Read Napu 1 Korintu 13 Bible Online

1 Korintu 13 - Napu bible

1 Korintu 13

¹Ane rapana, molambina kapande hangko i Inao Malelaha bona mololitana i lalu basa malaeka ba basa manusia au bara kuisa, agaiana bara maahi lalungku, bara mpuu ara bunduna katuwongku. Ope-ope kapande iti nodo pea pomoni ndonge ba porio-riona timbonga.

²Ane rapana, molambina kapande mopahawe lolita hangko i Pue Ala hai molambina ope-ope kapande hangko i Pue Ala au bara raisa rangangku, hai ane maroho pepoinalaingku pane kubuku mopalimba bulu, agaiana bara maahi lalungku, bara mpuu ara bunduna katuwongku.

³Ane hinangka anu-anungku kuweihe tauna au meahi-ahi tuwonda, hai mokirana watangku rahuwe, agaiana bara maahi lalungku, bara mpuu ara bunduna katuwongku.

⁴Apa lempona au rauli ahi? Tauna au mampokaahihe hangka ranganda sabarahe hai maroa lalunda, barahe mahina, barahe mampopetoia, barahe mampemahile,

⁵barahe makasara, barahe mohaoki peundeanda haduduanda, barahe hengke, hai barahe mepailalu.

⁶Ane maahike i ranganta, lempona, bara tapokatana apa au kadake, tapokatana apa au manoto,

⁷mantahake i lalu hinangka kapari, mepoinalai liliuke, meharunga liliuke, hai sabara liliuke kehapi apa pea au morumpake.

⁸Ahi bara ara kahopoana. Agaiana ane arake au mapande mopahawe lolita hangko i Pue Ala, hambela tempo kapande iti barapi ina ara. Ane arake au mapande mololita i lalu basa Inao Malelaha, hambela tempo kapande iti ina ope. Ane molambike kapande hangko i Pue Ala bona moisake apa au bara raisa ranganta, hambela tempo, kapande iti barapi raparaluu.

⁹Lawi ide-ide ope-ope kapande tauna makura mani. Mogalori tauna au mopahawe lolita hangko i Pue Ala, makura mani kapandena.

¹⁰Agaiana ane hawemi tempona Pue Ala mampopeawa hinangkana, barapi ara kapande au makura iti.

¹¹Pandirina ane anangkoi manina, mololitana nodo anangkoi; pekiringku hai lalungku nodo wori anangkoi. Agaiana ide-ide, mahilemona; kupalehimi apa au kubabehi hangkoia.

¹²Lawi ide-ide, nodoke hadua tauna au mampeita hambua lengge i pampewaoa au mogawu-gawu, lawi bara mani taisa hinangkana i katou-touana. I alo au ina mai, hangko taisari hinangkana, lawi ina mampombelindoamoke Pue Ala hai ina taita i katongawaana. Ide-ide, makura mani kamapandeku. Agaiana i alo au ina mai, ina kuisa ntepuu hinangkana, nodo Pue Ala moisana.

¹³Mewali, ide-ide, ara talu pakana au hangangaa tababehi: mepoinalaike i Pue Ala, meharungake i dandiNa, hai maahike i hangka ranganta. Agaiana hangko i talu pakana iti, au melumbu kamaroana iami ahi.