Read Napu 1 Korintu 10 Bible Online

1 Korintu 10 - Napu bible

1 Korintu 10

¹Halalu, nikatuinao apa au mewali i toiorunta hangkoia au naantihe nabi Musa mopalehi tampo Masiri. I kapadunda hangko i tampo Masiri, Pue Ala moninihe hai gawu au mampoioruahe i polumaonda. Ihira ope-ope mowetahe Tahi Malei au napopogaa Pue Ala bona rapoliungi.

²Nodo ikita rariu mewali topeulana Pue Yesu, ihira rariu worihe i lalu gawu hai owai mewali topeulana Musa.

³Ihira ope-ope moandehe paande au himbela, hai maenuhe paenu au himbela. Paandenda hai paenunda iti, iami paande hai paenu au hangko i Pue Ala. Maenuhe owai au mentumbu hangko i watu mahile, hai watu iti rapopandiri Kerisitu au mamporangaihe hai moweihe katuwo.

⁵Nauri ihira ope-ope molambi pewati hangko i Pue Ala, agaiana anti babehianda au kadake, bosa i olonda barahe napokatana Pue Ala, ido hai matehe hai watanda tehawuka i pada wungi.

⁶Ope-ope au mewali i to Yahudi hangkoia mobundu irikita ide-ide, lawi talambi paturo hangko i katuwonda datike mobabehi apa au kadake nodo ihira.

⁷Ineeke menomba i anitu, nodo au rababehi tauna i olonda hangkoia. Lawi ara teuki i lalu Sura Malelaha au manguli: “Mohudamohe maande hai maenu-enu, mosusamohe matana-tana duuna mampopengaami au rababehi.”

⁸Ineeke mobabehi sala hai towawinena ranganta ba hai anantowawine, nodo au rababehi tauna i olonda hangkoia. Anti babehianda au sala iti, matehe rompulo hai talu sabuna tauna i lalu hangalo.

⁹Ineeke mopaara karumpuna Pue, nodo au rababehi tauna i olonda hangkoia, alana matehe natilo ile.

¹⁰Hai ineeke mohume-hume, nodo au rababehi tauna i olonda hangkoia, alana napapatehe malaeka au mepapate.

¹¹Ope-ope au mewali irihira hangkoia hangangaa tapailalu mewali ngkora pandiri irikita ide-ide. Hai ope-ope au mewali iti, teuki bona datike molambi pehukuna Pue Ala nodo irihira. Lawi ikita ide, tuwoke hungkumi i kahopoa dunia.

¹²Mewali, ane arakau au manguli: “Marohomi pepoinalaingku i Pue,” hangangaa maroa-roakau bona datikau manawo i lalu dosa!

¹³Hinangka pekelo au morumpake, pekelo biasa pea au ralambi wori tauna ntanina. Agaiana Pue Ala mokatuinao liliu dandiNa irikita; barake ina Napogiangaa rakelo meliu hangko i rohona lalunta. Ane narumpake pekelo, Pue Ala ina moweike rara monangi pekelo iti bona peisake mantaha i lalu pepoinalainta.

¹⁴Mewali, halalu au kupokaahi, hangangaa nipalehi ada penomba i anitu!

¹⁵Kuimbamokau nodo tauna au manoto lalunda. Ido hai kuuliangaakau: niparesa lolitangku ide, tou ba bara.

¹⁶Ane maenuke anggoro i paande roti hai tauli ngkaia kamaroana i Pue Ala, lempona mokatuinaoke wahena Kerisitu au tebumbuhami i kau mombehape. Ada iti mopakanoto kaikitana tauna au Napahuru Kerisitu hai waheNa. Hai ane moandeke roti au rakira-kiraake lempona mokatuinaoke kapatena Kerisitu i kau mombehape. Ada iti mopakanoto pohintuwuta hai watana Kerisitu.

¹⁷Lawi haogu pea roti au rakira-kiraake, hai taande. Lempona, ikita au bosa ide mewalimoke hawata-wata hai Kerisitu.

¹⁸Peita adanda to Isaraeli. Ane mohuhuhe popenombanda i Pue Ala i wongko meja pohuwea popenomba, hangangaa maandehe hangkira hangko i popenomba iti, tanda pohintuwunda hai Pue Ala i lalu penombaanda.

¹⁹Apa tunggaiaku manguli nodo? Bara kuuli ara pue ntanina hangko i Pue Ala. Hai bara wori kuuli, ara bunduna paande au rapopenomba i anitu. Bara mobundu!

²⁰Tunggaiaku iami: ope-ope popenombanda iami popenomba i tokadake, bara popenomba i Pue Ala. Hai barana mau ane mohintuwukau hai tokadake.

²¹Ane maenukau anggoro i penombaami i Pue Yesu, bara hintoto ane lao worikau maenu anggoro hihimbela hai ihira au menombahe i tokadake. Ane maandekau roti mokatuinao kapatena Pue, bara wori hintoto ane laokau maande sambela hai ihira au menombahe i tokadake.

²²Ba baikau mopaara karumpuna Pue? Ba niuli meliu kamarohonta hangko i Pue?

²³Arakau au manguli, “Anti kanakabahanta Pue Ala hangko i huku dosanta, ido hai peisake mobabehi apa pea peundeata.” Tou, agaiana iko manguli, ope-ope peisa tababehi, agaiana ara au mobundu hai ara wori au bara mobundu. Peisake mobabehi apa peundeata, agaiana bara ope-ope ina mopakaroho laluna ranganta.

²⁴Inee tababehi au motulungi pea watanta haduduanta. Hangangaa tababehi wori au motulungi ranganta.

²⁵Apa pea au rapobalu i pobalu-balua, peisa taholo hai taande. Inee tapepekune rapopenomba i anitu ba bara. Peisa taande hangko i kabulana lalunta,

²⁶lawi “Dunia ide hai ope-ope ihina, Pue Ala ampuna.”

²⁷Ane rakakiokau rangami au barahe to Sarani lao maande i sounda, hai niunde lao maande sambela, niande peami apa au rahuhuakau. Ineemi nipepekune bau iti rapopenombami i anitu ba bara.

²⁸Agaiana ane arahe au mouliangaake, “Bau iti rapopenombami i anitu,” aginami inee taande datike mopakasusa laluna ranganta au bara maroho pepoinalaina.

²⁹Tunggaiaku node: hangangaa takatuinao laluna ranganta. Ane lalunta haduduanta, bara moapa ane taande paande iti. Agaiana hangangaa ara tauna au ina mampekune, “Moapari hai peundeaku peisa rahomboki tauna ntanina?

³⁰Ane kuande bau iti, hai kuuli ngkaia kamaroana i Pue Ala, moapari pane arahe tauna au mosalaina?”

³¹Agaiana kuuli: ane maandeke ba maenuke, ba apa pea au tababehi, hangangaa tababehi bona Pue Ala rapomahile.

³²Ineeke mobabehi apa pea au mopakanawo ranganta, maroa to Yahudi ba tauna au barahe to Yahudi ba halalunta hampepepoinalai au mengkoru i Pue Ala.

³³Nodo wori iko, i paka-pakana kubabehi liliu apa au maroa i peitanda ope-ope tauna. Bara kuhaoki apa au mobundu pea i watangku haduduangku, agaiana kubabehi apa au ina mobundu i rangangku bona tehoremahe hangko i huku dosanda.