Read Napu Roma 10 Bible Online

Roma 10 - Napu bible

Roma 10

¹Halalungku hampepepoinalai! Kupeinao mpuu bona to Yahudi tehoremahe hangko i huku dosanda. Ido hai kupekakaea liliuhe i Pue Ala.

²Kuisa kamarohona poulanda ada penomba i Pue Ala lawi kusabikimi. Agaiana barahe moisa rara au manoto au napasilolonga Pue Ala.

³Barahe mengkoru i Kerisitu bona mewalihe manoto i peitana Pue Ala. Raunde mpuu moula raranda haduduanda, mampeinaohe mopakanoto watanda i poulanda Aturana Musa.

⁴Katouana Kerisitu mopabukeimi Atura iti bona Napakanotoke i peitana Pue Ala anti pepoinalainta Iria.

⁵Hangkoia ara lolitana nabi Musa au manguli node: “Hema pea au mampeinao mewali manoto anti peulanda i Aturana Pue Ala molambihe katuwo maroa asala mampeulaihe ope-ope Atura iti.”

⁶Agaiana ara wori lolitana Musa au manguli: ikita mewali manoto i peitana Pue Ala anti pepoinalainta. Nauli node, “Inee nuuli i lalumu: ‘Hema au ina mengkahe lao i suruga? Hema au ina mendaulu lao i paidaa tomate?’ ” Lawi barake paraluu mengkahe i suruga mohaoki katuwo maroa, lawi Kerisitu mendaulumi mai irikita hai bara worike paraluu mendaulu i paidaa tomate mohaoki katuwo maroa, lawi Kerisitu tuwo hulemi hangko i kapate.

⁸Nauli mbuli Musa node, “Ngkorana Pue hungku ntepuu irikamu. Ngkora iti peisa nuhowara hai nupailalu.” Itimi ngkora au kipahawe i ope-ope tauna iti, iami bambari pepoinalai.

⁹Ane nipangaku i lolitami, “Yesu iami Pue,” hai ane nipoinalai i lalumi Pue Ala mopatuwo hule Yesu hangko i kapate, batena ina tehoremakau hangko i huku dosami.

¹⁰Anti pepoinalainta i Yesu hangko i lalunta, ido hai Naimbamoke Pue Ala manoto i peitaNa. Hai anti katapangakunami Yesu i lolitanta, ido hai tehoremamoke hangko i huku dosanta.

¹¹I lalu Sura Malelaha, ara teuki node: “Hema pea au mepoinalai Iria, peharunganda ina tepabukei.”

¹²Ngkora iti batena kanahe ope-ope tauna, lawi bara ara posisalana to Yahudi hai tauna ntanina. Hadua pea Ampunda ope-ope tauna iami Pue Ala, hai mahile ahiNa i ope-ope tauna au meraroa Iria.

¹³Lawi i lalu Sura Malelaha, teuki node: “Hema pea au meraroa i Pue, batena tehoremahe hangko i huku dosanda.”

¹⁴Agaiana noumba kapeisanda meraroa Iria ane bara manihe mepoinalai Iria? Noumbami kamepoinalainda ane bara manihe mohadi bambri kana Iria? Noumba karahadina ane bara mani ara au mopahaweahe.

¹⁵Hai noumbami kapeiasanda mobambari kana Iria ane barahe ratudu? Nodo au teuki i lalu Sura Malelaha node: “Maroa mpuu kahawenda tauna au mopahawe bambari maroa!”

¹⁶Arami tauna au ratudu moanti bambari maroa, agaiana barahe ope-ope tauna mampoinalai bambari maroa iti. Ara lolitana nabi Yesaya hangkoia au manguli, “Pue, arahe pae au mepoinalai i bambari au kiantiahe?”

¹⁷Mewali, hangangaa mohadihe hampai bambari maroa, hangko peisarihe mepoinalai. Hai bambari maroa iti iami bambari kana i Kerisitu.

¹⁸Mewali, inee tapehangu bambari maroa iti bara mani rahadi to Isaraeli. Manoto rahadimi! I lalu Sura Malelaha teuki node: “Bambari iti tehawukami i humalele dunia, hai ngkora iti rapahawemi i ope-ope tauna iumba pea kaaranda.”

¹⁹Inee wori tapehangu to Isaraeli barahe moisa tunggaiana Pue Ala. Raisami! Lawi arami lolitana Pue Ala au napahawe nabi Musa hangkoia node: “Ikamu to Isaraeli, ina Kupamahinakau moita ahiNgku i tauna au barahe to Isaraeli. Ina kupahumpuinaomi moita pekadipuraNgku i tauna au baraNa raisa hangkoia.”

²⁰Hai bara langa-langa Yesaya mopahawe Ngkorana Pue Ala node: Nauli Pue Ala, “Tauna au baraNa rahaoki, ihirari au molambiNa. Hai tauna au baraNa rakakio, Kupopaisaamohe kahemaNgku.”

²¹Agaiana kana i to Isaraeli, Pue Ala manguli node, “Kehapiri hangaloa Kuona taieNgku modokohe, batena rasapuakaNa hai matua liliu lalunda.”