Read Napu Suro 8 Bible Online

Suro 8 - Napu bible

Suro 8

¹Saulu wori mampokana karapapatena Setepanu iti. Mepongka alo iti, ope-ope topepoinalai i Pue Yesu au ara i Yerusale rapopeahi-ahi mpuumohe, alana mahawuhe i humalele tampo Yudea hai Samaria. Batenda pearai surona Pue Yesu au barahe melangka.

²Bahangkia tauna au mengkoru i Pue Ala mangala watana Setepanu. Anti kawioranda, rateriahi hai ratawu.

³Hai i tempo iti, Saulu mampopeahi-ahi liliu tauna au mepoinalaihe i Pue Yesu. Ope-ope sounda nasuaki, hai ope-ope tauna au mepoinalai i Yesu, maroa tobalilo maroa towawine, nahakahe hai naantihe lao ratarunggu.

⁴Mewali, topepoinalai au mahawuhe iti, mopahawehe Ngkorana Pue iumba pea kalaoanda.

⁵Nodo wori Pilipu,[6] laomi i hambua boea i tampo Samaria mopahaweahe kaYesuna Datu Topehompo.

⁶Matanahe ampu boea mohadi lolitana Pilipu hai moita tanda kuasa au nababehi,

⁷lawi ia mampopeloho seta hangko i bosa tauna au napesuangi, alana meloho mpuuhe seta iti hai monganga-ngangahe. Bosa wori tauna au palu hai au wara bitinda napakaoha Pilipu.

⁸Rumihi mpuu kamatananda ampu boea moita apa au mewali iti.

⁹I lalu wanua iti, ara hadua tobalilo au rahanga Simo. Simo iti, hadua topobalimata au mahaemi mampopaita isana au metingkarai i to Samaria. Nauli kaiana tauna au mahile kuasana.

¹⁰Mentaka mpuu lalunda ope-ope ampu boea iria, maroa tuana ba tauna bosa, rauli, “I Simo ara kuasana Pue Ala au rauli Kuasa Mahile.”

¹¹Mewali ope-ope ampu boea meulahe iria, lawi bosa belana tingkarahe moita isana.

¹²Agaiana kahawena Pilipu i boeanda, ia mopahawe bambari kana i poparentana Pue Ala, hai napaturoahe kaYesuna Datu Topehompo alanda bosa tobalilo hai towawine mepoinalai i Yesu hai rariuhe.

¹³Hangko inditi, mepoinalaimi Simo hai rariu. Karoona rariu, meula liliumi i Pilipu, lawi tingkara laluna moita tanda kuasa au nababehi Pilipu.

¹⁴Roo indo, surona Pue Yesu au ara i Yerusale mohadimohe bambari kana i to Samaria au modokomohe Ngkorana Pue Ala. Ido hai mampohawaamohe Peturu hai Yohane lao i Samaria.

¹⁵Kahawenda Peturu hai Yohane, mampekakaengaamohe to Samaria au mepoinalaimohe i Pue Yesu bona molambihe Inao Malelaha.

¹⁶Tempo iti, Inao Malelaha bara mani mendaulu irihira, lawi hangko rariuhe i lalu hangana Pue Yesu.[7]

¹⁷Mewali Peturu hai Yohane mampekakaengaahe hai moangka taienda i wongko waanda to Samaria iti. Hai modokomohe Inao Malelaha.

¹⁸Simo topobalimata moita hema pea au ratobo Peturu hai Yohane molambihe Inao Malelaha. Ido hai laomi moanti doi i Peturu hai Yohane,

¹⁹nauliangaahe, “Niwei wongkoia kuasami iti bona hema pea au kutobo ina modokohe Inao Malelaha.”

²⁰Agaiana nauli Peturu iria, “Marugimoko hai marugi wori doimu! Nupehangu pae, kabulana laluna Pue Ala peisa raholo hai doi?

²¹Barako hintoto mobago hihimbela hai ikami, lawi bara manoto lalumu i Pue Ala.

²²Menosomoko hangko i tunggaiamu au kadake iti, hai mekakaeko i Pue bona Naampungiko hangko i tunggaiana lalumu au kadake.

²³Lawi kuita mahina mani lalumu, hai teheako i dakemu.”

²⁴Nauli Simo i Peturu hai Yohane, “Nipekakaea wongkoia i Pue bona datina narumpa rugi au nuuli iti!”

²⁵Karoonda Peturu hai Yohane mepaturo hai mopahawe Ngkorana Pue, mesulemohe lao i Yerusale. I polumaonda, rabambari wori Ngkorana Pue i boea-boea ntanina i tampo Samaria.

²⁶Ara hadua malaekana Pue au mopahawe lolita ide i Pilipu, nauli, “Laoko ntanda i Lau i rara au hangko i Yerusale monontohi Gasa.” (Rara iti makura rapolumaongi.)

²⁷Lao mpuumi Pilipu monontohi rara au natudungia Pue. I tempo iti, ara wori hadua to Etiopia au moliu i rara iti mesule lao i boeana. Tauna iti, mapangka lantina lawi ia au mokingki hinangka ihi souna datu towawine i tampo Etiopia. (Datu towawine iti rahanga Kandake.) Karoona to Etiopia iti menomba i Pue Ala i Yerusale, ia mesawimi i kareta au nadii dara hai mesule lao i boeana. Tangana mohuda i lalu karetana, ia mobasa hambua sura au nauki nabi Yesaya hangkoia.

²⁹I tempo iti, Inaona Pue Ala mouliangaa Pilipu, “Lao nuhungkuki olou kareta.”

³⁰Mewali melangka mpuumi Pilipu lao i kareta iti. Kahawena indo, nahadi tauna iti mobasa Surana Nabi Yesaya. Napekune Pilipu, “Tua, nuisa pae lempona iti au nubasa?”

³¹Nahanai tauna iti, nauli, “Noumba kakuisana, barana ara au mamponotoa.” Roo indo, to Etiopia iti mowawahami Pilipu mengkahe i lalu karetana bona mohudahe hihimbela.

³²Idemi lolita au nabasa hangko i Surana Nabi Yesaya, “Ia nodo hambaa dimba au raanti lao rasambale. Ia nodo hambaa ana dimba au ragundi wuluna agaiana bara mobee-bee; mandii-ndii pea.

³³Ia rakakabosai hai rahuku; bara hintoto karahukuNa. Bara ara hadua tauna au peisa mololita kana i pemuleaNa, lawi Ia rapapate.”

³⁴Hangko inditi, mekunemi to Etiopia i Pilipu, nauli, “Uliangaana hema au natunggai nabi iti, watana haduduana ba tauna ntanina?”

³⁵Mewali, hintoto hai i pobasana inona, Pilipu mopatuntua Ngkora Marasa kana i Yesu.

³⁶Tanganda mokareta, moitamohe owai i wiwi rara. Nauli to Etiopia iti i Pilipu, “Peita, indolou ara owai. Peisana nuriu?”

³⁷[Nahanai Pilipu, “Ane tou-tou mpuu nupoinalaimi, peisamoko kuriu.” Nauli to Etiopia iti, “Kupoinalai mpuu Yesu Kerisitu iami Anana Pue Ala.”]

³⁸Hangko indo, rapopengkaroomi karetanda, hai mendaulumohe lao i owai, pane to Etiopia iti nariumi Pilipu.

³⁹Pesorenda hangko i owai, unga pea Inaona Pue Ala moanti Pilipu padu hangko inditi. Mewali, to Etiopia iti barapi moita Pilipu, lawi unga pea matanta. To Etiopia iti mopaliliumi polumaona hai matana mpuu laluna.

⁴⁰Hai i tempo iti, Pilipu bila-bila mesupami i boea Asdod, hai mesulemi lao i wanua Kaisarea. I tanga rara, Pilipu mobambari liliu Ngkora Marasa i ope-ope boea au napoliungi.