Read Napu Suro 21 Bible Online

Suro 21 - Napu bible

Suro 21

¹Karoongki mepalakana i penatua au hangko i Epesu, kipalehimohe inditi hai mopaliliungkai polumaongki lao i tampo Siria. Mengkahemongkai i kapala tahi lao i lewuto Kos, hai kahalona hawengkai i lewuto Rodos. Hangko inditi, liliumongkai lao i boea Patara.

²I Patara, molambingkai hambua kapala tahi au ina lao i Fenisia i tampo Siria. Mewali, mesawimongkai mopaliliu polumaongki.

³I tanga polumaongki, moitangkai lewuto Siprus ntanda i kabeongki. Bara mahae hangko indo, hawemongkai i tampo Siria. Mendaulungkai hangko i kapala tahi i wanua Tirus, lawi antia kapala hangangaa rapopendaulu.

⁴Inditi, mosondakingkai to Sarani hai maidangkai irihira haminggu kamahaena. Anti peninina Inao Malelaha, rangangki i Tirus mampopaingaa Paulu bona inee lao i Yerusale.

⁵Agaiana i temponami kapala tahi iti meangka, kiulimi batengki pea liliu lao i Yerusale. Mewali, ope-ope rangangki hai towawinenda hai ananda raporangaingkai lao i raoa wanua. I wiwi ntahi, molingkudu sambelamongkai hai mekakae.

⁶Karoongki mekakae, mombetabemongkai, hai mengkahengkai i kapala tahi. Ihira au maihe meanti mesulemohe i sounda.

⁷Hangko i Tirus, liliumongkai hawe i wanua Ptolemais. Inditi mosondakingkai halalu hampepepoinalaingki hai kipombetabeahe. Hambengiangkai maida irihira.

⁸Kahalona, meangka mbulimongkai lao i wanua Kaisarea. Inditi maidangkai i souna Pilipu. Pilipu iti, hadua topobambari Ngkora Marasa, hai ia wori hadua hangko i tauna au pitu au rapilei i Yerusale hangkoia modurei surona Pue.

⁹Ara anana iba towawine bara manihe motambi, ope-opehe mewali nabi to Sarani.

¹⁰Bahangkiami alongki i souna Pilipu, hawemi hadua nabi to Sarani hangko i Yudea, hangana Agabus.

¹¹Ia mangala pampouna Paulu, napopohilu bitina hai taiena haduduana. Roo indo, Agabus mololita, nauli, “Idemi lolitana Inao Malelaha: ampu pampou ide ina rahaka to Yahudi i Yerusale. Ia ina rahilu node, hai rahuhu i tauna au barahe to Yahudi.”

¹²Kakihadina nodo, ikami hai rangangki i Kaisarea, merapi i Paulu bona inee mpuu lao i Yerusale.

¹³Agaiana nahanairingkai, nauli, “Moapari hai moteriakau? Ineekau mopamalede lalungku! Kehapiri rahiluna ba rapapate mpuuna anti peulangku i Pue Yesu, masilolongamona lao i Yerusale.”

¹⁴Anti kadana napokana pekontoki, ido hai barapi kipari-pari kikonto. Kiuli pearai, “Peundeana pea Pue au mewali.”

¹⁵Roo indo, mopasilolongamongkai antiaki pane meangkamongkai lao i Yerusale.

¹⁶Bahangkia halalu hampepepoinalaingki hangko i Kaisarea lao worihe hihimbela hai ikami bona raporangaingkai duuna hawe i sou paidaangki i Yerusale. Sou paidaangki iti iami souna hadua to Siprus au mahaemi mepoinalai i Yesu, hangana Manason.

¹⁷Kahawengki i Yerusale, halalu hampepepoinalaingki modoko maroangkai hai matana lalunda.

¹⁸Kahalona laomongkai hihimbela hai Paulu mosondaki Yakobu, penatua i Yerusale. Ope-ope tadulako ntanina teruhu worihe hihimbela hai Yakobu.

¹⁹Karoongki mombetabe, Paulu motuntuahe ope-ope au nababehi Pue Ala iria i tempona mobambari Ngkora Marasa i tauna au barahe to Yahudi.

²⁰Karahadina lolitana Paulu, motoiamohe Pue Ala. Hangko inditi, mopahawehe lolita ide i Paulu, rauli, “Halalu bona nuisa, isabunami halalunta to Yahudi au mepoinalai i Yesu. Hai mampeulai mani worihe Aturana Musa hangko i lalunda.

²¹Agaiana mohadimohe bambari kana irio. Rauli, nupaturohe to Yahudi au mampogaloa tauna au barahe to Yahudi bona barapohe mampeulai Aturana Musa. Rauli, nupaturohe bona ineehe motile ananda hai ineehe mampeulai adanda toiorunta hangkoia.

²²Mewali noumbami? Lawi batena ina rahadi kahawemu inde.

²³Agina nupeulai paturongki ide: arahe iba rangangki inde au roomohe modandi hai mosumpa i Pue Ala.

²⁴Mewali, hangangaa laoko hihimbela hai ihira i Souna Pue Ala mobabehi ada agama mpobahoi wata, hai hangangaa nubaiari holo binata popenombanda bona peisamohe mogundi weluanda moula dandinda. Ane nodo, ina manoto i ope-ope tauna kadana tou bambari au rahadi kana i pepaturomu. Lawi nupeulaitomani Aturana Musa.

²⁵Mewali, itimi paturongki irio, halalu. Agaiana i tauna au barahe to Yahudi au mepoinalai i Yesu, roomohe kipakatua sura mopahaweahe pobotusingki bona ineehe moande paande au rapopenomba i anitu, hai inee worihe maande wahe ba bau au bara mani hampai raingihi wahena, hai bona ineehe mobabehi au merikai.”

²⁶Napeulai mpuu Paulu paturonda iti. Ido hai kahalona laomi hihimbela hai rangana au iba mobabehi ada agama mpobahoi wata. Roo indo, mesuami Paulu i lalu Souna Pue Ala mopahawe i tadulako mpenomba kaimpirana ina hopo alo-alo pobahoi watanda. Lawi ane hopomi tempo pobahoi watanda, Paulu hai rangana au iba iti hangangaa mesua i lalu Souna Pue Ala hai moantihe popenombanda hadua-hadua.

²⁷Ina hopomi pitu alona au rapakanoto, ara bahangkia to Yahudi hangko i propinsi Asia au moita Paulu i Souna Pue Ala. Ihira mohuwekihe lalunda tauna bosa bona mohakahe Paulu,

²⁸monganga-ngangahe, rauli, “Halalu-halalu to Yahudi! Maimokau. Nidureingkai! Idemi tauna au lao iumba-umba pea mopahawe i ope-ope tauna paturona au moewake, mosapuaka Aturana Musa hai au mopakedai Souna Pue Ala ide! Nodo wori, ia moanti mai tauna au barahe to Yahudi i lalu Souna Pue Ala, mopakedai sou au malelaha ide.”

²⁹(Mololitahe nodo, lawi inona moitahe Tropimus mohimada hai Paulu i wanua. Rapehangu Tropimus naantimi Paulu i lalu Souna Pue Ala. Tropimus iti, to Epesu, bara to Yahudi).

³⁰Hangko inditi, mogewo-gewomohe tauna i humalele Yerusale, hai mokoloromohe tauna bosa lao i Souna Pue Ala. Rahakami Paulu hai rabisoso hangko i lalu Souna Pue Ala. Roo indo, liliu babaka Souna Pue Ala ratuko.

³¹Tanganda tauna bosa ina mopapate Paulu, hawemi bambari i tadulako surodado to Roma kaarana posisala au mewali i Yerusale.

³²Mewali, kapala tadulako surodado iti hoholigami moanti bahangkia kapala tadulako hai surodadonda, laohe monontohi tauna bosa iti. Karaitana tauna bosa kahawenda surodado iti, liliuhe mengkaroo mowombe Paulu.

³³Kapala tadulako surodado iti lao mohaka Paulu hai motudu surodadona bona motaka taiena Paulu hai rante. Roo indo, ia mekune, “Hema tauna ide? Apa au nababehi?”

³⁴Arahe au mohanai node, ara worihe au mohanai nodo. Anti pogewo-gewonda, bara naisa apa katotouana au mewali inona. Ido hai motuduhe surodadona moanti Paulu lao i sou surodado bona raparesa inditi.

³⁵Kahawenda i tuka sou iti, rumpu ntepuumohe tauna bosa rapeinao mohepa-hepa Paulu, ido hai surodado iti moangkahe Paulu rakowa.

³⁶Tauna bosa meula liliuhe, hai monganga-ngangahe, rauli, “Nipapate peamide!”

³⁷Ina mesuamohe i lalu sou surodado, nauli Paulu i kapala tadulako surodado, “Ba peisa wongkoia mopahawe irihira hantepo rontepo lolita?” Nauli tadulako surodado iti, “Nuisariwei basa Yunani!

³⁸Ane nodo, manoto barako to Masiri au mohuweki lalunda tauna bosa hai moanti iba sabuna topeewa lao i pada wungi.”

³⁹Nahanai Paulu, “Iko to Yahudina, hangko i Tarsus, wanua au tehanga i tampo Kilikia. Kuperapi bona niwei wongkoia tempo mopahawe lolitangku i tauna bosa.”

⁴⁰Mewali, raweimi Paulu tempo bona mololita. Ido hai meangkami Paulu i tuka moona taiena mopakandii tauna bosa. Mandiimohe, mepongkami Paulu mololita i lalu basanda to Yahudi.