Read Napu Suro 28 Bible Online

Suro 28 - Napu bible

Suro 28

¹Hawemongkai i lorena, hangko kiisari lewuto iti rahanga Malta.

²Maroa mpuu lalunda ampu boea irikami. Radoko maroangkai, rapatuwoangkai api kipamindui, lawi mepongkami keuda hai makuli.

³Laomi Paulu mogulu daa-daangkau hai nawoli i tumu api. Kanawolina peami, unga pea mai mesuwu hambaa ile hangko i lalu daa-daangkau, lawi mamu nahonga api. Ile iti liliu motilo taiena Paulu.

⁴Karaitana ampu boea ile iti mengkalitoe i taiena Paulu, raulimi, “Manoto tauna iti topepapate! Peita, nauri bara molambi rugi i tahi, agaiana Anitu Topebotusi bara mampogiangaa tuwo!”

⁵Agaiana barato napomahai Paulu. Ile iti nawalentaha pea i lalu api.

⁶Rauli ampu boea iti, mawae pea deade taiena hai unga pea madungka mate. Mahaemi rapepegia, agaiana barato moapa-apa. Mewali tebalikimi pekirinda, rauli, “Ia hadua anitu!”

⁷Bara karao hangko inditi, ara halimbo bonde, bondena Publius, gubernur i lewuto iti. Anti kamaroana laluna, nakakiomongkai lao i souna, hai napotorarengkai i lalu talu alona.

⁸I tempo iti, umana Publius napawembe hai mahai taina. Ido hai laomi Paulu i paturuana umana Publius, napaga, hai napekakaea. Unga pea maoha.

⁹Roo indo, ope-ope tauna au mahai i lewuto iti maihe merapi tulungi i Paulu, hai napakaoha hahahe hangko i hakinda.

¹⁰Anti pebilanda tauna iti, raweingkai ngkaia anu-anunda. Hai i peangkaki, rabakuingkai, hai apa pea au kiparaluu raanti rawoli i lalu kapala tahi.

¹¹Handamongkai talu wulana i lewuto Malta, meangka mbulimongkai mesawi i kapala tahi au hangko i Aleksandria. Kapala tahi iti mahaemi mengkaroo i lewuto iti mampegia kaliuna tempo makuli. Hangana kapala tahi iti, Towalia Moropa.

¹²Mehupemongkai i wanua Sirakusa, hai maidangkai talu alona inditi.

¹³Hangko indo, kipaliliumi polumaongki menana i wiwi ntahi hawe i wanua Regium. Kahalona, himburu au maroa mewui hangko i Lau, hai i karongalona hawemongkai i wanua Putioli i tampo Italia.

¹⁴Inditi mampohidupaangkai bahangkia halalu hampepepoinalaingki. Rakakiongkai lao i sounda hai rapotorarengkai i lalu haminggu. Hangko inditi, molumaomongkai lao i Roma.

¹⁵I tanga rara maningkai, halalu hampepepoinalaingki au i Roma mohadihe kaina hawengki. Ido hai maimohe mepohidupaa i Pobalu-balua au rahanga Apius hai i Sou Pehupea Talu. I pohidupangki iti, Paulu motoiami Pue Ala, hai rapamatana laluna.

¹⁶Kahawengki i Roma, Paulu barapi ratarunggu. Ia rapaliu maida sadudua i sou, agaiana nakampai liliu hadua surodado.

¹⁷Liumi talu alona, Paulu mokakio totosaenda to Yahudi bona mai rapohidupaa. Kahawenda, mololitami Paulu irihira nauli, “Halalu-halalu, barato wongkoia masala i hangka to Yahudinta hai bara worina moliungi adanda toiorunta. Agaiana nauri nodo, batengku rahaka i Yerusale hai rahuhuna i topoparenta to Roma.

¹⁸Kara-karangku raparesa topoparenta to Roma, hai rapeinao pea mokabahana, lawi manotomi kadana ara salangku au hintotona rapapatea.

¹⁹Agaiana arahe to Yahudi hangko i Yudea au moewa liliuna. Ido hai kuperapi bona raweina tempo mohawira kara-karangku i Datu Mahile Kaisar. Nauri nodo, bara ara au kusalaiahe halalunta to Yahudi.

²⁰Kukakiokau maina nipohidupaa lawi kupeinao kupololitaakau kana i pepoinalaingku i Datu Topehompo au rapepegiami to Yahudi. Ido hai pane ratahana inde.”

²¹Rahanai to Yahudi iti, rauli, “Bara ara sura au kihumba hangko i Yudea au mampololita kana irio. Hai bara wori ara hadua tauna hangko inditi au mai moanti bambari ba mampololita dakemu.

²²Kipeinao mohadi kana paturo au nupoinalai iti. Lawi kihadi iumba-umba pea tauna mosapuaka paturo au nupoinalai iti.”

²³Roo indo, rapakanotomi alo poteruhuanda hai Paulu. Hawe mpuumi alo au rapakanoto, bosa tauna teruhu i paidaana Paulu. Mepongka madondo hawe kalumba, napakanotoahe Paulu kana i poparentana Pue Ala, hai nabasaahe Aturana Musa hai Suranda Nabi-nabi, bona manoto irihira kahemana Yesu bona mepoinalaihe Iria.

²⁴Arahe au mampoinalai lolitana, hai ara worihe au bara mampoinalai.

²⁵Anti posisalana pelambianda, ido hai magaramohe hangko i poteruhuanda iti. Agaiana hangko damanihe mogaa-gaa, nauliangaahe Paulu node, “Hintoto mpuu apa au nauli Inao Malelaha au napahawe nabi Yesaya i toiorunta hangkoia, node:

²⁶Nauli Pue Ala: ‘Laohe nuuliangaa to Yahudi node: Mehaditohe, agaiana bara raisa lempona. Meitatohe, agaiana bara raisa apa au mewali.

²⁷Lawi tuhumi lalunda, talinganda rasisingi, matanda rampidika. Lawi lohehe mototoki hai matanda, lohehe mohadi hai talinganda, lohehe mopakanoto lalunda. Kahopoana, barahe ina mesule Iriko, hai barahe ina Kuwei katuwo maroa.’ ”

²⁸Roo indo, nauli mbuli Paulu irihira, “Halalu bona niisa, ara Ngkora Marasa au mopakanoto rarana Pue Ala mohorema tauna hangko i huku dosanda. Ngkora Marasa iti rapahaweamohe tauna au bara to Yahudi. Ihirami au ina modoko bambari iti!”

²⁹[Karoona Paulu mololita nodo, padumohe to Yahudi hai mombehahanaihe.]

³⁰Roo indo, Paulu maida i Roma rompare kamahaena i hambua sou au nasaro. Matana laluna modoko tauna au mai mosondaki.

³¹Hai bara ara kalanga-langana mopahaweahe kana i poparentana Pue Ala hai kana i Pue Yesu Kerisitu. Hinangkana iti, bara ara au mosalempori.