Read Napu Suro 20 Bible Online

Suro 20 - Napu bible

Suro 20

¹Karoona posisisala i Epesu, Paulu moguluhe tauna au mepoinalai i Yesu hai napakaroho lalunda. Roo indo, mepalakanami hai mopaliliumi polumaona lao i tampo Makedonia.

²I polumaona iti, ia mosondakihe to Sarani, hai napahaweahe ngkaia lolita bona maroho lalunda. Hangko inditi, lao wori i tampo Akaya, tamponda to Yunani,

³hai maida inditi talu wulana kamahaena. Liumi talu wulana, ina mosumombami mesule lao i tampo Siria. Agaiana nahadiri bambari kaina rapapatena to Yahudi. Ido hai nauli laluna Paulu, “Agina mesulena moliu i tampo Makedonia.” Mewali, lao mpuumi i Makedonia.

⁴I polumaona iti, ara wori bahangkia rangana au lao sambelahe hai ia. Hanganda, Sopater anana Perus au hangko i Berea, Aristarkus hai Sekundus au hangko i Tesalonika, hai Gayu au hangko i Derbe. Ara wori Timotiu hai rodua au hangko i Asia iamohe Tikikus hai Tropimus.

⁵Mewali, hangko i tampo Makedonia, ihira moiorumohe, hai rapegiangkai i wanua Troas.

⁶Liumi alo mahilenda to Yahudi au rahanga Posusa Roti au Bara Raragii, mesawi mbulimongkai i kapala tahi mopalehi wanua Pilipi. Hopomi lima alona, mohidupa hulengkai hai rangangki i wanua Troas, hai inditi maidangkai haminggu kamahaena.

⁷I alo kaisa minggu iti, mogulumongkai maande sambela hai halalu hampepepoinalaingki i Troas i pokatuinaongki kapatena Pue Yesu. Paulu mololita mepaturo hawe mahae wengi, lawi kahalona meangkami.

⁸I sou poteruhuangki iti, mogulungkai i lincu au i wongko ntepuu, indo Ngkaia hulo rahuwe.

⁹I poteruhuangki, ara hadua anantomoane, hangana Eutikus. Ia mohuda i sungkeke lincu iti. Lincu iti katalu usuna hangko i tampo. Anti kamahaena Paulu mololita, maleluemi anantomoane iti hai leta ntundami, ido hai manawo toa i tampo. Mendaulumohe rangana lao moangka, rapeita matemi.

¹⁰Mendaulu worimi Paulu hangko i sou lao mokalapui anantomoane iti, nauli, “Ineekau langa, tuwo pea.”

¹¹Roo indo, mengkahe hulemi Paulu lao i wongko mobise-bise roti, hai maande sambelahe. Mololita mbuli Paulu hawe mabaa, hangko meangkari.

¹²Anantomoane au manawo inona, tuwomi, ido hai matanahe rangana au moanti lao i souna.

¹³Moiorumongkai mesawi kapala tahi lao i wanua Asos bona mampohidupaangkai Paulu inditi. Iti au naatoro ami Paulu, lawi napeinao molumao lao i Asos.

¹⁴Mohidupa mpuumongkai i Asos, hai mesawimi Paulu i kapala tahi hihimbela hai ikami lao i wanua Mitilene.

¹⁵Hangko inditi, kipaliliumi polumaongki, kahalona hawemongkai i tampo au mombehambali hai lewuto Kios. Karombengina hawemongkai i lewuto Samos. Hangalo hangko indo, hawengkai i wanua Miletus.

¹⁶Paulu mopakanoto kadangki hampai mehupe i wanua Epesu dati gagangkai mahae i propinsi Asia. Ia mopahumpe polumaongki, lawi naunde polo hawe i Yerusale hangko damani hawe alo mahile au rahanga Pentakosta.

¹⁷Hangko i Miletus, Paulu mopakatu bambari lao i Epesu bona penatua au ara inditi maihe mampohidupaa.

¹⁸Hawemohe tauna i Miletus, nauliangaahe Paulu, “Halalu-halalu, niisa mpuu noumba poantiku hungkaku hihimbela hai ikamu. Mepongka i kahawengku i propinsi Asia duuna ide-ide,

¹⁹mengkaiwoina i lalu pobagongku i olomi. I pampopolumaongku bagona Pue inde, bosa belangku moteria. Hai ngkaia wori kapari au kuhumba hangko i tunggaianda to Yahudi au mampeinaohe mopapatena.

²⁰Niisa halalu kadangku langa mopahaweakau hinangkana au mobundu i lalu katuwomi. Kupaturokau halalu, maroa i tempomi teruhu node, maroa i soumi.

²¹Kupopaingaa liliukau, maroa ikamu to Yahudi maroa ikamu au bara to Yahudi bona menosokau hangko i dosami hai mepoinalaikau i Amputa Pue Yesu.

²²Ide-ide ina laona i Yerusale moula hawana Inao Malelaha iriko. Inditi bara kuisa apa au ina mewali i watangku,

²³agaiana au kuisa i ope-ope boea au kupolumaongi, Inao Malelaha mopakanoto kaina rahakangku hai molambina kapari.

²⁴Kehapiri nodo, barapi kupekiri watangku bona peisana moparoo bago au napoinalaiana Pue Yesu. Pobagongku ide, mopahawe Ngkora Marasa au mopatongawa kabulana laluna Pue Ala irikita.

²⁵Halalu, ikamu au kusondakimokau hai kupopaisaakau kana i poparentana Pue Ala. Ide-ide manotomi i lalungku, kadangkupi ina niita.

²⁶Mewali kupakanotoa amimokau alo ide: ane arakau au molambi rugi, barapi salangku,

²⁷lawi barana oha-oha mopahaweakau ope-ope tunggaiana Pue Ala irikita.

²⁸Maroa-roakau datikau madosa, hai nikadipura maroa ope-ope jumaa au napoinalaiakau Inao Malelaha. Hangangaa nikadipurahe, nodo hadua toporewu mamporewu dimbana, lawi Anana Pue Ala mate mobaiari huku dosanda bona mewalihe taunana Pue Ala.

²⁹Kuisa mpuu halalu, ane paduna hangko inde, batena ina hawehe tauna au kadake au mampopeahi-ahi tauna au niporewu iti, nodohe serigala mampopeahi-ahi dimba.

³⁰Mainga-ingakau lawi ara worihe i olonta au ina mopawuli tauna au mepoinalai i Yesu bona raantihe i rara au mepakanawo. Nikatuinao, halalu, i lalu talu parena, barana mengkaroo mopaturokau hadua-hadua, maroa mabaa maroa kaindi, hai bosa wori belana tudo owai matangku moteriahikau.

³²Ide-ide, halalu, kupekakaeakau i Pue Ala bona Nakadipurakau. Kuweikau lolita bona mampeulai liliukau Ngkorana Pue au mopakanotoake kabulana laluna Pue Ala irikita. Lawi Pue Ala pea au makuasa mopakaroho lalunta hai moweike pewati au Napasilolongaamohe tauna au Napatani mewali anaNa au malelaha.

³³Barana mampokaelu anu-anuna tauna ntanina, nodo salaka, bulawa ba hampi.

³⁴Niisato halalu, mobagona haduduangku bona kubuku meholo hinangkana au kiparaluu.

³⁵I paka-pakana, kupopaitaamokau noumbake hangangaa mobago bona motulungike ranganta au bara rabuku. Nikatuinao liliu lolitana Pue Yesu au manguli, ‘Morasimi tauna au mokira pane tauna au modoko.’ ”

³⁶Karoona Paulu mololita, molingkudumi hai rangana hai ope-ope tauna au hangko i Epesu, hai mekakaemohe.

³⁷Moteriamohe ope-ope mokalapui Paulu, rauliangaa, “Maroa-roako i rara.”

³⁸Au mopakasusa ntepuu lalunda, iami lolitana Paulu au manguli kadanapi ina raita. Hangko inditi, Paulu raporangai duuna mesawi i kapala tahi.