Read Napu Suro 22 Bible Online

Suro 22 - Napu bible

Suro 22

¹Nauli Paulu, “Uma-uma, halalu-halalu! Nipehadingi wongkoia, lawi ina kuuliangaakau notongku.”

²Karahadina tauna bosa Paulu mololita i lalu basanda to Yahudi, mandii mpuumohe. Napaliliumi Paulu lolitana, nauli,

³“Iko to Yahudina. Boea karapoanakangku, Tarsus i tampo Kilikia, agaiana hangko koi-koi peamona maidamona inde, i Yerusale. Mosikolana inde, napaguru maroana hadua guru au rabila ntepuu, hangana Gamaliel. Napaturo ntepuuna ope-ope atura au naweihe Musa i toiorunta hangkoia hai madotana mampeulai ope-ope aturana Pue Ala, nodo ikamu.

⁴Hangkoia mampopeahi-ahina tauna au mampeulai Paturona Yesu. Arahe au kupapate. Ara wori bosa tauna au kuhaka hai kutarunggu, maroa tobalilo maroa towawine.

⁵Tadulako Mpenomba Mahile hai ope-ope tadulako agama peisa mopakanoto katouna ide lolitangku. Barana modongko, lawi hangkoia ihirami au moweina sura kuasa au mopaliuna lao i halalunta to Yahudi i wanua Damsik. Tunggaiaku lao i Damsik bona mohakana to Sarani au ara inditi, hai kuantihe i Yerusale bona rahuku.”

⁶“Tanga pualo, i lalu polumaongku iti, hungkumongkai i wanua Damsik. Unga pea ara au mewangka hangko i langi au motolelikina.

⁷Madungkana, hai mohadina hambua wotu au manguli, ‘Saulu, Saulu, moapari hai nupopeahi-ahiNa?’

⁸Kupekune: ‘HemaKo?’ Nahanaina, nauli, ‘Ikomi Yesu to Nasare au nupopeahi-ahi.’

⁹Rangangku moita worihe au mewangka iti, agaiana bara raisa apa au nauliangaana wotu iti.

¹⁰Roo indo, kuuli, ‘Pue, apa au hangangaa kubabehi?’ Nahanaina Pue, ‘Mearomoko hai pulomoko lao i wanua Damsik. Indolou ina rapahaweako ope-ope au natuduako Pue Ala bona nubabehi.’

¹¹Anti pewangka iti inona, makaindimi petotokingku. Ido hai ranini pearaina rangangku hawe i wanua Damsik.

¹²I Damsik, ara hadua tobalilo au rahanga Ananias. Tauna iti, manoto, hai maroho peulana i Aturana Musa. Ia rabila ope-ope to Yahudi au maida i Damsik.

¹³Maimi Ananias meangka i holangku, nauli, ‘Halalungku Saulu, meita hulemoko!’ I tempo iti pea womi, meitamona, hai kuitami Ananias.

¹⁴Roo indo, nauliangaa mbulina, ‘Pue Ala au rapenombai toiorunta hangkoia mopileimoko bona nuisa apa peundeaNa. Napileiko bona moitako Yesu, Hawina Pue Ala au manoto, hai bona nuhadi lolitaNa.

¹⁵Oiomi au ina mewali sabiNa mopahawe i ope-ope tauna apa au nuita hai au nuhadimi.

¹⁶Mewali, apa mani au nupegia? Meangkamoko hai laomoko rariu. Mekakaemoko i Pue Yesu bona Naampungi dosamu.’ ”

¹⁷“Mewali, hangko inditi, mesulemona lao i Yerusale, hai tangangku mekakae i Souna Pue Ala, kuita hambua pampetudungia.

¹⁸Kuita Pue Yesu mololita iriko, Nauli, ‘Holigamoko padu hangko i Yerusale, lawi bara ina rapoinalai to Yerusale posabimu kana Iriko.’

¹⁹Kuhanai, ‘Pue, hangangaa radokona. Lawi tauna inde moisa mpuuhe babehiangku hangkoia. Raisa noumba kalaongku i sou penombaa mohaka hai mopapahaihe tauna au mepoinalai Irio.

²⁰Nodo wori, i tempona sabiMu Setepanu rapapate, ara worina indo hai kupokana karapapatena; ikomi au mokampai hampinda tauna au mopapate.’

²¹Roo indo, nauli mbuli Pue, ‘Hangangaa meangkako, lawi Kutuduko lao i tampo au karao, i tauna au barahe to Yahudi.’ ”

²²Tauna bosa au tanganda mampehadingi Paulu mololita unga peahe monganga-nganga, lawi mohadihe lolitana paulu, au manguli kaina laona i tauna au bara to Yahudi. Mongangahe masisimbuku, rauli, “Nipapate peami! Barapi hintoto tuwo!”

²³I pepakoinda iti, motendemohe kumbanda hai mohawukahe awu anti kamasodonda.

²⁴Ido hai kapala tadulako surodado iti motudumi surodadona moanti Paulu mesua i sounda surodado bona rapapahai hai raparesa bona raisa pongkana apa au rakahihia to Yahudi.

²⁵Hawemohe inditi, ratakami Paulu bona rapapahai. Ido hai mololitami Paulu i hadua tadulako surodado au ara i holana, nauli, “Peisa pae hadua to Roma rapapahai ane bara mani raparesa hai rabotusi kara-karana?”

²⁶Kanahadina tadulako iti lolitana, laomi i toiwongkona, nauli, “Tua, moapari hai nutudungkai mopapahai tauna iti? Tauna iti to Roma!”

²⁷Roo indo, kapala tadulako surodado iti lao i Paulu, napekune, “Nuuliangaana, to Roma mpuuko pae?” Nahanai Paulu, “Tou.”

²⁸Nauli kapala tadulako surodado iti, “Masuli kakubaiarina i topoparenta bona mewalina to Roma.” Nahanai Paulu, “Agaiana iko, bara paraluu kubaiari lawi rapoanakana i Roma.”

²⁹Roo nodo, mousulimohe tadulako surodado au ina moparesa Paulu hai langa worimi kapala tadulako surodado iti. Lawi iami au motudu tauna mohilu Paulu, agaiana i tempo iti bara naisa katoRomana.

³⁰Kapala tadulako surodado iti mampeinao moisa ba apa mpuu salana Paulu pane rasalai to Yahudi. Ido hai kahalona, nakakiomohe ope-ope kapala-kapala tadulako mpenomba hai tadulako agama Yahudi au ntanina bona teruhuhe. Roo indo, rakabahami petakana Paulu hai raanti lao rapombelindoa.