Read Napu 1 Korintu 14 Bible Online

1 Korintu 14 - Napu bible

1 Korintu 14

¹Mewali, au hangangaa tapaioru, iami kamaahinta i ranganta, hai hangangaa tapari-pari wori molambi kapande hangko i Inao Malelaha. Agaiana kapande au meliu pobunduana, iami kapande mopahawe lolita hangko i Pue Ala.

²Lawi tauna au mololita i lalu basa au hangko i Inao Malelaha, barahe mololita i ranganda, mololitarihe i Pue Ala. Lawi bara raisa ranganda apa au rauli. Anti peninina Inao Malelaha, mololitahe i lalu basa au bara raisa tauna.

³Agaiana hema au mopahawe lolita hangko i Pue Ala, mopaturohe tauna, lawi lolitanda mopakaroho pepoinalainda ranganda, mohuweki lalunda hai mopalindohe.

⁴Tauna au mololitahe i lalu basa au hangko i Inao Malelaha mopakaroho peahe lalunda haduduanda. Tauna au mopahawe lolita hangko i Pue Ala mopakarohohe lalunda jumaa.

⁵Peundeaku halalu bona ikita ope-ope peisake mololita i lalu basa hangko i Inao Malelaha. Agaiana ane mopahaweke lolita hangko i Pue Ala, itiri au meliu kamaroana. Lawi ane mopahaweke lolita hangko i Pue Ala, meliu pobunduana i ranganta pane mololitake i lalu basa au hangko i Inao Malelaha. Agaiana ane arahe au mopalimba basa iti bona manoto lempona, hangko arari pobunduana mopakaroho lalunda jumaa.

⁶Mewali halalu, ane rapana maina irikamu, hai mololitana i lalu basa au hangko i Inao Malelaha, apami bunduna irikamu? Agaiana ane mopakanotona tunggaiana Pue Ala ba mopahawena bambari hangko i Pue Ala au bara mani niisa, ba moantina Ngkorana Pue, ba mepaturona, hangko arari pobunduana irikamu.

⁷Himbela pea hai parewa au bara moinao nodo tulali ba kecapi, ane bara rapopowadi maroa, bara ara pobunduana. Pandirina, ane tulali bara maroa karatawuena ba kecapi bara kana karakawina, tauna au mohadi bara ina moisa apa au raponani.

⁸Hai ane ara tatamburu au ratawue mokakio surodado lao mombeala agaiana bara maroa potawuena, hema pae au ina masilolonga lao mombeala?

⁹Nodo wori ikamu halalu, ane mololitakau i lalu basa au bara raisa rangami, noumba karaisana apa au niuli? Ikamu nodo peakau tauna au mololita i himburu.

¹⁰I lalu dunia ide, ara ngkaia pakana basa, hai paka-pakana basa, ara lempona.

¹¹Agaiana ane arahe tauna au mololita irikita i lalu basa au bara mani taisa, ina tapowuli apa au rahowara. Nodo wori ane ikita mololita i lalu basa au bara raisa, ina rapowuli apa au tahowara.

¹²Nodo wori hai ikamu halalu, ane mololitakau i lalu basa au hangko i Inao Malelaha, bara ina raisa rangami lempona. Mewali, ane nipeinao molambi kapande hangko i Inao Malelaha, hangangaa niperapi i Pue bona Naweikau kapande mopakaroho laluna rangami au maminggu sambela.

¹³Ido hai kuuliangaakau, hema au mololita i lalu basa au hangko i Inao Malelaha, agina merapi i Pue bona molambi kapande mopalimba lempona basa iti bona raisa ope-ope rangana lempona lolitana.

¹⁴Lawi ane mekakaeke i lalu basa au hangko i Inao Malelaha, mekakaeke hangko i lalunta, agaiana pekirinta bara lumao.

¹⁵Mewali, apa au maroa kubabehi? Mekakaena i lalu basa au hangko i Inao Malelaha, hai mekakae worina i lalu basa au raisa ranganta. Monanina motoia Pue Ala i lalu basa au hangko i Inao Malelaha, hai monani worina motoia Pue Ala i lalu basa au raisa ranganta.

¹⁶Ane rapana mololitake i lalu basa au hangko i Inao Malelaha manguli ngkaia kamaroana i Pue Ala, hai bara manoto lempona lolitanta i tauna au mohadi, tauna iti barahe peisa mampokana lolitanta lawi bara ina raisa apa au tauli.

¹⁷Kehapiri maroa pekakaenta manguli ngkaia kamaroana i Pue Ala, agaiana bara ina mobundu i ranganta, lawi pekakaenta iti bara mopakaroho lalunda.

¹⁸Kuuli ngkaia kamaroana i Pue Ala lawi kamapandeku mololita i lalu basa au hangko i Inao Malelaha meliu hangko irikamu ope-ope.

¹⁹Agaiana i lalu paminggu, agina mololitana i lalu basa au raisa ranganta bona lolitangku raisa lempona, hai aginami hantepo rontepo pea lolitangku mopaguru ranganta, panena mololita kangkalanga i lalu basa au hangko i Inao Malelaha au bara raisa ranganta.

²⁰Halalu! Ineekau nodo pekiri anangkoi, hangangaa manoto lalumi nodo hadua tosae. Agaiana i babehiami, ikamu hangangaa nodokau hadua analei au bara mani naisa mobabehi apa au kadake.

²¹I lalu Sura Malelaha, teuki node: Pue mololita, Nauli, “Melempo i tauna au barahe habasa-basa hai to Yahudi ina mololitana i to Yahudi melempo i to handarena, ina Kupaturohe taunaNgku Agaiana kehapiri nodo, barahe ina mampoinalai lolitaNgku.”

²²Mewali, ane arake au mololita i lalu basa au hangko i Inao Malelaha, lolitanta iti mewali tanda kuasa hangko i Pue Ala i tauna au bara mani mepoinalai Iria, barari i tauna au mepoinalai. Agaiana ane mopahaweke lolita hangko i Pue Ala, lolitanta iti mewali tanda kuasa hangko i Pue Ala i tauna au mepoinalai, bara i tauna au bara mepoinalai.

²³Nauri nodo, ane arahe tauna au bara to Sarani ba au bara mani moisa Ngkorana Pue Ala hai laohe maminggu i boeami, apa au ina rauli ane ikamu ope-ope mololita i lalu basa au hangko i Inao Malelaha? Manoto ina rauli magilakau.

²⁴Agaiana ane ikamu ope-ope mopahawe lolita hangko i Pue Ala hai mesua hadua tauna au bara to Sarani ba au bara mani moisa Ngkorana Pue Ala, ina naisa lempona lolitami alana manoto kamadosana hai

²⁵ope-ope au tewuniangi i laluna ina tewungkehi. Kahopoana, ia ina molingkudu menomba i Pue Ala, nauli, “Tou-tou mpuu Pue Ala ara irikamu!”

²⁶Mewali halalu, apa lempona ope-ope iti? Ane maminggukau, hadua-hadua tauna ara kamapandenda: arahe au monani, arahe au mepaturo, arahe au mopahawe lolita hangko i Pue Ala, arahe au mololita i lalu basa au hangko i Inao Malelaha, arahe au mopalimba lempona lolitanda iti bona raisa ope-ope tauna. Agaiana hinangkana iti hangangaa nibabehi bona mopakarohokau lalunda rangami.

²⁷Ane arahe tauna au mololita i lalu basa au hangko i Inao Malelaha, hangangaa rodua pea ba talu. Hai ineehe mololita hihimbela, hangangaa mombehuru-huruhe. Hai hangangaa ara tauna au mopalimba lempona lolitanda.

²⁸Ane bara ara au mopalimba lolitanda, tauna iti ineemohe Mololita i lalu paminggua; agina i lalunda peami mololitahe i Pue Ala.

²⁹Ane arahe au mopahawe lolita hangko i Pue Ala, agina rodua ba talu peahe au mololita, hai hangangaa arahe tauna ntanina au moparesa lolitanda, ba tou mpuu hangko i Pue Ala ba bara.

³⁰Ane rapana, ara hadua tauna au mohuda hai mohumba lolita hangko i Pue Ala, agina tauna au tangana mololita mengkaroo hampai bona rangana peisa mololita.

³¹Ane nodo, peisakau mombehuru-huru mopahawe lolita hangko i Pue Ala bona ikamu ope-ope molambi paturo au mopakaroho pepoinalaimi.

³²Tauna au mopahawe lolita hangko i Pue Ala hangangaa peisahe morempeki peundeanda mololita. Hangangaa rabuku mololita hai mengkaroo moula peundeanda.

³³Lawi moula peundeana Pue Ala, penombaata hangangaa rakadipura maroa, bara naunde Pue ane arahe tauna au mogewo-gewo. Itimi atura au rapeulai i lalu ope-ope jumaa.

³⁴Mewali, towawine hangangaa mandii-ndii i lalu paminggua. Barahe rapaliu mololita, hangangaa mengkoruhe nodo au teuki i lalu Aturana Pue Ala.

³⁵Ane mampeinaohe moisa ba apa pea, agina rapekune i tobalilonda i sou, lawi bara hintoto ane towawine paka mololita i paminggua.

³⁶Moapari hai arakau au bara madota moula paturo iti? Ba niuli ikamumi au nguru-nguruna mopahawe Ngkorana Pue Ala? Ba niuli Ngkorana Pue Ala rapahawe pea irikamu?

³⁷Ane arahe tauna au manguli, “Molambina kapande mopahawe lolita hangko i Pue Ala,” ba “Molambina kapande hangko i Inao Malelaha,” tauna iti hangangaa mopangaku apa au kuuki ide iami parenta hangko i Pue.

³⁸Agaiana ane barahe mampoinalai paturongku ide, ineehe rapoinalai!

³⁹Mewali halalu, hangangaa nipari-pari molambi kapande mopahawe lolita hangko i Pue Ala, agaiana inee worihe nikonto au mololita i lalu basa au hangko i Inao Malelaha.

⁴⁰Ope-ope hangangaa rababehi moula rara au hintoto hai moula atura.