wori i wanua Yerusale, nauli, “Roona i Yerusale, hangangaa laona i wanua Roma.”

²²Hangko inditi, natudumohe rodua tauna au meula iria moioru lao i Makedonia. Hanganda, Timotiu hai Erastus. Agaiana Paulu ara mani i propinsi Asia.

²³I tempo iti, ara posisisala au mahile ntepuu i wanua Epesu. Posisisala iti mewali anti paturo kana i Pue Yesu. Node tuntukana:

²⁴I wanua Epesu iti, ara hadua tobalilo au mapande mobabehi parewa hangko i salaka, hangana Demetrius. Bagona iami mobabehi sou-sou hangko i salaka au nodo sou penombaa au rapake menomba i anitu towawine au rahanga Artemis. Hai hangko i bago iti, ia hai topobagona molambi ngkaia doi.

²⁵Hambela tempo, nakakiomohe rangana hampopobago hai topobago salaka au mapande, nauliangaahe, “Halalu, niisato, hangko i bago ide ngkaia mpuu polambiata.

²⁶Agaiana niita hai nihadimi apa au nababehi hadua tauna au rahanga Paulu. Nauli tauna iti, apa au nababehi manusia bona rapenombai bara ara kuasana. Anti pepaturona iti, bosahe tauna au meula i Paulu, hai bara pea i Epesu. I humalele propinsi Asia, batena nodo wori.

²⁷Mewali halalu, au tapokalanga ntepuu: inee deade bagonta ide barapi raunde tauna. Bara ido pea, agaiana sou penombaata i anitu towawine Artemis barapi ina tepomahile, duuna hangana Artemis au makuasa barapi rabila. Moleri anitunta ide iami au rapenombai ope-ope tauna i Asia hai i humalele dunia.”

²⁸Karahadina lolitana Demetrius iti, rumpumohe hai monganga-ngangahe, “Toiami Artemis au tapenombai to Epesu!”

²⁹Mewali humalele wanua iti magunego. Hai rame-ramehe tauna bosa lao mohaka Gayu hai Aristarkus. Gayu hai Aristarkus iti iami to Makedonia au mamporangai Paulu i polumaona. Rahakamohe tauna rodua iti hai raantihe lao i sou poteruhua mahile i lalu wanua.

³⁰Paulu mampeinao lao hihimbela hai ihira mesua i lalu poteruhua mahile. Agaiana rakonto halalu hampepepoinalaina.

³¹Ara worihe bahangkia tuana (himadana Paulu i propinsi Asia) au motudu tauna mouliangaa Paulu bona inee lao i poteruhua mahile.

³²I tempo iti, bosa mpuuhe tauna tegulu i poteruhua mahile. Arahe au manguli node, arahe au manguli nodo. Kabosanda tauna au teruhu iti barahe moisa apa pongkana pane teruhuhe.

³³Arahe au manguli hadua to Yahudi au rahanga Aleksander au mewali pongkana posisalanda, lawi ia au ratudu to Yahudi meangka mopahawe lolita i tauna bosa. Ido hai Aleksander moangkami taiena mopakandiihe, lawi mampeinao mohowara notona.

³⁴Agaiana, i karaisana tauna bosa katoYahudina, monganga-nganga liliumohe rojaa kamahaena, rauli, “Toiami Artemis au tapenombai to Epesu!”

³⁵Kahopoana, peisahe napakandii hadua totosae boea. Nauli totosae boea iti, “Halalu-halalu to Epesu! Bara ara hadua tauna au bara moisa boeanta ide au mokadipura sou penombaa anitu towawine Artemis hai mokampai watu au makuasa au manawo hangko i langi.

³⁶Bara ara hadua au peisa mosapuaka iti. Ido hai hangangaa mandiike hampai, ineeke naanti kamamuna lalunta.

³⁷Lawi tauna iti, niantimohe mai, agaiana baratohe mosilakai sou penombaata ba mopapakoi hangana anitunta.

³⁸Mewali, ane Demetrius hai rangana au hampopobago mampeinao mosalai ba hema-hema, hangangaa rapahawe hampai i tadulako boea. Lawi arami tempo au tepakanoto, hai i tempo iti tadulakonta peisa mampohuda-hudaa kara-karanta nodo au mewali ide.

³⁹Mewali, halalu, ane ara mani kara-karami, iti hangangaa rapohuda-hudaa i poteruhua moula atura topoparenta.

⁴⁰Lawi apa au tababehi ide peisa mopahurewuke. Peisake rarai topoparenta Roma. Ina rauli mopaarake peewa. Hai ane raraimoke, apami au ina tauli, lawi poteruhunta ide bara ara pongkana.”

⁴¹Karoona mololita, napopesulemohe ope-ope.