Read Napu Roma 16 Bible Online

Roma 16 - Napu bible

Roma 16

¹Hai ide-ide, ina kupopaisaakau kahemana ide Febe au moanti surangku. Ia halalunta hampepepoinalai au motulungi to Sarani i boea Kengkrea.

²Kuperapi bona nidoko nodo halalumi i lalu hangana Pue Yesu, lawi itimi au hintoto tababehi au meulake i Yesu. Ane ara apa-apa au naparaluu, niwei, lawi bosa tauna au natulungi, tepesua iko.

³Nipahaweana tabeangku i Priskila hai Akwila. Ihira iti, halalungku hampopobago au mampopolumao liliuhe bagona Kerisitu Yesu.

⁴Hangkoia, ina raanti matemi motulungina. Kuuli ngkaia kamaroana irihira, hai bara iko pea, agaiana ope-ope to Sarani au barahe to Yahudi manguli wori ngkaia kamaroana irihira.

⁵Nipahawea worina tabeangku i ope-ope halalunta hampepepoinalai au teruhuhe i sounda Priskila hai Akwila. Tabeangku wori i Epenetus au kupokaahi. Iami au nguru-nguruna mepoinalai i Kerisitu i propinsi Asia.

⁶Hai tabeangku wori i Maria, au mobago rumihimi irikamu.

⁷Nipahawe wori tabeangku i Andronikus hai Yunia hangka to Yahudingku, au ratarunggu sambelangkai hai au rabilahe i olonda ope-ope surona Pue Yesu. Ihira mahaemohe mepoinalai i Pue Yesu, hangko damanina, iko mepoinalai.

⁸Tabeangku wori i Ampliatus, au kupokaahi i lalu hangana Pue Yesu.

⁹Tabeangku wori i Urbanus, halalunta hampopobago au mampopolumao bagona Kerisitu. Tabeangku wori i Stakis, au kupokaahi.

¹⁰Tabeangku wori i Apeles, au narumpa ngkaia kapari, agaiana meula liliu i Kerisitu. Tabeangku irihira au i souna Aristobulus.

¹¹Tabeangku wori i Herodion, hangka to Yahudingku. Tabeangku wori i halalunta hampepepoinalai au ara i souna Narkisus.

¹²Tabeangku wori i Tripena hai Triposa, au mobagohe i Pue Yesu, hai i Persis, au kupokaahi, au mobago mantimi wori i lalu bagona Pue.

¹³Tabeangku wori i Rupus hai irinana, au kuimbami inangku. Rupus iti iami hadua to Sarani au rabila.

¹⁴Nipahawea worina tabeangku i Asinkritus, Flegon, Hermes, Patrobas, Hermas hai ope-ope halalu au ara hihimbela hai ihira.

¹⁵Tabeangku wori i Filologus hai Yulia, i Nereus hai halaluna towawine, hai i Olimpas hai ope-ope halalunta hampepepoinalai au arahe hihimbela hai ihira.

¹⁶Mombetabe-tabekau hangko i lalumi mpuu ane mombelambikau hai hangka to Saranimi. Ope-ope jumaa inde mopakatuhe tabeanda irikamu, halalu.

¹⁷Halalu hampepepoinalai, kupopaingaakau bona hangangaa maroa-roakau i tauna au mopaara pogaa-gaa hai au rapeinao mopakanawokau i paturonda au montani hai paturo au rapaturoamokau. Nikaraohihe tauna au nodo!

¹⁸Lawi tauna au nodo babehianda, barahe mampopolumao bagona Kerisitu Amputa; moula peahe peundeana lalunda. Hai lolita peroasinda au momi, mopakanawohe tauna au bara manihe moisa apa-apa.

¹⁹Agaiana ane ikamu, halalu, raisami ope-ope tauna pengkorumi i paturona Pue Ala. Matanana i kakuhadina babehiami iti. Agaiana kupeinao bona madotakau mobabehi apa au maroa, hai mokaraohikau babehia au kadake.

²⁰Pue Ala, pongka roa ngkatuwo, ina monangi hai moropui Datu Tokadake i lalu katuwomi. Halalu-halalungku! Amputa Yesu Kerisitu, mowatikau hai mamporangai liliukau.

²¹Timotiu, rangangku au hampopobago inde, mopakatu tabeana irikamu. Nodo wori Lukius, Yason hai Sosipater, hangka toYahudingkuhe.

²²Iko, Tertius, au mampoukia Paulu sura ide, mopahawe worina tabeangku i lalu hangana Pue Yesu i halalu hampepepoinalaingku i Roma.

²³Gayu wori mopakatu tabeana. Iko, Paulu, maidana i souna Gayu, hai to Sarani i wanua ide paka moguluhe inde. Erastus, topamboli doi wanua, hai halalunta Kwartus mopakatu worihe tabeanda.

²⁴[Amputa Yesu Kerisitu, mowatikau hai mamporangai liliukau. Amin.]

²⁵Toiami Pue Ala! Lawi Iami au makuasa mopakaroho pepoinalaimi anti Ngkora Marasa au kupahaweakau bona niisa kahemana Yesu Kerisitu. Iatunami parena, tunggaiana Pue Ala iti bara raisa tauna.

²⁶Agaiana ide-ide Pue Ala motudungiake tunggaiaNa i sura au rauki nabi-nabi hangkoia hai au rapahawe i ope-ope tauna moula parentana Pue Ala bona ope-ope tauna peisa mepoinalai hai mengkoru Iria. Iami Pue Ala au tuwo hawe i hae-haena,

²⁷hai au moisa hinangkana, hai au bara ara karoduana! Toiami i lalu hangana Yesu Kerisitu hawe i hae-haena. Amin! Hangko iriko PAULU