Read Napu 1 Korintu 11 Bible Online

1 Korintu 11 - Napu bible

1 Korintu 11

¹Nipeulaimi poantiku, nodo iko mampeulai poantina Kerisitu.

²Kaliliuana halalu, kutoiakau lawi i paka-pakana nikatuinao liliuna, hai nipeulai liliu paturongku au kupahaweakau.

³Agaiana ara hampaka au hangangaa kupopaingaakau, Kerisitu mewali tadulakonda ope-ope tobalilo. Hai tobalilo mewali tadulakonda towawine. Hai Pue Ala mewali tadulakona Kerisitu.

⁴Ane hadua tobalilo metolombu i tempona mekakae ba mopahawe lolitana Pue Ala i paminggu, ia mopapakoi Kerisitu, tadulakona.

⁵Agaiana ane hadua towawine mekakae ba mopahawe lolitana Pue Ala i paminggu hai bara metolombu, towawine iti mopapakoi tobalilona au mewali tadulakona. Towawine au bara metolombu iti, hangangaa maea nodo hadua towawine au rakou weluana.

⁶Mewali, ane ara hadua towawine au bara naunde metolombu i paminggu, agina ragundi peami weluana. Agaiana ane maea ragundi ba rakou, hangangaa metolombu.

⁷Tobalilo au mekakaehe ba mopahawe lolitana Pue Ala, ineehe metolombu, lawi tobalilo rapopewali nodo Pue Ala bona hangana Pue Ala rapomahile. Towawine hangangaa metolombuhe lawi towawine rapopewali bona hangana tobalilo rapomahile.

⁸Lawi tobalilo bara rapopewali hangko i towawine, agaiana towawineri au rapopewali hangko i tobalilo.

⁹Hai nodo wori, tobalilo bara rapopewali bona motulungi towawinena, agaiana towawinenari au rapopewali bona motulungi tobalilona.

¹⁰Idomi pongkana pane towawine hangangaa metolombuhe, lawi tolombu iti mewali tanda pengkorunda i tobalilonda. Hai hangangaa metolombuhe lawi ara worihe malaeka au mampetiroke.

¹¹Agaiana ikita au mepoinalaike i Pue, towawine hai tobalilo bara peisa tuwo sadudua. Towawine hangangaa motulungihe tobalilo, hai tobalilo hangangaa motulungihe towawine.

¹²Lawi nguru-nguruna towawine rapopewali hangko i tobalilo, agaiana roo indo, ope-ope tobalilo mesupa hangko i towawine, hai au mopaara hinangkana iami Pue Ala.

¹³Nipepekiri, hintoto pae ane hadua towawine mekakae i Pue Ala i lalu paminggu ane bara metolombu?

¹⁴Pandirina ane ara hadua tobalilo au ngkalanga weluana, tauli bara hintoto.

¹⁵Agaiana ane ngkalanga weluana hadua towawine, tauli maroa. Weluana au ngkalanga iti mopamakara watana, lawi weluana iti mewali rapotolombu.

¹⁶Agaiana ane ara au mampeinao mosapuaka au kuuli ide, idemi lolitangku moula ada au kipeulai, towawine hangangaa metolombu i paminggua, hai ada iti rapeulai wori halalunta hampepepoinalai i boea-boeana. Au ntanina hangko ide, bara ara.

¹⁷Kaliliuana, ara wori hampaka au kupeinao kuuliangaakau, hai bara worikau kutoia anti babehiami ide. Lawi poteruhumi bara mopaara pengkorumi i Pue Ala, agaiana moantirikau i babehia au kadake.

¹⁸Nguru-nguruna, kuhadi bambari au manguli, ane moteruhukau maminggu, ara posisalami hadua hai hadua. Hai kupekiri bambari iti hangangaa tou!

¹⁹Barato moapa posisisala peamodekau, bona tongawari pae ba hema au maroho peulana i Pue!

²⁰Masusa lalungku, lawi ane teruhu sambelakau, bara nibabehi apa au hintoto i paande roti mokatuinao kapatena Pue Yesu.

²¹Lawi i poteruhumi, arakau au moande hai moenu mpoioru paandemi hai anggoromi i lindonda rangami au meahi-ahi alana ikamu malangumokau, hai ihira marimi hai mangkadouhe.

²²Barakau pae mosou? Agina maande hai maenu amimokau i soumi moula peundeami. Moapari hai nibabehi nodo i poteruhuami? Niunderi pae mopapakoi hangka rangami au mewali kirana Pue Ala? Nipeinao pae mopakaeahe halalumi au meahi-ahi tuwonda? Apa au hangangaa kuuliangaakau? Ba kutoiakau? Bara! I babehiami iti barakau kutoia.

²³Hangkoia kupaturo mpuukau apa lempona paande roti mokatuinao kapatena Pue Yesu. Hai apa au kupaturoakau iti, kuhumba hangko i Pue. I kaindi karapobaluNa, Pue Yesu mangalami roti

²⁴hai roo mekakae, roti iti Nabise-bisemi hai mouliangaahe topeguruNa, node, “Idemi wataNgku au Kuhuhu mopahurukau. Nibabehimi ada ide mewali pekatuinaomi Iriko.”

²⁵Nodo wori, karoonda maande, Nahuhuamohe paenua anggoro, Nauliangaahe, “Anggoro au ara i paenua ide, lempona dandina Pue Ala au wou au mopahintuwu Pue Ala hai manusia. Dandi ide Napakaroho hai waheNgku au mabubu i kapateNgku. Bela-belana nienu, nibabehi mewali pekatuinaomi Iriko.”

²⁶Mewali, bela-belanta maande roti, mobambarike kapatena Pue Yesu duuna i kahaweNa hule.

²⁷Mewali i tempo paande roti, hema au maande roti hai maenu anggoro i lalu hangana Pue moula rara au bara hintoto,[4] tauna iti masala, lawi bara moadai watana hai wahena Pue Yesu au rapandiri nodo roti hai anggoro.

²⁸Agina ope-ope tauna moparesahe hampai lalunda, hangko peisarihe maande roti.

²⁹Lawi tauna au maande roti moula rara au bara hintoto, ina nahukuhe Pue Ala, lawi barahe moadai watana Pue.

³⁰Idomi pongkana pane bosahe tauna i olomi au mahai hai malede, hai ara wori rangami au mate.

³¹Agaiana ane taparesa hampai lalunta, barake ina nahuku Pue.

³²Agaiana ane nahukuke Pue, lempona Nakambaroake datike ina rahuku himbela hai tauna au bara moisa Pue.

³³Mewali halalungku, ane moteruhukau maande roti, agina mombepegiakau hampai. Ane teruhu hahamokau, hangko maande sambelarikau.

³⁴Ane ara au marimi, agina maande amikau mai i sou. Ane nibabehi apa au hintoto i poteruhuami maminggu, barakau ina molambi pehuku hangko i Pue. Au ntanina, ina rapakanotoaraikau ane hawena irikamu.