Read Napu Roma 14 Bible Online

Roma 14 - Napu bible

Roma 14

¹Ara halalunta hampepepoinalai au bara mani maroho pepoinalainda. Hangangaa nidoko maroahe tauna iti. Kehapiri mosisala pelambimi, inee iti au nipombehehei.

²Pandirina: arahe tauna au maroho pepoinalainda au manguli peisake moande mampopengaa paande. Agaiana ara tauna ntanina au bara mani maroho pepoinalainda. Rauli tauna iti, bara naunde Pue ane moandeke bau,[4] batena pea halo-halo au peisa taande.

³Ikamu au moandekau mampopengaa, ineekau mopapakoi rangami au barahe moande bau. Hai ikamu au barakau moande bau, inee worikau mosalai rangami au moandehe mampopengaa. Lawi Pue Ala modoko worihe rangami iti mewali anaNa.

⁴Hai rangami iti, mobago worihe i Pue. Hemakau pane baikau mosalai hangka rangami au mobago i Pue? Ba maroa pobagonda ba bara, iti popakanotona rai Pue au mewali Amputa. Hai batena ina maroa pobagonda, lawi Pue makuasa mopakanoto raranda.

⁵Arahe tauna au manguli ara alo au tepakanoto au hangangaa tapenombai melumbu hangko i alo au ntanina. Agaiana arahe tauna ntanina au manguli ope-ope alo himbela pea. Agaiana au paraluu iami apa au tababehi, hangangaa hangko i lalunta mpuu bona napokatana Pue Ala.

⁶Tauna au mopaioru alo au tepakanoto, iti rababehi bona mobila Pue. Tauna au moande mampopengaa paande, iti raande bona mobilahe Pue, lawi mangulihe ngkaia kamaroana i Pue Ala. Nodo wori tauna au moande peahe paande au tepakanoto. Tauna iti moulahe palianda bona mobilahe Pue, hai manguli worihe ngkaia kamaroana i Pue Ala.

⁷Lawi ikita to Sarani, barake ara hadua au tuwo moula peundeata haduduanta. Bara worike ara au mate moula peundeata haduduanta.

⁸I tuwonta ba i matenta, hangangaa mobilake Amputa. Tuwo ba mateke, batena kiranake Pue.

⁹Ido hai Kerisitu mate hai tuwo hule bona Ia mewali Ampunda ope-ope tauna, maroa au tuwohe, maroa au matehe.

¹⁰Mewali, moapa hai mopakisalakau halalumi hampepepoinalai? Moapa wori hai mokakabosaikau halalumi hampepepoinalai? Lawi batena ina hawe tempona, ikita ope-ope meangka i lindona Pue Ala bona Nabotusi kara-karanta.

¹¹Lawi i lalu Sura Malelaha, Pue Ala manguli: “Tou mpuu au Kuuli ide, Ope-ope tauna ina molingkudu i lindoKu. Hai ope-ope tauna hangangaa mopangaku kaIkona Pue Ala.”

¹²Mewali, ikita ope-ope hangangaa mohanai Pue Ala kana i babehianta.

¹³Ido hai kuuliangaakau: ineeke mombesasalai. Agina maroa-roake dati ara babehianta au mokelo-kelo halalunta hampepepoinalai duuna madosa hai manawo.

¹⁴Anti pohintuwuku hai Pue Yesu, kuisa hai kupoinalai i lalungku kadana ara paande au rapalia i peitana Pue. Agaiana ane ara hadua tauna au manguli paande au hampaka rapalia, batena mpuu masala ane naande.

¹⁵Nodo wori, ane kuande apa au nauli rangangku rapalia duuna kupakapari laluna, madosa worina, lawi barana maahi i rangangku. Ido hai kuuli, hangangaa tapamaroa-roa babehianta bona inee takelo ranganta hai paande au taande alana tapakanawo pepoinalaina. Lawi ranganta iti, iami halalunta hampepepoinalai au nahorema worimi Kerisitu hangko i kamadosana.

¹⁶Mewali, ane ara au tababehi, maroa moula pelambiata agaiana au mopakarugi pepoinalaina ranganta, agina inee tababehi bona babehianta iti bara rasalai ranganta.

¹⁷Lawi i lalu poparentana Pue Ala, bara ada mpaande ba paenu au mewali patoana i peitana Pue Ala. Patoana iami lalunta au manoto, pohintuwuta hai ranganta, hai katana lalu au naweike Inao Malelaha.

¹⁸Ane nodo peulanta i Kerisitu, ikita ina napokatana Pue Ala hai rabilake ranganta.

¹⁹Ido hai hangangaa tapari-pari mohintuwu hai ranganta hai mombepakaroho mpolaluke hadua hai hadua.

²⁰Inee tapakarugi pobagona Pue Ala anti popalia paande. Katouana, bara ara paande au rapalia. Agaiana bara maroa ane mokeloke ranganta hai apa au taande duuna manawohe i lalu dosa.

²¹Aginami, ineeke moande bau ba maenu au melangui ba mobabehike apa pea au mopakanawo halalunta hampepepoinalai.

²²Ane nupoinalai kadamu masala mobabehi babehia iti, pelambiamu iti hangangaa nukingki pea i lalumu haduduamu i lindona Pue Ala. Morasimi tauna au mobabehi apa au maroa moula pelambiana, hai barahe mosalai watana.

²³Agaiana ane ara hadua tauna au bata-bata laluna moande bau ba paande ntanina, hai kahopoana naande pea, lempona madosa, lawi au nababehi iti bara moula apa au napoinalai i laluna. Mewali, ane tababehi apa au bara moula pepoinalainta i Pue, babehianta iti tapodosa.