Read Napu Suro 24 Bible Online

Suro 24 - Napu bible

Suro 24

¹Lima alona hangko indo, Tadulako Mpenomba Mahile Ananias hai bahangkia tadulakonda to Yahudi lao i Kaisarea hihimbela hai hadua tauna au mapande mololita, hangana Tertulus. Kahawenda inditi, laomohe i lindona Gubernur Feliks mopahawe pesalainda.

²Gubernur Feliks motudumi tauna moanti Paulu i lindona, hai Tertulus rawei tempo mololita. Tertulus mepongka mopahawe pesalainda kana i Paulu, nauli. “Umangki Gubernur Feliks au kibila! Ikami, taunamungkai, tuwongkai hangko i kamaroana poparentamu Gubernur. Anti kamapandemu moparenta, maroa katuwongki i humalele tampoki ide.

³Ope-ope ide kiwoli mpuu i tanoanangki, hai barangkai oha-oha mouli ngkaia kamaroana i Tua Gubernur.

⁴Agaiana bona datingkai ngkaia motende mbero tempomu, kiperapi ahi hangko i Tua bona nupehadingi wongkoia lolitangku au sosoe ide.

⁵Paulu ide iami topegero-gero i ope-ope boea. Iumba-umba pea, ia mohuweki lalunda to Yahudi bona moewahe topoparenta. Hai ia idemi hadua tadulakonda tauna au mampeulai paturona Yesu to Nasare.

⁶Apa mani, ia mampeinao mopakedai Souna Pue Ala. Ido hai kihakami. (Arami tunggaiaki mampohuda-hudaa kara-karana moula atura agamangki.

⁷Agaiana kapala tadulako surodado au rahanga Lisias moala hoholiga hangko i taiengki.

⁸Hai ia motudu bona hema au mampeinao mosalai Paulu hangangaa mai i Uma Gubernur.) Mewali, ane nuparesa deade, ina nuhadi mpuu hangko i humena katouna ope-ope lolitangki.”

⁹Ope-ope to Yahudi au ara inditi, meula worihe mosalai Paulu hai mampokana lolitana Tertulus.

¹⁰Roo indo, Gubernur moonami taiena bona Paulu mololita. Mololitami Paulu, nauli, “Matana mpuuna, lawi raweina tempo mopahawe notongku i lindona Tua Gubernur. Lawi kuisa, i parenami Gubernur mewali topebotusi i tampoki.

¹¹Agina nuparesa lolitangku ide: hangko hampulo hai rongalo au liu, laona i Yerusale menomba i Souna Pue Ala.

¹²Barana hambela ralambi mombehanai ba mohuweki lalunda tauna bosa i Souna Pue Ala ba i sou penombaa, ba iumba-umba pea i lalu wanua.

¹³Bara wori ara hadua tauna au peisa mopatongawa katouna popahawenda inona au rasalaiana.

¹⁴Agaiana kupangaku i Tua: kamampeulaingku Paturona Pue Yesu au rasapuaka iwalingku. Moula paturo iti, menombana i Pue Ala au rapenombai toiorungki hangkoia, hai batena kupoinalai ope-ope au teuki i lalu Aturana Musa hai Sura Nabi-Nabi.

¹⁵Peharungangku i Pue Ala batena himbela hai peharunganda iwalingku ide: kupoinalai kaina arana tempo au napakanoto Pue Ala mopatuwo hule ope-ope tomate, maroa au manoto babehianda, maroa au kadake babehianda.

¹⁶Ido hai mobabehi liliuna apa au maroa bona kuisa i lalungku kadana ara apa-apa au peisa raraiana, maroa i peitana Pue Ala, maroa i peitana manusia.

¹⁷Bahangkia parena, paduna hangko i Yerusale. Roo indo, lao hulena bona moantina doi petulungi i halalungku to Yahudi hai moantina popenombaku i Pue Ala.

¹⁸Tangangku moanti popenombaku iti, bahangkia to Yahudi molambina i Souna Pue Ala. I tempo iti, roomona mobabehi ada mpobahoi wata moula ada agamangki. Bara bosa tauna au hihimbela hai iko i tempo iti, hai barato wori ara pogewo-gewo.

¹⁹Agaiana inditi arahe bahangkia to Yahudi hangko i propinsi Asia. Katouana, keihirari au hangangaa mai mosalaina i Tua Gubernur, ane ara mpuu salangku irihira.

²⁰Agaiana bara ara inde. Mewali, agina iwalingku au ara inde mouli ide-ide apa kakadakengku au ralambi i karaparesangku i lindona tadulako agama i Yerusale.

²¹Batena pea lolitangku ide au rasalaiana, kuuli masisimbuku i lindonda: ‘Ide iko raparesana, lawi kupoinalai tauna au mate batena tuwo hule.’ ”

²²Agaiana Gubernur Feliks moisa ntepuu apa au rapoinalai to Sarani kana i Yesu. Ido hai nauli, “Hampa indemi hampai pohuda-hudanta. Kubotusi rai kara-kara ide, ane hawe kapala tadulako surodado Lisias.”

²³Roo indo, mampohawaami tadulakonda surodado bona mokampai Paulu. Agaiana nauri rakampai, bara nodo tauna au ratarunggu. Lawi peisato molulumao, hai rangana rapaliuhe lao mowei apa au naparaluu.

²⁴Bahangkia alona hangko inditi, hawe worimi Gubernur Feliks hai towawinena au rahanga Drusila. Drusila iti to Yahudi. Feliks motudu surodadona moanti Paulu i lindonda bona rapehadingi apa au napahawe kana i pepoinalaina i Kerisitu Yesu.

²⁵Paulu mololita i Feliks node: ikita hangangaa manoto babehianta, hai hangangaa tabuku morempeki peundeana lalunta, lawi ina hawe Alo Pehukuna Pue Ala. Kanahadina Feliks lolita iti, langami, pane nauli, “Nodomi hampai! Laomoko! Kukakio peako deade, ane ara katepakangku.”

²⁶Katouana, naharunga Feliks kaina naweina Paulu doi bona rakabaha. Ido hai Paulu paka nakakio molololita.

²⁷Liumi rompare, Gubernur Feliks napahurumi Perkius Festus. Anti kanapeinaona Feliks mangala lalunda to Yahudi, ido hai Paulu napogiangaa ratarunggu liliu.