Read Napu Suro 3 Bible Online

Suro 3 - Napu bible

Suro 3

¹Tinti talumi kalumba, Peturu hai Yohane laohe i Souna Pue Ala i tempona pekakaeanda to Yahudi.

²I babaka au rahanga Babaka Makara, ara hadua tobalilo au palu hangko i pesupaana. Alo-alona tauna iti raanti lao rapopohuda hungku i babaka iti i Souna Pue Ala bona merapi-rapi i tauna au mesua inditi.

³Kamoitana Peturu hai Yohane mesua, ia liliu merapi ahi irihira.

⁴Peturu hai Yohane mototoki topalu iti. Naulimi Peturu iria, “Peitangkai mai!”

⁵Natotoki mpuumohe manaa-naa, lawi naharunga ba ina molambi doi hangko irihira.

⁶Agaiana nauli Peturu, “Bara ara doi irikami. Agaiana apa au ara irikami, iti au kiweiko: i lalu hangana Yesu Kerisitu to Nasare, peangka hai lumaomoko!”

⁷Hangko inditi, Peturu mokingki taie koanana topalu iti bona meangka. Unga pea maroho bitina.

⁸Mesendemi meangka, hai molumao node hou node mai. Roo indo, mesuami i lalu Souna Pue Ala hihimbela hai Peturu hai Yohane, molumao hai melumpa-lumpa motoia Pue Ala.

⁹Bosa tauna moita topalu iti molumao hai motoia Pue Ala.

¹⁰Tingkara mpuuhe hai wuli lalunda moita au mewali iti, lawi raisa tauna iti iami topalu au merapi-rapi alo-alona i Babaka Makara i Souna Pue Ala.

¹¹Mewali, topalu au hangko rapakaoha iti meula liliu i Peturu hai Yohane. Kahawenda i tambale Souna Pue Ala au rahanga Tambale Salomo, bosa tauna mogaguhe, lawi tingkarahe.

¹²Kanaitanda Peturu tauna bosa iti, nauliangaahe, “Halalungku to Yahudi! Moapari hai nipotingkara apa au niita ide? Moapari hai nitotoki liliungkai? Ba niuliri, tauna ide molumao anti kuasangki, ba hangko i kamalelahana lalungki? Bara!

¹³Pue Ala au rapenombai toiorunta hangkoia, au rapenombai Burahima, Isaki hai Yako, Pue Ala itimi au mopakahile TuduaNa, iami Yesu. Halalu-halalu, Yesu iti au nihuhu i topoparenta, hai au nisapuakami i lindona Pilatu i tempona ina nakabaha.

¹⁴Malelaha hai manoto laluNa, agaiana nisapuakari, hai niperapi i Pilatu bona nakabahaakau hadua topepapate.

¹⁵Yesu iti au moweike katuwo maroa, nipapatemi. Agaiana Napatuwo hule Pue Ala. Ikami ide sabiNa au moita katuwona hule Yesu.

¹⁶Kuasa hangko i Yesu, iti au mopakaroho biti topalu ide. Mewali, anti pepoinalaingki i Yesu pane kibuku mopakaoha tauna ide nodo au niita hai nisabiki.

¹⁷Halalu-halalu, ikamu hai tadulakonta au mopapatemokau Yesu. Agaiana kuisa, apa au nibabehi iti, nibabehi anti kadana niisa lempona.

¹⁸Agaiana nauri nodo, hangko i apa au nibabehi iti, tepabukeimi apa au nauli Pue Ala hangkoia au rapahawe ope-ope nabi au manguli: Datu Topehompo hangangaa molambi kapari.

¹⁹Halalu-halalu, ido hai hangangaa menosokau hangko i dosami hai mengkorukau i Pue Ala bona Naampungi dosami. Hangko indo, Pue Ala ina mopakaroho lalumi, hai motudu Yesu mai irikamu. Lawi Iami au napakanoto Pue Ala mewali Datu Topehorema.

²¹Ide-ide, Yesu maida i suruga, hai batena ara liliu indora duuna hawe tempona Pue Ala mopawou hinangkana, nodo au rapahawe nabiNa au malelaha hangkoia.

²²Halalu-halalu, ara lolitana nabi Musa hangkoia kana i Pue Yesu au manguli node: ‘Pue Ala ina moangka hadua hangko i halalumi bona mewali nabi nodo iko. Hangangaa nipeulai apa au nauliangaakau Nabi iti.

²³Hema au bara mampeulai apa au nauli Nabi iti, ina ragaaki hangko i taunana Pue Ala, hai batena rapatuna.’

²⁴Nabi-nabi au mopahawe lolitana Pue Ala, mepongka hangko i nabi Semueli hai nabi-nabi ntanina au mehuhu i Semueli, ope-opehe mopahawe apa au mewali i tempo ide.

²⁵Ikamumi halalu au molambi apa au nadandi Pue Ala hangkoia au rapahawe nabi-nabi iti. Ikamumi au molambi pewati hangko i dandina Pue Ala i toiorunta hangkoia. Lawi hangkoia Pue Ala mongkora i Burahima node: ‘Hangko i pemuleamu, ope-ope tauna i wongko dunia ina molambihe pewati.’ Irikamumi halalu tunggaiana dandi iti!

²⁶Ido hai Pue Ala mopatuwo hule Yesu AnaNa. Nguru-nguruna Yesu Natudu mai irikita to Yahudi bona Nawatike hai Naninike mampenosoi hinangkana babehianta au kadake.”