Read Napu Roma 13 Bible Online

Roma 13 - Napu bible

Roma 13

¹Ope-ope tauna hangangaa mengkoru i topoparenta. Lawi bara ara topoparenta au bara molambi kuasa hangko i Pue Ala. Hai topoparenta au ara napakanotomi Pue Ala.

²Mewali, tauna au moewa topoparenta mosapuakahe apa au napakanoto Pue Ala. Tauna au nodo babehianda, batenda rahuku!

³Ane maroa babehianta, barake langa i topoparenta. Au langa, batenda pea tauna au kadake babehianda. Mewali, hangangaa mobabehike au maroa bona ratoiake hai datike langa i topoparenta.

⁴Lawi topoparenta iti, sarungkorona Pue Ala au mobago bona maroa katuwonta. Agaiana ane mobabehike dake, batena langake i topoparenta, lawi ara kuasanda mehuku. Lawi topoparenta iti sarungkoroNa worihe Pue Ala au mopabukei pehukuna Pue Ala i tauna au kadake.

⁵Ido hai hangangaa mengkoruke i topoparenta. Mengkoruke i topoparenta bona datike rahuku. Agaiana melumbu hangko inditi, hangangaa tababehi nodo, lawi taisami i lalunta, itimi au hintoto tababehi.

⁶Idomi hai hangangaa mobaiarike asele bona topoparenta peisa mampopolumao bagonda au napahaleangiahe Pue Ala.

⁷Nibaiari ope-ope i tauna apa au hintoto nibaiari. Nibaiari asele ba pobaiari au ntanina i topoparenta. Mengkorukau i tauna au hintoto rapengkorui. Bila tauna au hintoto rabila.

⁸Ineeke moinda i hangka ranganta, agaiana hangangaa mombepokaahirike. Lawi tauna au mampokaahi hangka rangana, mampeulaimohe ope-ope Aturana Pue Ala au napahawe Musa.

⁹Lawi i lalu Aturana Pue Ala ara hawa au manguli node, “Inee mebualosi, inee mepapate, inee manangka, inee nipokaelu anu-anuna rangami.” Ope-ope hawa ide hai hawa au ntanina, tapabukeimi ane mampeulaike hawa au hampaka ide, “Nipokaahi hangka rangami nodo pampokaahimi watami haduduami.”

¹⁰Ane maahike i hangka ranganta, barapoke mobabehi au kadake irihira. Mewali ane maahike, tapabukeimi Aturana Pue Ala.

¹¹Ope-ope iti hangangaa tababehi, lawi taisa mpuu apa au hintoto tababehi i tempo ide: hangangaa mearomoke hangko i kaletanta. Lawi mepongka hangko i kanipoinalaina Pue, kahungku-hungkuami kamaiana Pue Yesu au karombelana. Ina maike Nahorema hangko i dunia au kadake ide.

¹²Tempo kaindi ide ina liumi, hai ina mabaami. Ido hai hangangaa tatende babehia au makaindi hai tapake parewa pombeala au mewangka.

¹³Nibabehi babehia au hintoto i kabaakana. Ineekau mosusa-susa hai malangu-langu. I babehia tobalilo hai towawine, ineekau mobabehi babehia au sala ba au moula peundeana lalunta au kadake. Ineekau mobungka-bungka ba mahina.

¹⁴Hangangaa tapeulai babehiana Pue Yesu Kerisitu i lalu katuwonta, inee tapeulai peundeana lalunta au kadake.