Read Napu Roma 1 Bible Online

Roma 1 - Napu bible

Roma 1

¹Sura ide hangko iriko, Paulu, hawina Yesu Kerisitu, au Napilei hai Natudu mobambari Ngkora Marasa hangko i Pue Ala.

²Ngkora Marasa ide nadandimi Pue Ala hai rapahawemi nabi-nabi hangkoia, nodo au teuki i lalu Sura Malelaha.

³Ngkora Marasa iti mampololita kana i Anana Pue Ala, au rapoanaka himbela hai manusia hangko i pemuleana Datu Daudi.

⁴TuwoNa malelaha nodo Pue Ala hai i pearona hangko i olo tomate, mewali hambua tanda kuasa au mopatongawa, Yesu Kerisitu Amputa iti, iami Anana Pue Ala.

⁵Hai anti kaYesuna, Naweina Pue Ala pewati mahile, Naangkana mewali suroNa bona iko au mobambari Ngkora Marasa i tauna au barahe to Yahudi i humalele dunia. Kupaturohe bona mepoinalaihe hai mengkoruhe i Pue Yesu, duuna hangana Yesu rapomahile.

⁶Nodo wori ikamu to Sarani au i Roma, au kabosana barakau to Yahudi, Nakakio worikau Pue Ala mewali kirana Yesu Kerisitu.

⁷Ido hai kupakatu sura ide irikamu, to Sarani i Roma, lawi Pue Ala mampokaahikau hai mokakiokau mewali taunaNa au malelaha. Kuharunga Pue Ala Umanta hai Pue Yesu Kerisitu mowatikau hai moweikau roa ngkatuwo.

⁸Ioru, mopahawena katana lalungku i Ampuku Pue Ala i lalu hangana Yesu Kerisitu, anti kaikamuna halalu, lawi tebambarimi i humalele dunia kamarohona pepoinalaimi i Pue Yesu.

⁹Pue Ala au kupobagoa hangko i lalungku i lalu pobambaringku Ngkora Marasa kana i AnaNa, Iami au mewali sabingku, noumba kakukabelaimi bela-belangku mekakae.

¹⁰Mekakakaena, merapi i Pue Ala bona ane Napokana, hambela tempo peisakau lao kusondaki.

¹¹Lawi kupeinao mpuu hidupa hai ikamu bona kukira-kiraakau pewati hangko i Inao Malelaha au ina mopakaroho pepoinalaimi.

¹²Tunggaiaku bona tepakaroho worina anti pepoinalaimi; mewali peisake momberohongi mpolalu hadua hai hadua.

¹³Halalu bona niisa bosami belana ara tunggaiaku lao mosondakikau, agaiana ara liliu au mohombokina. Tunggaiaku mosondakikau bona pobagongku ara wori wuana i olomi, nodo pobagongku au arami wuana i olonda tauna au barahe to Yahudi au arahe i wanua ntanina.

¹⁴Moinda mpuuna kuhadi i ope-ope tauna, maroa to Yunani ba au barahe to Yunani, maroa au mosikolahe ba au barahe mosikola.

¹⁵Idomi hai kupeinao mpuu mopahawe wori Ngkora Marasa irikamu au i Roma.

¹⁶Barana maea mopahawe Ngkora Marasa. Lawi hema pea au mampoinalai Ngkora Marasa iti, kuasana Pue Ala mohoremahe hangko i huku dosanda, nguru-nguruna i to Yahudi, hawe-hawe wori i tauna au barahe to Yahudi.

¹⁷Hangko i Ngkora Marasa iti, taisa noumba rarana Pue Ala moimbake manoto i peitaNa, anti pepoinalainta Iria. Bara ara rara ntani, lawi i lalu Sura Malelaha teukimi node, “Tauna au manoto i peitana Pue Ala, ina molambihe katuwo maroa anti pepoinalainda.”

¹⁸Hangko i suruga Pue Ala mopatongawa karumpuNa i ope-ope tauna au madosa, maroa i pekirinda ba i babehianda au kadake, lawi hinangka babehia kadake ina mohomboki tauna mampeulai paturo au manoto kana i Pue Ala.

¹⁹Katouana apa au raisa tauna kana i Pue Ala tongawami, lawi napakanotoamohe Pue Ala haduduaNa.

²⁰Kehapiri kamakuasana Pue Ala au monono hai kamahilena tuwoNa bara peisa taita, agaiana ope-ope iti peisa taita hangko i hinangka au Napopewali hungka i pewalina dunia. Mewali, bara ara manusia au peisa manguli, “Bara wongkoia kuisa kaarana Pue Ala.”

²¹Raisato kaarana Pue Ala, agaiana barahe mengkoru Iria, hai bara wori raisa manguli ngkaia kamaroana Iria. Pekirinda kakakaraoari hangko i Pue Ala, alana makaindi lalunda.

²²Rapehangu mapandemohe, mole ntulitorihe!

²³Barahe mau menomba i Pue Ala au tuwona monono. Menombarihe i watu au rababehi himbela hai lengge pinatuwo au peisahe mate; nodo tadasi, binata au mobiti iba hai binata au mendele ba nodo manusia.

²⁴Ido hai Napogiangaa pearaihe Pue Ala mampeulai peundeana lalunda au kadake, alana mobabehihe babehia au merikai hai hore mombedaihihe.

²⁵Barahe mampeulai paturo au tou. Moularihe paturo au mepakanawo. Bararihe menomba i Pue Ala au mampopewali hinangkana au ara, agaiana menomba hai mengkorurihe i hinangka au napopewali Pue Ala. Moleri Pue Ala, au mampopewali hinangkana itiri, au masuka ratoia i hae-haena. Amin!

²⁶Mewali, anti kadanda mau menomba i Pue Ala, ido hai Napogiangaamohe moula peundeana lalunda au mepakaea iti. Hawe-hawe i towawine, barapi tedii lalunda i tobalilo. Agaiana hadua-hadua towawine mampotambiarihe hangka towawinenda.

²⁷Nodo wori tobalilo bararihe mampotambia towawine, agaiana mohaokirihe hangka tobalilonda. Tobalilo mobabehi babehia au bara hintoto hai hangka tobalilonda. Kahopoana molambihe pehuku au hintoto hai babehianda au merikai iti.

²⁸Lawi i pekirinda barapohe paraluu moisa Pue Ala, ido hai Napogiangaami Pue Ala pekirinda mewali kadake, alana mobabehihe babehia au bara hintoto.

²⁹Lalunda buke hai hinangka au kadake hai au bara manoto. Mehiorohe, kadakehe, mahinahe; rapeinao peami mepapate, mobungka-bungkahe, meakalangihe, mombepailaluhe, hai meuli-ulihe,

³⁰mopakadakehe hangka ranganda, mokahihihe Pue Ala, makasarahe, barahe keada, mampemahilehe, hai mampopetoiahe. Matopahe mohaoki rara mobabehi dake. Moewahe tosaenda.

³¹Barahe mapande, barahe mopabukei dandinda, bara ara ahinda, bara raisa metulungi.

³²Nauri moisatohe aturana Pue Ala au manguli hema-hema au mobabehi nodo hangangaa rahuku mate. Agaiana batenda mobabehi mpaliliu babehia au kadake iti, hai rapokana wori ane ara ranganda au mobabehi nodo.