Read Napu 1 Korintu 16 Bible Online

1 Korintu 16 - Napu bible

1 Korintu 16

¹Kaliliuana halalu, ina mololitana kana i doi au nigulu bona nipopotulungihe halalunta hampepepoinalai au meahi-ahi tuwonda i wanua Yerusale.[5] Kuperapi bona nibabehi iti moula apa au kuhawaamohe to Sarani au ara i tampo Galatia.

²Inee nipegia kahawengku, agaiana minggu-mingguna i alo kaisa, nipatanimi doi iti i soumi moula polambiami hadua-hadua, hai niwoli doi iti maroa-roa duungku hawe.

³Ane hawena deade, nipileihe bahangkia rangami au nipoinalai bona kuweihe sura hai kutuduhe lao i Yerusale moanti doi petulungimi.

⁴Hai ane paraluu, laoto worina hihimbela hai ihira.

⁵Arato tunggaiaku mosondakikau ane roomona mosondakihe to Makedonia, lawi kupeinao hampai lao irihira.

⁶Peundeaku bona mahaena haodi hihimbela hai ikamu. Maroa ane maidana irikamu duuna liu tempo makuli, hai roo indo peisana nipopeangka mopaliliu polumaongku lao i tampo ntanina.

⁷Bara kuunde ane lao sangka peakau kusondaki. Ane napokana Pue, kupeinao bona mahaena haodi hihimbela hai ikamu.

⁸Agaiana ide-ide, hangangaa maidana hampai inde i Epesu duuna hawe Alo Mahile Pendauluna Inao Malelaha,[6]

⁹lawi kehapirihe bosa tauna au moewana, mobundu mani mpuu pobagongku inde.

¹⁰Ane hawe Timotiu, kuharunga nidoko maroa hai niadai, lawi ia mampopolumao bagona Pue, nodo iko.

¹¹Mewali, inee ara au bara mohaile. Nipopelingka maroa i pesulena mai iriko, lawi kupegia inde hihimbelahe hai halalunta hampepepoinalai.

¹²Kaliliuana, ane halalunta Apolo, bosami belana kuuliangaa, “Arahe halalunta au ina melingka lao i Korintu. Agina lao woriko hihimbela hai ihira.” Agaiana ide-ide bara mani naunde lao. Ararai katepakana, hangko laorikau nasondaki.

¹³Mainga-ingakau. Nipakaroho pepoinalaimi! Nipakaroho lalumi! Mantahakau i pepoinalaimi!

¹⁴Apa pea au nibabehi, nibabehi hangko i lalumi au buke ahi.

¹⁵Halalu, niisami Setepanu hantambi au nguru-nguruna mewali to Sarani i propinsi Akaya. Ihira mohuhu katuwonda i Pue bona motulungihe halalunda hampepepoinalai. Mewali, kuperapi halalu

¹⁶bona niula paturonda hai paturonda ope-ope ranganda au mampopolumao liliu bagona Pue.

¹⁷Matana lalungku lawi hawemohe Setepanu, Fortunatus hai Akaikus. Barakau tepaka motulungina, agaiana ihira kuimbamohe pahurumi.

¹⁸Halalunta iti mopamatanahe lalungku, nodo karapamatanana lalumi. Ido hai kuperapi bona nibilahe tauna au nodo ihira.

¹⁹Ope-ope jumaa au ara i propinsi Asia mopakatuhe tabeanda irikamu. Akwila hai Priskila hihimbela hai ope-ope to Sarani au maminggu i sounda mopakatuhe tabeanda i lalu hangana Pue.

²⁰Ngkaia tabea hangko i ope-ope halalumi inde. Ane mohidupakau i paminggu, mombetabe-tabe mpuukau hangko i lalumi.

²¹Kahopoa sura ide kuuki sadudua, ngkaia tabea hangko iriko Paulu.

²²Tauna au bara mampokaahi Pue Yesu, hararamohe i Pue Ala. Maranata! MaimoKo, Pue!

²³Pue Yesu mowatikau!

²⁴Kupokaahikau ope-ope i lalu hangana Kerisitu Yesu. Hangko iriko PAULU