Read Napu Suro 6 Bible Online

Suro 6 - Napu bible

Suro 6

¹Kamahae-haea katetetambaiami tauna au meula i Yesu. I tempo iti, ope-ope tauna au mepoinalai i Yesu, to Yahudi peahe, agaiana hanggaahe mobasa Yunani, hai hanggaa worihe mobasa Yahudi. Au mobasa Yunani, mohume-humehe mosalai ranganda au mobasa Yahudi, rauli, “Tobemba towawine au ara irikami barahe molambi kiranda hangko i apa au rakira-kira alo-alona i topeahi-ahi.”

²Ido hai, hampulo hai rodua suro iti mokakiohe ope-ope tauna au mepoinalai i Yesu bona teruhuhe, hai rauliangaahe, “Bara maroa ane ikami au mokadipura pokira-kira paande, lawi ane nodo, barapongkai tepaka mobambari Ngkorana Pue Ala.

³Mewali, halalu-halalu, agina nipilei hangko i olomi pitu tauna au maroa babehianda, au nakuasai Inao Malelaha hai au mapande. Irihira au kiwei bago mokadipura pokira-kira paande iti.

⁴Lawi ikami hangangaa mekakae hai mobambaringkai Ngkorana Pue Ala.”

⁵Ope-opehe mampokana lolitanda suro iti. Ido hai rapileimi Setepanu lawi ia mepoinalai mpuu i Pue Yesu hai nakuasai Inao Malelaha. Rapilei worihe: Pilipu, Prokorus, Nikanor, Timon, Parmenas hai Nikolaus to Antiokia. (Nikolaus iti, bara to Yahudi, agaiana mesuami agama Yahudi.)

⁶Raantimohe tauna au pitu iti lao i surona Pue Yesu, hai suro iti moona taienda i waanda tauna au pitu iti hai mekakaehe bona Pue Ala mowatihe.

⁷Hangko inditi, tebambari ntepuumi Ngkorana Pue Ala, mewali kabosa-bosaamohe tauna i Yerusale au meula i Yesu, hai bosa worihe tadulako mpenomba au mepoinalai i Yesu.

⁸Setepanu, nawati mpuu Pue Ala au mowei kuasa iria. Ido hai nabuku mobabehi ngkaia pakana tanda kuasa i lindonda tauna bosa.

⁹Agaiana ara worihe au moewa Setepanu. Topeewa itihe iami tauna au menomba i sou penombaa au rahanga Sou Libertini (Libertini lempona: tauna au rakabaha hangko i karapohawinda). Ihira iti, to Yahudi au hangko i wanua Kirene hai Aleksandria. Ara worihe to Yahudi hangko i Kilikia hai Asia, au mai moewa hai mampombehehea Setepanu.

¹⁰Agaiana tauna iti bara rabuku mohanai apa au nauli Setepanu, lawi Inaona Pue Ala mopakanoto laluna mololita.

¹¹Ido hai lao pearaihe mohuweki lalunda bahangkia tauna bona mobabehihe lolita au mosalai Setepanu, rauli, “Kihadi ia mopakoi pepaturona Musa hai mopakoi Pue Ala!”

¹²Karahadina tauna bosa lolitanda au mesalai iti, rumpumohe hihimbela hai tadulakonda to Yahudi hai guru-guru agama, pane laomohe mohaka Setepanu raanti i lindonda tadulako agama.

¹³Kahawenda inditi, moanti worimohe bahangkia tauna bona mewalihe sabi au bara tou. Rauli sabi iti, “Tauna iti mopakoi liliu Souna Pue Ala hai mopakoi Aturana Musa!

¹⁴Ia kihadi manguli node: Yesu au hangko i Nasare ina mogero Souna Pue Ala hai mobaliki ope-ope ada au napaturoake Musa.”

¹⁵Karahadina tadulako iti lolitanda, mototokimohe Setepanu. I tempo iti, lindona Setepanu raita nodo lindo malaeka.