Read Napu Roma 12 Bible Online

Roma 12 - Napu bible

Roma 12

¹Mewali halalu, anti kamahilena ahina Pue Ala irikita, kuhuweki lalumi bona mohuhukau watami i Pue Ala mewali popenomba au tuwo. Ane nibabehi nodo, lempona malelaha babehiami i lindona Pue Ala, lawi itimi ada mpenomba au mopamatana laluNa.

²Ineekau mampeulai babehianda tauna au barahe moisa Pue Ala. Nipogiangaami Pue Ala mowouki pekirimi bona tebaliki poantimi. Lawi ane nodo babehiami, ina niisa mpuu tunggaiana Pue Ala au maroa, au mopamatana laluNa hai au bara ara kamakurana.

³Anti kabulana laluna Pue Ala, Nawatimona mewali suroNa, ido hai kuweikau lolita ide: ineeke mampemahile. Ineekau mampekiri apa au bara hintoto nipekiri, agaiana nipekiri pea apa au hintoto moula apa au Nakiraiaamoke Pue Ala hadua-hadua, moula hokana pepoinalainta.

⁴Pandirina, watanta ara ngkaia ngaana, agaiana hambua pea wata. Hangaa-hangaa, montani-ntani pobunduana.

⁵Nodo wori ikita au mepoinalai i Kerisitu, bosake agaiana hawata-wata peake i lalu pohintuwuta hai Kerisitu. Mohintuwuke hadua hai hadua.

⁶Hadua-haduake molambi kapande au montani-ntani moula apa au nakiraiake Pue Ala i suka kabulana laluNa. Tauna au molambi kapande mopahawe Ngkorana Pue Ala, hangangaa napopolumao mpuu bago iti moula hokana pepoinalaina.

⁷Tauna au molambi kapande motulungi hangka rangana, hangangaa metulungi mpuu. Tauna au molambi kapande mepaturo, hangangaa mepaturo mpuu.

⁸Tauna au molambi kapande mopakaroho laluna rangana, hangangaa napopolumao mpuu bago iti. Hema au mokira apa pea i hangka rangana, hangangaa nababehi hangko kabulana laluna. Hema au molambi kapande mewali tadulako, hangangaa mewali mpuu tadulako au madota. Hai hema au molambi kapande motulungi rangana au meahi-ahi, hangangaa natulungihe hangko i laluna au matana.

⁹Nipokaahi rangami hangko i kabulana lalumi, nikaraohi babehia au kadake, hai nibabehi au maroa.

¹⁰Mombepokaahikau hadua hai hadua nodo topohalalu, hai mombeadaikau.

¹¹Hangangaa madotakau mobago i Pue, ineekau lohe. Hangangaa nipopolumao bagona Pue hangko i lalumi.

¹²Nipamatana lalumi anti peharungami i hinangka au ina nababehiakau Pue Ala. Mantahakau i lalu kapari. Mekakae liliukau.

¹³Nitulungihe rangami hampepepoinalai au ara i lalu kamakuranda. Hangangaa matanakau modoko torare.

¹⁴Ane ara tauna au mampopeahi-ahikau, niperapi i Pue Ala bona Nawatihe. Ineehe nitunda-tunda.

¹⁵Hangangaa matanakau hihimbela hai tauna au matana, moteriakau hihimbela hai tauna au moteria.

¹⁶Mohintuwukau hai rangami. Ineekau mampemahile, agina nipogaloahe tauna au i woi katuwonda. Hai inee nipekiri kapandemi melumbu hangko i rangami.

¹⁷Ane arahe au mobabehi dake irikamu, ineehe nihurungi. Nibabehi apa au maroa i lindonda tauna.

¹⁸Nipari-pari mobabehi apa pea au maroa i tauna bona peisakau tuwo mohintuwu hai rangami.

¹⁹Halalu au kupokaahi: inee nihurungi kakadakena hangka rangami. Nipogiangaa Pue Ala mohukuhe. Lawi i lalu Sura Malelaha, Pue Ala mongkora node, “‘Iko pea au makuasa mehurungi. Iko pea au makuasa mehuku.’ ”

²⁰Mewali, nipeulai paturo i lalu Sura Malelaha au manguli: “Ane iwalimi marimi, nipaandehe. Ane mangkadouhe, nipaenuhe. Ane nodo nibabehi, kahopoana ina mewalihe maea.”

²¹Inee tahurungi babehiana ranganta au kadake hai babehia au kadake wori. Agina babehia au kadake tahurungi hai babehia au maroa.