Read Napu Suro 26 Bible Online

Suro 26 - Napu bible

Suro 26

¹Roo indo, nauli Agripa i Paulu, “Ide-ide raweimoko tempo mouli notomu.” Paulu moangka taiena, hai mepongkami mopahawe notona, nauli,

²“Datu Agripa au kubila! Ioru kuuli, morasi mpuuna, lawi peisana mouli notongku i lindona Datu, mohanai ope-ope lolitanda to Yahudi iriko.

³Apa mani lawi naisa mpuu Datu ada to Yahudi hai paturo au rapombehanaingi. Ido hai kuperapi wongkoia bona sabarako mampehadingi notongku.

⁴Ope-ope to Yahudi moisa lolitakana katuwongku hungkaku mani mangura, lawi hangko koi-koipona maidamona i olonda hangka to Yahudingku i Yerusale.

⁵Mahaemi raisa to Yahudi babehiangku. Ane raunde, peisahe mopatuntu lolitakana katuwongku. Ide iko tuwona moula paturonda toParisi au rumihi poulanda ope-ope ada agamanda to Yahudi.

⁶Ido hai raparesana inde, anti peharungangku i dandina Pue Ala i toiorunta hangkoia.

⁷Dandina iti rapoinalai wori ope-ope halalunta to Yahudi au hampulo hai rontina au menomba liliuhe i Pue Ala. Datu au kubila, hangko i peharungangku iti, ido hai rasalaina to Yahudi.

⁸Hai ikamu halalungku to Yahudi, moapari pane bara nipoinalai kamakuasana Pue Ala mopatuwo hule tomate?

⁹Hangkoia moewa worina kuasana Yesu to Nasare.

¹⁰Hai iti kubabehi wori i Yerusale. I tempo iti, molambimona sura kuasa hangko i kapala-kapala tadulako mpenomba, hai bosa worihe to Sarani kutarunggu. Kupokana wori ane rahuku matehe.

¹¹Bosa belanda kupopeahi-ahi i lalu sou penombaa, hai kupari-parihe mosapuaka pepoinalainda i Yesu. Masodo mpuuna moitahe, ido hai hawena i boea-boea au karao mampopeahi-ahihe.”

¹²Napaliliumi Paulu mouli notona, nauli, “Datu au kubila, itimi tunggaiaku lao i wanua Damsik, lawi ratuduna hai raweina kuasa hangko i kapala-kapala tadulako mpenomba.

¹³Agaiana tempoku molumao lao i Damsik, pualomi i tanga rara, unga peana moita pewangka hangko i langi au melumbu hangko i pewangka alo. Nawangkahina hai ope-opehe hampopolumaongku.

¹⁴Madungkamongkai ope-ope hai kuhadimi hambua wotu au mololita iriko i lalu basanda to Yahudi, Nauliangaana: ‘Saulu, Saulu, moapa hai nupopeahi-ahiNa? Mapari mpuu lalumu, lawi moewa liliuko peniniNgku.’

¹⁵Mekunena: ‘hemako, Pue?’ MehaNa, nauli, ‘Ikomi Yesu, au nupopeahi-ahi!

¹⁶Meangkamoko! Kupatongawaako wataNgku, lawi ara tunggaiaKu irio: Kupileimoko mewali hawiNgku hai sabiNgku. Oio hangangaa mopahawe i tauna ntanina apa au nuitami i alo ide hai apa au Kupopaitaako i alo-alo au ina mai.

¹⁷Ina Kutuduko lao mobambari NgkoraKu i to Yahudi hai i tauna au barahe to Yahudi, agaiana rakahihiriko. Nauri nodo, batemu ina Kukabaha hangko i kuasanda.

¹⁸Idemi tunggaiaKu motuduko lao irihira bona tebungkahi matanda, hai mopalehihe kamakaindi lao i kamabaana, hai tekabahahe hangko i kuasana Datu Tokadake hai mepoinalaihe i Pue Ala. Mewali, anti pepoinalainda Iriko, teampungimi dosanda, hai mewalimohe taunana Pue Ala.’ ”

¹⁹“Datu Agripa au kubila, idomi hai kupari-pari mampeulai apa au nauliangaana Pue i lalu pampetudungiaNa iriko.

²⁰Ido hai kupahawe i ope-ope tauna, hangangaa mampenosoihe dosanda hai mengkoruhe i Pue Ala, hai hangangaa mobabehihe apa au maroa bona tongawa penosonda. Nguru-nguruna bambari iti kupahawe i wanua Damsik, roo indo i Yerusale hai i humalele tampo Yudea, hai i tauna ntanina au barahe to Yahudi.

²¹Ido hai rahakana to Yahudi i Souna Pue Ala. Rapeinaona rapapate,

²²agaiana nauri nodo, duuna ide-ide, Nakampaina Pue Ala, Hai peisa manina meangka inde mampololita posabikingku kana i Pue Yesu i ope-ope tauna, maroa i tauna au mapangka lantina, maroa i tauna biasa. Apa au kuuli ide, batena himbela hai apa au rapahawe amimi Musa hai nabi-nabi hangkoia

²³au manguli: Datu Topehompo hangangaa rapopeahi-ahi hai rapapate, hai Iami au nguru-nguruna tuwo hule hangko i kapate. Hai hangko indo, Ia mobambari Ngkora Marasa i ope-ope tauna, maroa to Yahudi maroa au barahe to Yahudi.”

²⁴Tangana mani Paulu mopahawe notona, mongangami Festus, nauli, “Magilako Paulu! Kapandemu iti au moantiko magila.”

²⁵Mehana Paulu, nauli, “Gubernur au kubila, bara wongkoia magila. Apa au kuuli ide tou hai hangko i pekiringku au manoto.

²⁶Naisa wori Datu Agripa pewalina au kuuli inona. Ido hai barana langa mololita nodo i lindona. Kupekiri bara ara au bara mani nahadi Datu Agripa, lawi ope-ope au mewali hangkoia iti bara tewuniangi.

²⁷Datu Agripa au kubila! Ba nupoinalai apa au rauli nabi-nabi hangkoia? Kuisa kanupoinalaina!”

²⁸Nahanai Datu Agripa nauli, “Nupehangu pae, holi-holi pewalingku to Sarani.”

²⁹Nahanai Paulu, “I tempo au hampalai ba i tempo au mahae, mekakaena i Pue Ala bona Datu hai ope-ope tauna au mampehadingi lolitangku alo ide ina mewali nodo iko, agaiana inee peakau hawe ratarunggu.”

³⁰Kahopoana, meangkamohe Datu Agripa, Gubernur Festus hai Bernike hihimbela hai ranganda, hai padumohe hangko i sou poteruhua.

³¹Hawemohe i raoa, mololitahe, rauli, “Tauna iti, bara woia ara salana au hintoto rahukua mate ba ratarunggu.”

³²Roo indo, mololitami Datu Agripa i Festus, nauli, “Moleri, tauna iti peisami rakabaha, ane kebara mohawira kara-karana i Kaisar.”