Read Napu Roma 4 Bible Online

Roma 4 - Napu bible

Roma 4

¹Mewali, peisa taala pandiri hangko i katuwona Burahima, toiorunda to Yahudi. Noumba rarana Burahima mewali manoto i peitana Pue Ala?

²Ane rapana Burahima mewali manoto i peitana Pue Ala anti babehiana au maroa, peisa mampemahile. Agaiana bara ara pongkana Burahima mampemahile i lindona Pue Ala, lawi ia bara mewali manoto i peitana Pue Ala anti babehiana au maroa.

³Lawi ara teuki i lalu Sura Malelaha au manguli node: “Burahima mepoinalai i Pue Ala, ido hai naimba Pue Ala manoto i peitaNa.”

⁴Pandirina, tauna au mampedurei ara rarana mampesingarai sarona. Sarona iti bara rawei mbero, lawi kalengeanato.

⁵Agaiana pohintuwuta hai Pue Ala bara nodo tauna au mampedurei, lawi Naimbake Pue Ala manoto i peitaNa bara anti kamaroana babehianta agaiana anti pepoinalainta Iria au mopamanoto tauna madosa.

⁶Paturo ide himbela hai lolitana Datu Daudi hangkoia. Lawi Daudi mampololita kana i kamorasinda tauna au nadoko Pue Ala, hai au Naimba manoto i peitaNa, agaiana bara anti kamaroana babehianda.

⁷Nauli Daudi node: “Morasimi tauna au raampungimi babehiana au kadake hai dosana ragewomi.

⁸Morasimi tauna au bara Napeita Pue, dosana.”

⁹Pewati au napololita Daudi iti bara pea rahumba tauna au ratile, agaiana rahumba worihe tauna au bara ratile. Lawi nodo au roomi kuuli inona, Pue Ala moimba Burahima manoto anti pepoinalaina.

¹⁰Impira Burahima mewali manoto i peitana Pue Ala? I karoona ratile ba hangko damani ratile? Ane tabasa tuntukana, taisa, Burahima mewali manoto i peitana Pue Ala hangko damani ratile.

¹¹Burahima ratile aminami mepoinalai. Karatilena iti mewali pea tanda kamanotona i peitana Pue Ala. Mewali, tongawami irikita Burahima mewali manoto i peitana Pue Ala anti pepoinalaina nauri barato ratile. Ido hai peisa tauli Burahima rapouma tauna au barahe to Yahudi au mepoinalai i Yesu, lawi kehapirihe bara ratile moula Aturana Musa, batena mewalihe manoto i peitana Pue Ala anti pepoinalainda au himbela hai Burahima.

¹²Nodo wori Burahima rapouma to Yahudi, lawi ia au rapopandiri ope-ope to Yahudi au bara pea ratile agaiana au mepoinalai worihe i Pue Ala nodo Burahima au mepoinalaimi i Pue Ala hangko damani ratile.

¹³Hangkoia Pue Ala modandi i Burahima hai i pemuleana kaina mokuasainda dunia. Tunggaiana Pue Ala bona Burahima hai pemuleana mewali manoto anti pepoinalainda alana molambihe apa au Nadandi iti. Barahe molambi apa au nadandi Pue Ala anti pampeulainda Aturana Musa.

¹⁴Ane rapana, tauna au moula Aturana Musa molambi apa au nadandi Pue Ala, lempona pepoinalainta i Pue Ala bara mobundu, hai dandiNa bara ina mewali.

¹⁵Lawi au tahumba hangko i Aturana Musa iami karumpuna pea Pue Ala, lawi moliungike Atura iti. Ane rapana Pue Ala barake mowei aturaNa, kebarake masala moliungi atura iti.

¹⁶Mewali, naimbake Pue Ala manoto i peitaNa anti pepoinalainta bona apa au nadandi Pue Ala iti tadoko mbero pea hangko i kabulaNa laluNa bona ope-ope pemuleana Burahima batena molambi apa au Nadandi. Dandina Pue Ala iti bara pea kiranda to Yahudi au moisa Aturana Musa. Agaiana mewali wori kiranda au mepoinalai i Pue Ala nodo Burahima. Lawi Burahima tapoumami ope-opeke.

¹⁷Ara lolitana Pue Ala i Burahima au teuki node, “Kupopewalimoko umanda bosa tauna i humalele dunia.” I peitana Pue Ala, Burahima mewali umanta ope-ope lawi Ia mepoinalai i Pue Ala. Hai Iami Pue Ala au mopatuwo hule tomate hai mopaara apa au bara mani hambela ara, nauri hai lolitaNa pea.

¹⁸Katouana barapi ara peharungana Burahima moana lawi saemi. Nauri nodo, Burahima batena pea mepoinalai hai meharunga i Pue Ala, alana ia mewali umanda bosa tauna i humalele dunia.[1] Lawi hangko damani ara anana Burahima, modandimi Pue Ala iria, Nauli, “Kabosanda pemuleamu ina nodo kangkaiana betue i langi.”

¹⁹Agaiana i tempo iti, tinuwuna Burahima hungkumi hangatu parena. Hai barapi maroho watana lawi sae ntepuumi. Nodo wori Sara towawinena, ia lalo hai sae ntepuu worimi. Nauri nodo, pepoinalaina bara makura. Batena naharunga liliu kaina arana anana.

²⁰Bara bata-bata laluna i dandina Pue Ala, agaiana katetetambaiari pepoinalaina i dandina Pue Ala. Anti pepoinalaina iti, maroho laluna. Ido hai Burahima motoia liliu Pue Ala,

²¹lawi napoinalai kamakuasana Pue Ala mopabukei dandiNa.

²²Anti pepoinalaina iti, ara teuki i lalu Sura Malelaha hangkoia au manguli, “Pue Ala moimba Burahima manoto i peitaNa.”

²³Au teuki iti, bara pea kana i Burahima.

²⁴Au teuki iti, batena mokanai worike. Ikita ide, nadoko worimoke Pue Ala au moimbake manoto i peitaNa, lawi mepoinalaike i Pue Ala au mopatuwo hule Amputa, Pue Yesu.

²⁵Yesu itimi au mokira wataNa rapapate mohuru salanta. Hai roo indo, Pue Ala mopatuwo hule Yesu bona mewalike manoto i peitaNa.