Read Napu Suro 9 Bible Online

Suro 9 - Napu bible

Suro 9

¹I tempo iti, koi ntepuu inaona Saulu, hai napeinao peami mampopalanga hai mopapate tauna au mepoinalai i Pue Yesu. Ido hai laomi i Tadulako Mpenomba Mahile

²merapi sura kuasa au peisa naanti lao i tadulako sou penombaa i wanua Damsik. Tunggaiana ane arahe nahumba tobalilo ba towawine au mampeulai paturona Yesu, ina nahakahe hai naantihe i Yerusale.

³Mewali, i lalu polumaona lao i Damsik, hungkumi i wanua, unga pea ara pewangka hangko i langi motoleliki Saulu.

⁴Madungkami Saulu hai mohadi hambua wotu au manguliangaa, “Saulu, Saulu, moapa hai nupopeahi-ahiNa?”

⁵Nauli Saulu, “Tua, hemaKo?” Mehana au mololita iti, Nauli, “Ikomi Yesu, au nupopeahi-ahi!

⁶Mearomoko hai laomoko i wanua. Indolou ina rapahawea peako apa au hangangaa nubabehi.”

⁷Tempo iti, tauna au hihimbelahe hai Saulu barahe peisa mololita, lawi langahe. Ihira mohadi worihe wotu iti, agaiana bara raita kahemana au mololita.

⁸Hangko inditi, meangkami Saulu. Nabungkahi matana, agaiana barapi meita. Mewali, ranini pearai lao i wanua Damsik.

⁹Talu alona kamahaena, Saulu bara meita, bara wori maande hai maenu.

¹⁰I tempo iti, i wanua Damsik, ara hadua tauna au mepoinalai i Yesu, hangana Ananias. Ia moita hambua pampetudungia, hai i lalu pampetudungia iti, Pue Yesu mekakio, Nauli, “Ananias!” Mehana Ananias, nauli,, “Idetona Pue.”

¹¹Nauli Pue, “Laomoko ide-ide i souna Yudasi i rara au rahanga Rara Manoto. Nuhaoki i sou iti hadua tauna hangko i wanua Tarsus au rahanga Saulu. Tauna iti ide-ide tangana mekakae,

¹²hai i lalu pampetudungiaNgku iria, naitako lao nupombelambia hai nupetobo bona meita hulemi.”

¹³Nahanai Ananias, “Io, Pue. Agaiana, bosa tauna mololita kana i babehiana Saulu iti. Ia rumihi pampopeahi-ahina tauna au mepoinalai Irio i wanua Yerusale.

¹⁴Ia hawe inde, lawi iria ara sura kuasa hangko i kapala tadulako mpenomba bona mohakahe ope-ope tauna au mepoinalai Irio Pue.”

¹⁵Agaiana, Nauli mbuli Pue Yesu i Ananias, “Hangangaa laoko! Lawi Saulu iti, Kupileimi mewali topobagoNgku. Ia ina mopahawe hangaNgku i to Yahudi hai i tauna ntanina hawe-hawe wori i datu.

¹⁶Hai ina Kutudungia wori hinangka kapari au hangangaa nahalea anti pobagona Iriko.”

¹⁷Mewali, lao mpuumi Ananias i sou au natunggai Pue Yesu inona, hai moonami taiena i Saulu, nauli, “Saulu, halalungku! Pue Yesu au nuita i rara i tempomu mai inde, Iami au motuduna mai mosondakiko bona meita huleko hai bona nakuasaiko Inao Malelaha.”

¹⁸I tempo iti peawomi, ara au nodo ruke manawo hangko i matana Saulu, hai unga pea meita, pane meangkami hai rariumi.

¹⁹Roo nodo, maandemi, hai maroho hulemi watana. Bahangkia alona kamahaena, Saulu maida i wanua Damsik hihimbela hai topepoinalai i Yesu.

²⁰I wanua Damsik, ia lao i sou-sou penombaa. Inditi mopahawemi bambari kana i Yesu iami Anana Pue Ala.

²¹Tingkara mpuuhe tauna au mohadi lolitana Saulu, rauli, “Noumbari dide? Hangkoia ia mopapate tauna au mepoinalaihe i Yesu i Yerusale. Hai tunggaiana mai inde bona mohaka worihe tauna inde hai naantihe i kapala-kapala tadulako mpenomba i Yerusale.”

²²Agaiana kamaroho-rohoari Saulu mepaturo, ido hai rapowuli to Yahudi i Damsik, lawi ope-ope paturona iti mopakanoto kaYesuna Datu Topehompo.

²³Bahangkia alona hangko inditi, mogombomohe to Yahudi bona mopapate Saulu.

²⁴Tunggaianda ina mokampaihe ope-ope baba bente wanua, maroa mabaa maroa kaindi bona ane moliu Saulu, ina rapapate. Agaiana kewari i Saulu apa tunggaianda iti.

²⁵Ido hai hambela tempo i tanga kaindi, bahangkiahe rangana, laohe moala Saulu raanti i bente wanua au motoleliki Damsik. Inditi raulumi Saulu i lalu hambua karanji hangko i wongko bente wanua toa i tampo, liliu melangka.

²⁶Hawemi i Yerusale, napeinao mpuu Saulu mohimada hai tauna au mepoinalai i Yesu, agaiana tauna iti langahe iria, lawi bara manihe mampoinalai peulana mpuumi i Yesu.

²⁷Agaiana laomi Baranaba mampohimada Saulu, hai naporangai lao i suronahe Pue Yesu. Baranaba motuntuahe noumba Saulu moita Pue Yesu i polumaona lao i wanua Damsik, hai noumba Pue mololita iria. Napahawea worihe kapebaina Saulu mopahawe bambari kana i Pue Yesu i Damsik.

²⁸Mewali, maidami Saulu inditi hai halalu hampepepoinalaina iamohe surona Pue Yesu. Hihimbelahe mopahawe bambari kana Pue Yesu i humalele Yerusale hai bara ara kalangana.

²⁹Ia mololita hai mampombehehea to Yahudi au mobasa Yunanihe. Ido hai to Yahudi iti, rapeinao mopapate Saulu.

³⁰Mewali, karaisana halalu hampepepoinalaina tunggaianda tauna iti, ia raporangaimi hawe i wanua Kaisarea. Hangko i Kaisarea, rapopeangkami lao i wanua Tarsus.

³¹Mewali i tempo iti, tauna au mepoinalai i Pue Yesu barapohe rapopeahi-ahi i tampo Yudea, Galilea hai Samaria. Tetambaimi topepoinalai i Yesu, hai kamaroho-rohoami pepoinalainda, lawi mengkoru mpuuhe i Pue Ala, hai Inao Malelaha mopakaroho lalunda.

³²I tempo au himbela, lumaomi Peturu iumba-umba pea mosondaki topepoinalai i Pue Yesu. I polumaona iti, ia mehupe i wanua Lida.

³³Inditi ia molambi hadua tobalilo, hangana Eneas. Eneas iti, ualumi parena palu, barapi mearo-aro hangko i paturuana.

³⁴Nauli Peturu, “Eneas, Yesu Kerisitu mopakaohako! Meangkamoko, hai nulolomi alemu.” Unga pea Eneas meangka.

³⁵Ope-ope tauna i wanua Lida hai i tampo Saron moita kamaohanami Eneas, hai mepoinalaimohe i Pue Yesu.

³⁶Bara karao hangko i wanua Lida, ara hambua wanua au rahanga Yope. Inditi, ara hadua towawine au mepoinalai i Yesu, rahanga Tabita. (I lalu basa Yunani hangana Dorkas, lempona lagiwa.) Tauna iti maroa babehiana, lawi ia motulungi liliuhe tauna au meahi-ahi.

³⁷I tempo iti, ia mahai liliu mate. Roo radoi, rapowatami i lincu au i wongko.

³⁸Lawi wanua Yope bara karao hangko i wanua Lida, ido hai topepoinalai i Yope mohadihe kaarana Peturu i wanua Lida. Ratudumi rodua tauna lao i Peturu merapi bona hoholiga mai i Yope.

³⁹Mewali, meangka mpuumi Peturu lao hihimbela hai ihira. Kahawenda i Yope, liliu raanti lao i karapowataana Dorkas. Ope-ope tobemba au towawine meangkahe motoleliki Peturu. Moteriamohe hai ratudungiami Peturu badu hai hampi au nadauahe Dorkas i tempona mani tuwo.

⁴⁰Agaiana ope-ope tauna au ara i lincu iti napopelohohe Peturu, hai molingkudumi mekakae. Roo mekakae, melindomi i tomate iti, hai nauli, “Tabita, mearomoko!” Unga pea tebungkahi matana. Kamoitana Peturu, liliu mohuda.

⁴¹Nakingkimi Peturu taiena hai napopeangka. Roo indo, nakakio hulemohe ope-ope tauna au mepoinalai i Yesu hai tobemba iti, nauliangaahe, “Idemi halalumi, ia tuwo hulemi.”

⁴²Au mewali iti rapololita i humalele wanua Yope, alana bosa tauna mepoinalai i Pue Yesu.

⁴³Roo indo, Peturu maida i Yope bahangkia alona kamahaena. Ia maida i souna Simo, hadua topobabehi parewa au hangko i koli.