Read Napu Suro 4 Bible Online

Suro 4 - Napu bible

Suro 4

¹Tanganda mani Peturu hai Yohane mepaturo i Souna Pue Ala, maimohe rapohidupaa bahangkia tadulako mpenomba hai toSaduki hai tadulakonda topokampai Souna Pue Ala.

²Rumpu mpuuhe i Peturu hai Yohane, lawi mobambariahe tauna bosa katuwona hule Yesu hangko i kapate. Hai paturonda iti, mopakanoto wori katuwonda hule tomate.

³Ido hai suro au rodua iti rahakahe hai rapopesua i lalu tarunggu. Ratahahe indo hawe madondo lawi ina kaindimi.

⁴Agaiana tauna au mampehadingi paturonda Peturu hai Yohane i Souna Pue Ala, bosamohe au mepoinalai i Yesu, alana tetambai kabosanda tauna au mepoinalai duuna handahe lima sabuna tobalilo.

⁵Kahalona, tadulako agama, tadulakonda to Yahudi hai guru-guru agama teruhumohe mogombo i Yerusale.

⁶Ara worihe i pogombo iti Tadulako Mpenomba Mahile Hanas, Kayapas, Yohane, Aleksander hai halaluna Tadulako Mpenomba Mahile.

⁷Teruhu hahamohe, motudumohe tauna lao moala Peturu hai Yohane raanti i lindonda. Kahawenda, mekunemohe tadulako iti i Peturu hai Yohane, rauli, “Noumba pane nibuku mopakaoha topalu iti? Hangko iumba mai rohomi, hai hema au moweikau kuasa mobabehi iti?”

⁸I tempo iti, Peturu nakuasai Inao Malelaha, hai mololitami, nauli, “Uma-uma, tadulakonda tauna bosa hai tadulako agama!

⁹Anti popakaohangki tauna au palu, ido hai niparesangkai i alo ide, hai nipeinao wori niisa noumba pepakaohangki.

¹⁰Mewali bona niisa, hai bona raisa wori ope-ope halalunta to Yahudi, tauna ide maoha hai nabuku meangka inde anti kuasana Yesu Kerisitu to Nasare. Yesu iti nipaku i kau mombehape, agaiana Pue Ala mopatuwo hule.

¹¹Iami au natunggai lolitana Sura Malelaha au manguli node: ‘Watu au nitende ikamu topoaro sou, watu iti au mewali pohudaa sou.’ ”

¹²Hangko inditi, nauli mbulimi Peturu, “Bara ara rara ntani molambi katuwo maroa hangko i Pue Ala, batena pea Yesu. Lawi i humalele dunia ide, bara ara tauna ntanina, batena pea Yesu au natudu mai Pue Ala i manusia, hai Ia pea au Nabuku mohoremake hangko i huku dosanta.”

¹³Tingkara mpuumohe tadulako iti moita kapebainda Peturu hai Yohane mololita. Apa mani Peturu hai Yohane, tauna biasa peahe au barahe mosikola. Raisa wori ihirami au hihimbela hai Yesu.

¹⁴Agaiana tadulako iti, barahe bai mehana, lawi topalu au rapakaoha iti, ara wori inditi meangka i holanda Peturu hai Yohane.

¹⁵Ido hai motudu pearaihe rodua surona Pue Yesu iti padu hangko i peparesaanda, hai mogombo hulehe,

¹⁶rauli, “Apa au ina tababehi i tauna au rodua iti? Lawi ope-ope tauna i Yerusale moisa kaihirana au mobabehi tanda kuasa au mahile iti. Bara wori peisa tasapuaka.

¹⁷Agaiana bona dati rahadi humalele tauna, agina tapopalangahe hai takontohe bona ineehe mololita i hema pea kana i Yesu.”

¹⁸Mewali, roo indo, mokakio hulehe Peturu hai Yohane, rauli, “Ineemokau mepaturo ba mokabelai hangana Yesu.”

¹⁹Mehana Peturu hai Yohane, rauli, “Nipekiri umba au naunde Pue Ala: mampeulaingkai hawami ba mampeulaingkai hawana Pue Ala!

²⁰Lawi barapi peisa kipengkaroongaa mampololita apa au kiita hai au kihadimi.”

²¹Hangko indo, rumihimi karumpunda tadulako iti, pane mampopalangahe Peturu hai Yohane. Kahopoana rakabahamohe. Bara ara rara mohukuhe lawi ope-ope tauna motoia Pue Ala anti tanda kuasa au rababehi iti.

²²Topalu au rapakaohami iti, tinuwuna labimi iba pulona parena.

²³Karakabahanda Peturu hai Yohane, laomohe mampohidupaa ranganda, hai rapololita apa au rauliangaahe kapala-kapala tadulako mpenomba hai totosaenda to Yahudi.

²⁴Karahadina ranganda lolitanda iti, mekakae sambelamohe i Pue Ala, rauli, “Pue, Oiomi au mampopewali langi hai tampo, tahi hai hinangka ihina.

²⁵Oio au mongkora i Datu Daudi, toiorungki hangkoia, lawi iami hawiMu. Hai tangana Daudi nakuasai Inao Malelaha, ia mololita nauli, ‘Moapari pane ope-ope ngamba mohiho-hihohe, hai tina-tina mampepekiri tunggaia au mbero-mbero?

²⁶Ope-ope datu hai tadulako i dunia mopahintuwuhe pekirinda moewa Pue hai Datu au napilei Pue.’

²⁷O Pue, tepabukei mpuumi lolitana Daudi iti. Lawi tou-tou mpuu mewalimi i lalu wanua ide, Datu Herode hai Pontiu Pilatu hintuwuhe hihimbela hai to Yahudi hai tauna au barahe to Yahudi. I lalu kahintuwunda iti, mampeinaohe moewa Yesu, AnaMu au Malelaha au Nupileimi mewali Datu Topehompo.

²⁸Rabotusimi bona mopapatehe Yesu. Agaiana au rababehi iti mopabukei apa au Nupakanoto amimi alana ope-ope mewali moula kuasaMu hai peundeaMu.

²⁹Pue, ide-ide Nuhadimi lolitanda tauna au mampopalangangkai! Ido hai kiperapi Irio bona ikami hawiMungkai ide, Nuweingkai roho lalu datingkai langa mopahawe NgkoraMu.

³⁰Nupopaitaahe kuasaMu Pue. Nuweingkai kuasa hangko i Yesu, tuduaMu au Malelaha bona kibuku mopakaoha tauna au mahai hai mobabehi tanda au metingkarai.”

³¹Karoonda mekakae, modua-duami sou au rapaidai, hai nakuasaimohe Inao Malelaha. Ido hai bai mpuumohe mopahawe Ngkorana Pue Ala i tauna bosa.

³²Ope-ope tauna au mepoinalai i Yesu, mohintuwu hai hampepekirihe. Bara ara hadua au manguli, “Ide, iko ampuna,” agaiana ope-ope au ara irihira rapoanu sambela.

³³I tempo iti surona Pue Yesu molambihe kuasa au mahile bona mopahawehe katuwona hule Pue Yesu. Hai molambihe ope-ope pewati au mahile ntepuu hangko i Pue Ala.

³⁴Bara mpuu huba hadua i olonda au ara kamakurana. Lawi hema pea au ara tampona ba souna hai napobalu,

³⁵holona naanti lao rahuhu i surona Pue Yesu bona rakira-kiraahe tauna au bilala.

³⁶Nodo wori au nababehi Yusupu. I pampobaluna tampona, holona nahuhuahe surona Pue Yesu. Yusupu iti iami hadua pemuleana Lewi au maida i lewuto Siprus. Suronahe Pue Yesu mohanga wori Yusupu iti, Baranaba, lempona topepalindo.