Read Napu Roma 9 Bible Online

Roma 9 - Napu bible

Roma 9

¹Apa au kuuli ide hangko i lalungku mpuu. Barana modongko. Kerisitu moisa lalungku. Hai notona lalungku ide nasabiki Inao Malelaha.

²Mapari mpuu pehadingku hai masusa mpuu lalungku, lawi hangka to Yahudingku barahe mepoinalai i Yesu.

³Ane kepeisa, aginami iko au rapaharara hai ragaakina hangko i Kerisitu, asala halalungku to Yahudi rakabahahe hangko i huku dosanda.

⁴Hangkoia to Isaraeli molambihe ngkaia pewati hangko i Pue Ala, lawi napileimohe Pue Ala hai Napopewalimohe nodo anaNa haduduaNa. Pue Ala mopatongawaahe kuasaNa, hai anti podandiNa i to Yahudi hangkoia, ara pohintuwunda hai Ia. Ia moweihe AturaNa hai Napaturoahe ada mpenomba, hai Ngkaia mani dandina Pue Ala au Naweihe.

⁵Ihira iamohe pemuleanda toiorunda au napileimohe Pue Ala hangkoia. Hai Kerisitu au rapoanaka nodo manusia mesupa wori hangko i pemuleanda. KuasaNa melumbu hangko i hinangkana; Iami Pue Ala au hintoto tatoia hawe i hae-haena. Amin!

⁶Ide-ide, kabosanda to Isaraeli, barahe taunana Pue Ala. Agaiana ineeri tapehangu dandina Pue Ala i to Isaraeli bara tepabukei. Bara tou lolita iti! Lawi i olonda pemuleanda to Isaraeli au napilei Pue Ala hangkoia, barahe ope mewali taunaNa.

⁷Hai i olonda pemuleana Burahima, barahe ope naimba Pue Ala anana Burahima. Lawi Pue Ala modandimi i Burahima, Nauli, “Batena pea pemuleana Isaki au ina raimba pemuleamu.”

⁸Lempona bara ope-ope pemuleana Burahima au mewali anana Pue Ala, batena pea au rapoanaka moula dandina Pue Ala.

⁹Anana Burahima au rahanga Isaki rapoanaka moula dandina Pue Ala i Burahima. Pue Ala mouliangaa Burahima node, “Ina maiNa i tempo au tepakanoto, hai Sara towawinemu ina moana hadua tobalilo.”

¹⁰Hai bara pea iti, hangko i tuntukana Esau hai Yako, taisa noumba Pue Ala mopilei tauna mewali kiraNa. Esau hai Yako iti, toporopa ananahe Ribeka. Umanda Isaki, toiorunta.

¹¹Hangko damanihe rodua anangkoi iti mesupa hai raisa mobabehi apa pea au maroa ba au kadake, Napileimohe Pue Ala dati rauli Napileihe anti babehianda agaiana Napileihe moula peundeaNa haduduaNa.

¹²Ido hai hangko damani Ribeka moana, Nauliangaami Pue Ala node, “Anamu au towutu ina mengkoru i adina.”

¹³I lalu Sura Malelaha, tabasa lolitana Pue Ala au teuki node, “Yako hai pemuleana, ihirari au Kupilei. Esau hai pemuleana, barahe Kupilei.”

¹⁴Agaiana inee tapehangu Pue Ala bara manoto ane Ia mopilei au hadua hai mosapuaka au hadua! Bara tou lolita iti!

¹⁵Nikatuinao lolitana Pue Ala i nabi Musa hangkoia au manguli, “Ikomi au mobotusi hema au ina Kutudungia kamaahina laluNgku hai kamaroana laluNgku.”

¹⁶Mewali, ane Pue Ala mampeinao motudungia ahiNa i hadua tauna, bara peundeana manusia au mopakanoto iti, bara wori rapakanoto anti babehiana manusia. Pue Ala peari au mopakanoto.

¹⁷Nikatuinao wori lolitana Pue Ala i Pirao, datunda to Masiri hangkoia, au manguli, “Kupopewaliko datu agaiana hampaka pea tunggaiaKu iami bona hangko i pesapuakamu, Kupatongawa kuasaNgku, alana hangaNgku rapomahile i humalele dunia.”

¹⁸Mewali, taisa mpuu: Pue Ala motudungia ahiNa i hadua tauna, hai mopamatua laluna tohaduana. Ia mobabehi nodo moula peundeaNa haduduaNa.

¹⁹Mewali, ina ara tauna au manguli, “Ane nodo, moapari hai Pue Ala mosalai babehianta au kadake, lawi babehianta iti moulato popakanotoNa haduduaNa?”

²⁰Inee tauli nodo, halalu! Hemake pae manusia hai pebaike mosalai Pue Ala? Hintoto pae ane haogu kori mouliangaa topobabehi, “Moapari hai nubabehina node?”

²¹Topobabehi kori iti peisa moula peundeana haduduana. Hangko i hangkamumua tampo polo, ia peisa mobabehi roogu kori; haogu au nabati hai haogu au napake alo-alona.

²²Nodo wori Pue Ala makuasa mobabehi apa peundeaNa irikita tauna. Katouana, ara tauna kadake au hintoto mpuu napokarumpu Pue Ala bona tongawa kuasaNa. Hintoto mpuuhe rahuku hawe i hae-haena, agaiana nauri nodo, sabara mani Pue Ala i tauna iti.

²³Anti kasabaraNa, ido hai tongawa kamahilena tuwoNa i tauna au Napokaahi hai au Napatani amihe molambi kiranda i lalu peawana tuwoNa.

²⁴Ikita idemi au Napilei molambi pewati iti, hai bara pea to Yahudi, agaiana ara wori au bara to Yahudi.

²⁵I lalu sura nabi Hosea, Pue Ala manguli node, “Tauna au barahe taunaNgku hai au bara moisa ahiNgku, ina Kukakiohe mewali taunaNgku hai ina Kupopaitaahe ahiNgku.”

²⁶“Hangkoia Pue Ala mouliangaahe tauna au ara i hambua tampo: ‘Barakau kiraNgku.’ Agaiana hambela tempo, Pue Ala au tuwo ina mouliangaahe, ‘AnaNgkumokau!’ ”

²⁷Hai Yesaya mololita kana i to Yahudi node: “Nauri to Isaraeli kabosanda nodo kangkaiana wungi i wiwi ntahi. Agaiana kehapiri nodo, haodi peahe au ina molambi katuwo maroa.

²⁸Lawi barapi mahae Pue ina mobotusi kara-karanda ope-ope tauna i dunia.”

²⁹Ara wori lolita au nauki nabi Yesaya node: “Ane Pue Ala au makuasa bara mampentara bahangkia pemulea, ketuna mpuumoke, nodo ampu boea Sodomo hai Gomora hangkoia.”

³⁰Mewali node: tauna au barahe to Yahudi barahe mohaoki rara bona mewalihe manoto i peitana Pue Ala. Agaiana arahe hantanga au mewali manoto i peitaNa. Pue Ala mopakanotohe i peitaNa anti pepoinalainda.

³¹Agaiana to Isaraeli, mahaemohe mopari-pari bona mewalihe manoto i peitana Pue Ala i pampeulainda Aturana Musa, agaiana bara rahumba au rahaoki iti lawi bara rabuku mampeulai atura iti.

³²Noumba hai nodori? Lawi meharunga peahe i babehianda haduduanda, barahe meharunga i Pue Ala. Tehubehe i watu katehubea; lempona, barahe mepoinalai i Datu Topehompo.

³³Katehubeanda iti tepahawe i lalu Sura Malelaha hangkoia. Datu Topehompo rapandiri nodo haogu watu. Nodo au teuki i Sura malelaha node: “Peita: Kuwoli haogu watu i Bulu Sion, Bosa tauna tehube i watu iti, alanda tepalumba. Agaiana hema-hema au mepoinalai Iria, peharunganda ina tepabukei.”