Read Napu Suro 25 Bible Online

Suro 25 - Napu bible

Suro 25

¹Talumi alona moparenta i propinsi iti, Festus padu hangko i wanua Kaisarea lao i Yerusale.

²Kahawena inditi, kapala-kapala tadulako mpenomba hai tadulakonda to Yahudi laomohe i Festus mopahawe pesalainda kana i Paulu.

³Merapihe i Festus bona i kamaroana laluna ia motudu tauna moanti Paulu lao i Yerusale. Moleri akalanda pea bona Paulu rapapate i tanga rara.

⁴Agaiana nahanaihe Festus, “Paulu hangangaa ratarunggu i Kaisarea hai iko ina polo mesuletona inditi.

⁵Aginami tadulakomi lao hihimbela hai iko i Kaisarea bona kupehadingi lolitami, ane ara mpuu babehiana au masala.”

⁶Festus maida haminggu labi i Yerusale, hangko mesuleri lao i Kaisarea. Kahalona, nagulumohe ope-ope tadulako, hai napohawaahe bona Paulu raanti mai i poteruhuanda.

⁷Kahawena Paulu inditi, aramohe to Yahudi au hangko i Yerusale meangka motoleliki Paulu, hai rasalai. Ngkaia pakana pepakanawo au kadake au raraia, agaiana popahawenda iti bara peisa rapakanoto.

⁸Roo indo, Paulu mopahawe notona, nauli, “Bara mpuu huba haodi kamasalangku! Barana moliungi aturanda to Yahudi ba mopakedai Souna Pue Ala ba moewa Datu Mahile Kaisar i Roma!”

⁹Anti kanapeinaona Festus moala lalunda to Yahudi, ido hai nauli i Paulu, “Arako madota lao i Yerusale bona kara-karamu kupohuda-hudaa indolou?”

¹⁰Nahanai Paulu, “Ide-ide, meangkana i lindona sarungkorona Kaisar, datunda to Roma. Indemi hangangaa rabotusi kara-karangku. Nuisa mpuu, Tua Gubernur, kadana ara salangku i to Yahudi.

¹¹Ane tou mpuu ara salangku au hintotona rahukua mate, bara moapa rapapatena. Agaiana ane bara tou popahawenda to Yahudi, bara ara hadua tauna au peisa mohuhuna i lalu taienda. Hangangaa kupahawe kara-karangku i Kaisar!”

¹²Kanahadina Festus lolitana Paulu, mololitami i hangka tadulakona. Roo indo, mouliangaa Paulu, “Anti pamperapimu mopahawe kara-karamu i pebotusiana Kaisar, batena ina lao mpuuko i wanua Roma molindo Kaisar.”

¹³Bahangkia alona hangko inditi, laomohe Datu Agripa hai Bernike adina i wanua Kaisarea mampombelambia Festus anti karaangkana mewali gubernur.

¹⁴Bahangkiami alonda i Kaisarea, Festus mopahawe kara-karana Paulu i Datu Agripa, nauli, “Ara inde hadua tauna au ratarunggu i tempo poparentana Feliks.

¹⁵I tempoku ara i Yerusale, kapala-kapala tadulako mpenomba hai totosaenda to Yahudi mopahawehe perainda i tauna ide, hai merapihe bona Paulu rahuku.

¹⁶Agaiana kuhanaihe node: moula aturanda to Roma, tauna au rasalai bara mani peisa rahuhu i iwalina, ane bara mani rapohuda-hudaa kara-karana hai rapopombelindo hai tauna au mosalai. Ia hangangaa rawei wori tempo mopahawe notona.

¹⁷Hangko inditi, bahangkia tadulakonda to Yahudi meulahe mai iriko hangko i Yerusale. Kahalona, kupohawaamohe tauna moanti mai Paulu bona rapohuda-hudaa kara-karana.

¹⁸Ope-ope topesalai iti aramohe i lindoku mopahawehe pesalainda. Kupehangu ara babehia kadake au rasalaia. Agaiana pesalainda iti, bara nodo au kupekiri.

¹⁹Au kulambi, posisisalana pea pampekirinda i agamanda. Mampombehanaingihe hadua tauna au rahanga Yesu. Yesu iti mate, agaiana nauli Paulu, tuwo hule.

²⁰Mewali, wulina mobotusi kara-karana iti. Ido hai kupekune i Paulu, kuuliangaa: ‘Madotako lao i Yerusale bona kara-karamu rapohuda-hudaa indolou?’

²¹Agaiana naperapi bona kara-karana rapahawe i Datu Mahile Kaisar. Hai naperapi wori bona rakampai duuna kara-karana nabotusi Kaisar. Ido hai kutudumi bona Paulu rataha liliu duuna raanti lao i Kaisar.”

²²Hangko inditi, Datu Agripa mouliangaa Festus, “Kupeinao wori mohadi lolitana.” Nahanai Festus, “Kahalo rai, nuhadi pololitana.”

²³Kahalona, hawe mpuumohe Datu Agripa hai Bernike adina, radupa hai ngkaia pakana pebila. Mesuamohe i lalu sou poteruhua hihimbela hai tadulako surodado hai totosae i wanua. Festus mampohawaamohe tauna bona Paulu raanti mai molindohe.

²⁴Hangko inditi, Festus mololita nauli, “Datu Agripa, uma-uma hai ope-ope au teruhu inde! Tauna ide rasalai ope-ope to Yahudi, maroa i Yerusale, maroa inde. Monganga-ngangahe merapi iriko bona tauna ide rahuku mate.

²⁵Nauri bara ara salana au kuhumba au hintoto rapapatea. Agaiana anti kanaperapina Paulu bona kara-karana rapahawe i Kaisar i wanua Roma, ido hai kupakanotomi bona Paulu raanti i Datu Mahile Kaisar.

²⁶Agaiana bara mani ara kanotoana apa au ina kuuki i lalu surangku lao i Kaisar. Mewali, ido hai kuanti mai irikamu, lumbunami i Tua Datu Agripa au kubila. Tunggaiaku bona karoona poparesa ide, arami au peisa kuuki.

²⁷Lawi moula pelambiaku, bara hintoto tauna raanti lao i pebotusia Kaisar ane bara mani manoto apa au rasalaia.”