Read Napu Suro 23 Bible Online

Suro 23 - Napu bible

Suro 23

¹Kahawena Paulu i poteruhuanda, ia mototokihe ope-ope tadulako iti, nauliangaahe, “Halalungku! Duuna ide-ide, mengkoruna i Pue Ala moula kabulana lalungku.”

²Tangana Paulu mololita nodo, Tadulako Mpenomba Mahile Ananias motuduhe tauna au i holana Paulu, mohapa humena Paulu.

³Mehana Paulu i Tadulako Mpenomba Mahile, nauli, “Ina Nahapa woriko Pue Ala, maroa i raoa peako! Kara-karangku hangangaa nubotusi moula Aturana Musa, agaiana oio haduduamu au moliungi Aturana Musa, lawi nutuduhe tauna mohapana!”

⁴Hangko inditi, ara hadua tauna i holana Paulu au mouliangaa, “Bai mpuuko mohowara nodo i Tadulako Mpenomba Mahile au mobago i Souna Pue Ala!”

⁵Nahanai Paulu, “Halalu-halalu bara wongkoia kuisa kaiana Tadulako Mpenomba Mahile. Ara mpuu woa au teuki i lalu Sura Malelaha node: ‘Ineeko motunda-tunda tadulakomu.’ ”

⁶Naisa Paulu, i olonda tadulako iti, arahe au mampeulai pepaturonda toSaduki, ara worihe au mampeulai pepaturonda toParisi. Ido hai mololita i ope-ope tauna masisimbuku, nauli, “Halalu! Iko toParisina, pemuleanana toParisi. Panena rapohuda-hudaa inde, lawi kupoinalai, tauna au mate, batena tuwo hule.”

⁷Karahadina toParisi hai toSaduki lolitana iti, mombehanaimohe hai barapohe hintuwu.

⁸Pombehanainda iti, lawi toSaduki mosapuaka katuwonda hule tauna au mate, hai barahe mampoinalai kaarana malaeka, hai bara worihe mampoinalai kaarana tanoana. Agaiana toParisi, batenda mampoinalai ope-ope iti.

⁹Kahopoana, rumihimi pombehanainda. Ara bahangkia guru agama meangka sambelahe hai toParisi hai mehanaihe, rauli, “Moula pelambiaki, tauna iti bara masala. Babila ara malaeka ba tomate au mololita iria.”

¹⁰Hangko inditi, karurumihiari pombehanainda, alana kapala tadulako surodado iti mampokalanga Paulu ina rapombehepa-hepai. Ido hai natudumohe surodadona lao mangala Paulu raanti hule i sou surodado.

¹¹Kaindi iti, i karombenginami Paulu i sou surodado iti, unga pea Pue Yesu meangka i holana Paulu, Nauli, “Pakaroho lalumu. KuposabimoKo inde i Yerusale, hai batena ina kuposabi woriKo i wanua Roma.”

¹²Kahalona, mogombo ngkandiimohe bahangkia to Yahudi. I pogombonda, modandimohe hai mosumpahe, rauli kadanda hampai maande ba maenu ane bara manihe mopapate Paulu.

¹³Kabosanda au mogombo iti, iba pulonda labi.

¹⁴Mewali, laomohe au mosumpa iti i kapala-kapala tadulako mpenomba hai totosaenda to Yahudi, rauli, “Modandi hai mosumpamongkai, barangkai hampai maande apa-apa ane bara maningkai mopapate Paulu.

¹⁵Mewali, kiperapi i uma-uma hai tadulako-tadulako i Pogombo Mahile Agama mopakatukau sura i kapala tadulako surodado to Roma, niperapi bona Paulu raanti hule i lindomi. Niuli ina niparesa mbuli kara-karana agaiana masilolongamongkai ina mopapate i tanga rara.”

¹⁶Agaiana tunggaianda iti nahadi pinoanana Paulu. Ido hai nagagumi lao i sou surodado mopahawe tunggaianda i Paulu.

¹⁷Roo indo, Paulu mokakio hadua tadulako surodado, nauliangaa, “Nuporangai anangkoi ide lao i tadulakomi, ara au ina napahawe.”

¹⁸Tadulako surodado iti mamporangai mpuumi anangkoi iti lao i tadulakona, nauli, “Tua, Paulu, au rataha inde, merapi bona anangkoi ide mai kuanti irikita. Ara au ina napahaweake.”

¹⁹Mewali, kapala tadulako surodado iti mokingki taiena anangkoi iti, hai naanti lao i raoa, napekune, “Apa au ina nupahawe iriko?”

²⁰Nahanai anangkoi iti, nauli, “Tua, arahe to Yahudi au mogombo. Tunggaianda, ina raperapi irio bona kahalo pinoumangku raanti i lindo tadulakonda to Yahudi, rauli bona raparesa mbuli kara-karana.

²¹Inee nupeulai pamperapinda, lawi arahe tauna au iba pulonda labi mentabungihe i rara moawunga Paulu. Modandi hai mosumpamohe bona barahe hampai maande ba maenu ane bara manihe mopapate pinoumangku. Masilolongamohe, mampegia pearaihe hanaina lolitanda hangko irio, Tua.”

²²Nauli kapala tadulako surodado iti, “Inee nupopololita kanukewanami tunggaianda iti.” Roo indo, anangkoi iti natudumi mesule.

²³Roo indo, kapala tadulako surodado iti mokakio rodua tadulako surodado, nauliangaahe, “Pasilolonga rongatu surodado au meahe, pitu pulona surodado au modara, hai rongatu surodado au metawala. Deade kaindi tinti hahio, meangkamokau ope-ope lao i Kaisarea.

²⁴Nipasilolonga wori dara au peisa napesawii Paulu, hai nianti lao i Gubernur Feliks nikampai bona dati marugi i rara.”

²⁵Roo indo, kapala tadulako surodado iti mouki hambua sura hawe i Gubernur, node wotuna:

²⁶“Gubernur Feliks au rabila. Tabea hangko iriko, Klaudius Lisias.

²⁷Ara hadua tauna au rahaka to Yahudi hai ina rapapate. Agaiana kuhadi tauna iti to Roma. Ido hai laona hihimbela hai surodadongku, kiala hoholiga hangko i olonda.

²⁸Anti kakupeinaona moisa apa au rasalaia, ido hai kuanti lao i lindo tadulakonda to Yahudi.

²⁹Raparesami, agaiana bara ara salana ralambi au hintoto rapapatea ba ratarunggua. Rasalai pea moula ada agamanda.

³⁰Roo indo, kuhadi kaarana tunggaianda to Yahudi au kadake iria. Ido hai Paulu kupopeanti irikita, Tua Gubernur. Hai kuuliangaahe iwalina inde, hangangaa laori rasalai i lindomu.”

³¹Karoona Kapala tadulako surodado mouki sura iti, lao mpuumohe surodadona moula hawana toiwongkonda. Kaindi iti, raantimi Paulu lao i wanua Antipatris.

³²Kahalona madondo, surodado au molumao peahe, mesulemohe lao i sou surodado. Surodado au modara moantimohe Paulu liliu lao i Kaisarea.

³³Kahawenda i Kaisarea, sura iti raweimi Gubernur, hai rahuhu wori Paulu i kuasana Gubernur.

³⁴Karoona Gubernur mobasa sura iti, napekunemi i Paulu katoapana. Kanaisana Gubernur, Paulu hangko i tampo Kilikia,

³⁵nauli, “Ane nodo, ina kuparesa mpuu kara-karamu ane hawehe iwalimu.” Roo indo, natudumi surodadona mokampai Paulu i lalu sou mahile au naaro Datu Herode hangkoia.