Read Napu 1 Korintu 15 Bible Online

1 Korintu 15 - Napu bible

1 Korintu 15

¹Ide-ide halalu, kupeinao kupopaingaakau Ngkora Marasa au kupahaweamokau. Ngkora Marasa iti nidokomi hai nipopobundumi i katuwomi mopakaroho pepoinalaimi.

²Tehoremakau hangko i huku dosami, asala mepoinalai liliukau i Ngkora Marasa au kupahaweakau. Ane bara, mbero-mbero pea pepoinalaimi iti.

³Ngkora Marasa au kupahaweakau halalu, iami au kudoko wori. Au patoana, Kerisitu mate mohuru dosanta nodo au teuki i lalu Sura Malelaha.

⁴I kapateNa, ratawumi, hai i alo katalu rapatuwo hulemi, nodo au teuki i lalu Sura Malelaha.

⁵I katuwoNa hule, mopatongawami wataNa i topeguruNa; nguru-nguruna i Peturu, hai roo indo i topeguruNa au ntanina.

⁶Hangko inditi, mopatongawa mbulimi i lindonda topeulaNa au lima atuna labi. Tauna iti kabosanda tuwo manihe ide-ide, agaiana aramohe bahangkia au mate.

⁷Roo indo, mopatongawa mbulimi watana i Yakobu adiNa, hai i ope-ope suroNa.

⁸Kahopoana, mampatongawami iriko. Iko, barana nodo suro au ntanina. Raangkana mewali surona Pue Yesu i tempo au bara rahaharunga, nodo hadua anangkoi au rapoanaka bara mani handa wulana.

⁹Lawi ide iko, suro au tepakoi tuwongku hangko i ope-ope surona Pue Yesu. Katouana, barana hintoto rauli suro, lawi hangkoia mampopeahi-ahina tauna au mepoinalaihe i Pue Yesu.

¹⁰Agaiana anti kabulana laluna Pue Ala hai anti kaNatulungingku, ido hai raangkana mewali suroNa hawe ide-ide. Hai mobundu mpuu kabulana laluNa hai petulungiNa iriko. Lawi mepongka i karaangkaku, meliu pobagongku i Pue hangko i ope-ope surona Pue Yesu au ntanina. Ane rohongku pea haduduangku, bara kubuku mampopolumao bago iti agaiana anti kabulana laluNa Pue Ala hai anti kaNatulungingku, ido hai kubuku.

¹¹Arakau au kupaturo, ara worikau au rapaturo suroNa Pue Yesu au ntanina, agaiana bara topobambari Ngkora au tapaioru. Au tapaioru iami Ngkora Marasa au kibambariakau hai au nipoinalai.

¹²Mewali, ane kibambari katuwo hulena Kerisitu hangko i kapate, moapari hai ara mani tauna i olomi au mosapuaka katuwo hulenda tomate i alo pobotusia?

¹³Ane rapana barahe ina tuwo hule tomate, manoto barato tou katuwo hulena Kerisitu.

¹⁴Ane rapana Kerisitu bara tuwo hule, bara ara bunduna pobagongki mopahawe Ngkora Marasa, hai bara wori ara pobunduana pepoinalaimi. Lawi ane Kerisitu bara tuwo hule, mampoinalaimokau bambari au bara tou.

¹⁵Melumbu hangko indo, peisangkai raimba topodongko, lawi kipahawe bambari au manguli Pue Ala mopatuwo hulemi Kerisitu. Agaiana ane rapana tauna au mate bara ina rapatuwo hule, bara tou lolitangki,

¹⁶lawi ane tomate barahe rapatuwo hule hangko i kapate, manoto bara tou karapatuwo hulenami Kerisitu.

¹⁷Hai ane Kerisitu bara rapatuwo hule, bara mobundu pepoinalaimi hai barakau ina tekabaha hangko i huku dosami.

¹⁸Hai ane nodo, to Sarani au matehe, bara ara peharunganda.

¹⁹Rapana natulungi peake Kerisitu tanganta mani tuwo i dunia hai roo indo barapoke Natulungi, lempona, hangko i ope-ope tauna i dunia ide, ikitami au meahi-ahi ntepuu katuwonta.

²⁰Agaiana idemi paturo au tou, Kerisitu rapatuwo hulemi. Ia au nguru-nguruna tuwo hule hangko i kapate. Hai karapatuwo huleNa mopakanoto kaina rapatuwo hulenda wori ope-ope tomate.

²¹Anti kamadosana hadua tauna, ido hai ope-ope tauna hangangaa mate. Nodo wori, anti kapateNa hai katuwo huleNa hadua tauna, ido hai tomate ina rapatuwo hule worihe.

²²I lalu pohintuwuta hai Adama ope-ope tauna hangangaa mate, agaiana i lalu pohintuwuta hai Kerisitu ope-ope tauna molambihe katuwo au wou au bara mokahopoa.

²³Agaiana ope-ope tauna ina rapatuwo hule moula tempo au tepatokami au nguru-nguruna iami Kerisitu. Roo indo i kahawe huleNa i dunia ide, ope-ope tauna au meula Iria ina rapatuwo hulehe.

²⁴Roo nodo, hawemi kahopoa dunia, i tempo iti, Kerisitu ina monangi ope-ope topoparenta, ope-ope tadulako, hai ope-ope au makuasa. Hai kahopoana, Nahuhumi kadatuaNa i Pue Ala Umanta.

²⁵Lawi Kerisitu hangangaa mewali datu au moparenta, duuna Pue Ala mampopengkoru ope-ope au meewa Iria,

²⁶hai iwali au Nanangi kaopeana, iami kapate.

²⁷Ara teuki i lalu Sura Malelaha au manguli, “Pue Ala mampopengkoru hinangkana Iria.” Mewali taisa ntepuu, hinangkana au ara ina rapopengkoru i Kerisitu. Batena pearai Pue Ala au bara mengkoru Iria, lawi Iami au mampopengkoru hinangkana i Kerisitu.

²⁸Mewali, ane hinangkana rapopengkoru i Kerisitu, Kerisitu ina mengkoru i UmaNa bona tongawa kamakuasana Pue Ala i hinangkana.

²⁹Noumbami halalu? Ane tauna au mate bara ina rapatuwo hule, moapari pane arahe tauna au rariu mopahuru ranganda au mate? Ane tomate bara ina rapatuwo hule, apa pongkana pane ada iti rababehi?

³⁰Ikami ide rapopeahi-ahi liliungkai anti pobagongki mobambari Ngkora Marasa. Agaiana ane tomate bara ina rapatuwo hule, apa bunduna hinangkana au kitodiha iti?

³¹Alo-alona molindona kapate anti pobagongku mopahawe Ngkora Marasa. Tou mpuu lolitangku ide, hai matana mpuu lalungku anti kaikamuna halalu, lawi mepoinalaikau i Amputa Kerisitu Yesu.

³²Tangangku inde i wanua Epesu, raewana tauna au nodo binata maila. Ane rapana tomate bara ina rapatuwo hule, apa bunduna hinangkana au kutodiha iti? Ane rapana tomate bara ina rapatuwo hule agina taula lolita au manguli node: “Maande hai maenu peamoke mohaoki katana-tana, lawi hangalo rongalo tuwoke, hai roo indo matemoke.” Nodomi lolitanda tauna hanggaa.

³³Ineekau rapakanawo! Ane mampohimadakau tauna au kadake babehianda, babehiami au maroa ina tebaliki mewali kadake, nodo babehianda.

³⁴Ido hai kuuliangaakau, nipakanoto lalumi moula paturo au tou, hai nikabahami ope-ope dosami. Lawi ara manikau au bara moisa Pue Ala. Iti kupahawe bona maeakau.

³⁵Manoto arahe au ina mekune, “Noumba katouana tomate ina rapatuwo hule? Wata au noumba ina raweihe?”

³⁶Ntuli mpuu tauna au mekune nodo! Ane mantudake apa pea, tinuda iti bara ina tuwo ane bara ratawu hampai nodo tomate.

³⁷Hai apa au tatuda iti iami tinuda, maroa pare ba tinuda au ntanina. Barari patoa pare au tatuda, agaiana wuana.

³⁸Karoona ratuda, Pue Ala mopatuwo moula peundeaNa, duuna mesupa hampoa pare ba hampoa gogoa ba apa pea. Paka-pakana tuwo moula lengge tuda-tuda iti.

³⁹Ane tapekiri ope-ope au tuwo i wongko dunia, bara himbela lenggenda. Lengge manusia bara nodo lengge tadasi. Lengge ikane, ntanina wori. Paka-pakana binata, montani-ntani lenggenda.

⁴⁰Nodo wori i langi, ara alo, wula hai betue, agaiana ope-ope iti bara himbela hai apa au ara i dunia. Perae alo, wula hai betue, bara himbela hai peraenda apa au ara i dunia ide.

⁴¹Pewangka alo bara himbela hai pewangka wula. Pewangka betue, ntanina wori. Mogalori betue, au ngkaia, montani-ntani pewangkanda.

⁴²Nodo wori karapatuwo hulenda tomate. Watanta au ratawu iami wata au malede hai peisa magoro, agaiana ina rapopearo huleke hai wata au barapi peisa magoro.

⁴³I karatawunta, wata iti barapi maroa, agaiana i tempona rapatuwo hule, wata iti mewalimi maroa hai maroho. Wata iti barapi ina mate hai barapi ina magoro.

⁴⁴Watanta au ratawu iami wata au hintoto pea tuwo i dunia, agaiana wata au rapatuwo hule iami wata au hintoto tuwo i suruga anti kuasana Inao Malelaha.

⁴⁵Ara teuki i lalu Sura Malelaha au manguli, “Tauna au nguru-nguruna napopewali hai napatuwo Pue Ala iami Adama. Agaiana Kerisitu peisa rauli Adama au kahopoana. Iami au moweike katuwo maroa au bara mokahopoa.”

⁴⁶Pue Ala bara liliu mobaliki watanta. Nguru-nguruna Ia moweike watanta ide au hintoto maida i dunia ide. I alo au ina mai, hangko Naweirike wata au hintoto maida i suruga.

⁴⁷Adama au kaisa hangko i dunia hai rateru hangko i awu tampo, agaiana Adama au kadua hangko i suruga, iami Kerisitu.

⁴⁸Ope-ope tauna i dunia tuwo nodo Adama, lawi ikita ope-ope pemuleana. Agaiana ikita ope-ope au mohintuwu hai Kerisitu ina molambike katuwo au hangko i suruga, nodo katuwona Kerisitu.

⁴⁹Ide-ide, katuwonta nodo katuwona Adama, lawi watanta ide iami wata au hintoto maida i dunia. I alo au ina mai, hangko tuworike nodo Kerisitu, hai i tempo iti ina molambike wata au hintoto maida i suruga.

⁵⁰Halalu, tunggaiaku node, watanta i dunia ide rapopewali hangko i onto hai wahe. Hai watanta ide ina mate. Ane watanta bara tebaliki, barake peisa maida i lalu poparentana Pue Ala i suruga, lawi indora bara ara kapate.

⁵¹Mewali bona niisa, kupahaweakau paturo au tewuniangi hangkoia: i kahawena hule Pue Yesu, arake au bara mani mate, agaiana ikita ope-ope ina rabaliki, maroa au tuwo, maroa au mate.

⁵²Ope-ope iti pewalina hangkapira mata pea ane ratawuemi tatamburu au kahopoana. Lawi ane tatamburu iti ratawue, Pue Ala ina mopatuwo hule tomate, hai Naweihe wata au barapi ina mate. Hai ikita au tuwo manike, Nawouki wori watanta.

⁵³Lawi watanta ide ina mate hai ina magoro. Ido hai watanta hangangaa rabaliki mewali wata au barapi ina mate. Hai ane tebaliki watanta, ina tepabukei apa au teuki i lalu Sura Malelaha au manguli node: “Kapate barapi ara, Pue Ala monangimi kapate.”

⁵⁴

⁵⁵“Ee kapate, iumbami penangimu? Ee kapate, iumbami kuasamu?”

⁵⁶Kuasa kapate iami dosa. Mewali manusia hangangaa mate anti kamadosana, hai dosa iti tongawa i atura-atura agama.

⁵⁷Agaiana tauli ngkaia kamaroana i Pue Ala, lawi Nakabahamoke hangko i dosa hai kapate anti pohintuwuta hai Yesu Kerisitu Amputa.

⁵⁸Mewali halalu au kupokaahi, hangangaa nipakaroho pepoinalaimi. Inee bata-bata lalumi. Hangangaa nipopolumao liliu bagona Pue, lawi niisa apa au nipobago i Pue bara ina mbero-mbero.