Read Napu Suro 2 Bible Online

Suro 2 - Napu bible

Suro 2

¹Kahawena alo mahilenda to Yahudi au rahanga Alo Pentakosta,[1] ope-ope tauna au mepoinalai i Yesu moguluhe i hambua paidaa.

²Unga peahe mohadi pomoni hangko i langi, nodo pewui himburu au kebuu. Pomoni iti rahadimi i humalele sou poteruhuanda.

³Hai moitamohe rore api au nodo dila, mangulele hai mengkatoa irihira hadua-hadua.

⁴Roo indo, ope-ope tauna iti nakuasaimohe Inao Malelaha, hai mepongkamohe mololita i lalu ngkaia pakana basa au bara mani raisa, moula apa au napakanotoahe Inao Malelaha.

⁵Tempo iti, bosahe to Yahudi hangko i humalele dunia au maida i Yerusale. Ope-ope tauna iti mengkoruhe i Pue Ala.

⁶Karahadina tauna bosa pomoni au nodo himburu inona, teruhumohe hai wulihe, lawi mohadihe surona Pue Yesu mololita i lalu basanda hadua-hadua.

⁷Tingkara mpuuhe, hai mololitahe, rauli, “Apari au mewali inde? Bara pae topololita iti to Galilea hahahe?

⁸Noumba hai tahadirihe mololita i lalu basanta?

⁹Lawi arake hangko i tampo Partia, Media, Elam, hangko i Mesopotamia, Yudea hai Kapadokia. Arake au hangko i Pontus hai Asia,

¹⁰hangko i Frigia hai Pampilia, hangko i Masiri hai hangko i tampo Libia au hungku i wanua Kirene. Arake au hangko i wanua Roma. Hantangake to Yahudi, hai ara worihe tauna ntanina au mesua agama Yahudi.

¹¹Arake au mai hangko i tampo Kreta hai tampo Arabia. Ikita ope-ope mohadihe mololita i lalu basanta haduduanta au mampololita tanda kuasa au nababehi Pue Ala.”

¹²Tingkara hai wulimohe ope-ope, pane mombepekunehe hadua hai hadua, rauli, “Apari wei lempona ide?”

¹³Agaiana ara worihe tauna au mampopowoo-woo, rauli, “Nalanguihe anggoro!”

¹⁴Hangko inditi, Peturu meangkami hihimbela hai rangana au hampulo hai hadua, mololita masisimbuku, nauli, “Halalu-halalu to Yahudi, hai ikamu au maida i Yerusale! Nipehadingi maroa, lawi apa au mewali ide, ina kupakanotoakau.

¹⁵Barangkai malangu nodo au niuli. Ide-ide bara mani tempo paenu-enu lawi hangko tinti hahio madondo.

¹⁶Agaiana apa au mewali ide iami pobagona Inao Malelaha irikami moula apa au napahawe nabi Yoel hangkoia, node:

¹⁷Nauli Pue Ala: ‘I alo-alo kahopoa dunia, Ope-ope tauna ina Kukiraiahe inaoNgku. Anami tobalilo hai anami towawine ina mohowara lolitaNgku. Anantomoanemi ina moita apa au Kupopaitaahe. Tosaemi ina Kuweihe pangipi.

¹⁸Hawe-hawe i hawiNgku tobalilo ba towawine, ina Kukiraiahe InaoNgku i alo iti, hai ihira ina mohowara lolitaNgku.

¹⁹Ina kupopaitaakau au metingkarai i langi hai tanda kuasa i dunia, nodo wahe hai api hai rambu au moramuku.

²⁰Hangko damani hawe alo pebotusina Pue, alo ina mewali makaindi, hai wula ina mewali malei nodo wahe.

²¹I tempo iti, hema-hema au meraroa i Pue batena tehoremahe hangko i huku dosanda.’ ”

²²Hai napaliliu mbuli Peturu lolitana, nauli, “Halalungku to Yahudi! Nipehadingi apa au kuuliangaakau ide. Au kutunggai iami Yesu to Nasare. Ia pea au napilei hai napakanoto Pue Ala mewali TopobagoNa au Malelaha. Iti niisa lawi anti kuasana Pue Ala, Pue Yesu mobabehi ngkaia tanda kuasa hai tanda au metingkarai i olomi.

²³Hintoto hai tunggaia hai peundeana Pue Ala lawi naisa amimi, rahuhumi Yesu irikamu[2] bona nipapate. Hai nihuhuahe i tauna au kadake[3] rapapate i kau mombehape.

²⁴Ikamu mopapate Yesu, agaiana Pue Ala mopatuwo hule. Pue Ala mokabaha wataNa hangko i kuasa kapate, lawi Ia hangangaa tuwo hule.

²⁵Lawi arami lolitana Datu Daudi hangkoia kana i Yesu au manguli: ‘Kukatuinao liliu Pue; Lawi Napohiolaa peamona, idomi hai maroho liliu lalungku.

²⁶Idomi hai matana lalungku, tanoanangku motoia Pue Ala hai watangku molambi paidaa au lene.

²⁷Lawi Oio Pue, bara Nupogiangaa watangku maida i lalu dunia tomate. TaunaMu au malelaha bara Nupogiangaa moita kapate.

²⁸Nutudungiana rara au monontohi katuwo Nuweina katana au mahile i lindoMu.’”

²⁹Hangko inditi, napaliliumi Peturu lolitana, nauli, “Halalu-halalu, kuuliangaakau i katou-touana, bara watana haduduana au natunggai Daudi i lolitana iti. Lawi umanta Daudi, matemi hai ratawu. Talumbana taisa mani hawe ide-ide.

³⁰Daudi iti, hadua nabi au moisa ami apa au ina nababehi Pue Ala. Naisa kaarana podandina hai posumpana Pue Ala iria au manguli: hadua hangko i pemuleamu ina Kuangka Kupopohuda mewali datu. Mewali, ido hai Daudi mampopaisa ami katuwona hule Datu Topehompo, nauli: ‘Ia bara rapogiangaa i paidaa tomate, hai wataNa bara rapogiangaa i lalu talumba duuna magoro.’

³¹

³²Yesumi au natunggai Daudi i lolitana iti. Lawi Iami au napatuwo hule Pue Ala. Ikami ide mewali sabiNa, lawi kiita mata katuwoNa hule.

³³Pue Ala mampopohudami Yesu i pohudaa au tebila hai teadai ntanda i koanaNa. Hai hangko indo, Pue Ala Umanta mowei i Yesu Inao Malelaha nodo au Nadandi. Mewali au niita hai au nihadimi inona, mewali anti kuasana Inao Malelaha au naweingkai Yesu.

³⁴Mewali, halalu, bara mpuu watana haduduana au natunggai Daudi hai lolitana. Lawi bara woia Daudi au tuwo hule hai mengkaore lao i suruga. Agaiana nauli Daudi: Pue mongkora i Ampuku, Nauli, ‘MohudamoKo ntanda i koanaNgku,

³⁵duuna Kupopengkoruhe ope-ope iwaliMu Irio.’ ”

³⁶Hangko inditi, napahopomi Peturu lolitana, nauli, “Mewali, ido hai ikamu to Yahudi, hangangaa nipakanoto i lalumi apa au kuuli ide: Yesu au nipaku i kau mombehape, Iami au napilei Pue Ala mewali Amputa hai Datu Topehompo.”

³⁷Karahadina tauna bosa lolitana Peturu iti, tebalikimi lalunda, hai mekunehe i Peturu hai i surona Pue Yesu au ntanina, rauli, “Halalu-halalu, ane nodo, apami au hangangaa kibabehi?”

³⁸Nahanai Peturu, “Hangangaa menosokau hadua-hadua hangko i dosami, hai hangangaa rariukau i lalu hangana Yesu Kerisitu. Ane nodo, Pue Ala ina moampungi dosami, hai Naweikau Inao Malelaha.

³⁹Lawi dandina Pue Ala ide raweike hai rawei worihe pemuleanta duuna hawe i tauna ntanina au karao.[4] Dandina Pue Ala ide, batena mewali kiranda ope-ope tauna au nakakio Amputa Pue Ala mewali taunaNa.”

⁴⁰Bara iti pea au nauli Peturu, agaiana ngkaia mani au napololita. Ia mopaturohe tauna bosa hai napopaingaahe, nauli, “Menosomokau! Ineekau mampeulai tauna au kadakehe ide bona datikau molambi pehukuna Pue Ala au ina morumpahe!”

⁴¹Bosa tauna au mampoinalai lolitana Peturu, pane laomohe rariu. I alo iti, kabosana tauna au mepoinalai i Yesu, tetambaimi ba aramohe pae talu sabuna.

⁴²Roo indo, bosa tauna au hangko mepoinalai i Yesu mampehadingi paturonda surona Pue Yesu, hai teruhu liliuhe. Maande sambelahe, mokira-kirahe roti anti pokatuinaonda Pue Yesu, hai mekakaehe.

⁴³Surona Pue Yesu mobabehihe ngkaia tanda kuasa hai tanda au metingkarai. Ido hai tingkara mpuuhe tauna bosa.

⁴⁴Hintuwumohe ope-ope au mepoinalai i Yesu. Anu-anunda rapoparewa sambela.

⁴⁵Arahe i olonda au mampobaluhe anu-anunda, hai holona rakira-kira i hangka ranganda au barahe nakaarai.

⁴⁶Alo-alona teruhuhe i Souna Pue Ala. Mokira-kirahe roti anti pokatuinaonda Pue Yesu, hai maande sambelahe i sounda i lalu katana-tana moula kabulana lalunda.

⁴⁷Motoia liliuhe Pue Ala, hai rapokatanahe ope-ope tauna. Alo-alona katetetambaiahe, lawi Pue motambaiahe tauna au molambi katuwo maroa.